1 Timoteo 6

1Dela moz nu byac ni mbecy por fers la rlagy ñi nu gyicy dey patro̱o̱ niy par mbecy nu yad ñi ni nu ca lagy yu lo nu dutuub la lardooy, gun orze' cue' nii zi mbecy ni Ñgyoozh nunu cue' nii dey nu coz a̱' nap de coz nu rlyuu den. 2Ze' benu patro̱o̱ ni moz ze' nac yu mbecy nu ricy cup consuel lo Jesuuz, orze' cue' checa moz ze' nu ca lagy yu loy, gun patro̱o̱ ze' nac yu bicy yu nu nac Crisht. Lugaar nu checay nu ca lagy yu loy, rlagy ñi nu gyicy paa zir yu nu patro̱o̱ niy. Gun ricy cup patro̱o̱ ze' consuel lo Jesucrisht, nunu Ñgyoozh rcam yu. Orze' blyuu de coz ze' ni de mbecy, nunu niir lo dey nu ricy ñi presis nu ni gyicy yu. 3Benu ca na mbecy lyuuy coz nu walab coz nu rlyuu de̱, o benu riidz nu lyuuy wasaap ñi riidz ni Shuaan den Jesucrisht, de riidz nu rlyuu de̱, o benu riidz nu lyuuy wasaap ñi riidz nu rnii lac mod gyicy den de coz nu rlagy Ñgyoozh, 4orze' yu ze' nac yu tub mbecy le'. Yu ze' rila wagyet lag yu cuen. Yu ze' rlagy yu nu go zi'l yu riidz nu rila wagyicy ñi presis. Nunu rlagy yu tub suy losa'y nu riidz. Orze' tub lo zi'l coz a̱' nap ricy reña' mbecy nu nac de nde'. Rasaap lagy dey nu nac losa'y. Rnii deet dey nu losa'y. Rnii dey rishcuen. Driib dey gyidza too losa'y. Ricy dey malis lo losa'y. 5Zaab rnii deet la dey, gun wagash nap dey shcab, nunu wagad lagy nap dey de coz nu rishli. Nde' nu rzii dey nu de coz ni Ñgyoozh nu ricy yu, nde' par nu gyicy zi'l yu gan gyel nap rziiy. 6Ornu mbecy gyicy yu coz ni Ñgyoozh, nunu zu laay conform ca na la nu gad, orze' rishli yu ze' yu nu tona' la coz sheñ gyicy gan. 7Ornu briin gyishlombecy ii, se la la coz bri dun. Nunu ornu ruun gyishlombecy, ni' zi'l ni tub la coz wac gya dun. 8Tees benu yu' coz nu don, nunu benu ricy cup den shab na, orze' de nu nde' gyicy lan ñi nu coz nu beñ. 9Tees yu' mbecy rlagy yu gyaguani'ñ yu. Nde' nu rziñ lañ nañ lardooy nu rlagy yu gyicy yu coz a̱' nap par nu gyicy yu gan tiñ. Orze' yet lag yu nañ caa ni de coz a̱' nap ze'. Ye rzac dey lo zañ coz nu gyicy da̱y nu de ub yu. Orze' nde' gyicy ñi nu gnu mbecy ze', nunu dune'y. 10Gun benu tub mbecy ye rzac yu lo tiñ, orze' bi gush yu nez nu gyicy yu cyi. Nde' nu la be mbecy bi bruu chu dey lo de riidz nu ricy cup den consuel lo. Orze' nde' nu laab ub la dey ricy yu nu tona' la rzac ziy. 11Ze' ru Timoteo, ru nac ru mbecy nu ricy coz nu rlagy Ñgyoozh. Orze' cue' gyicy ru de coz ze'. Bicy nu coz nu ricy ru, nde' coz nu se'ñ. Nunu bicy nu cyiiñ ru gal mod nu rlagy Ñgyoozh. Nunu bicy nu gyicy cup ru consuel lo Jesuuz. Nunu bicy nu car cyu zi'l mbecy. Nunu bicy nu gagyer ornu deet rac. Nunu bicy nu gac ru mbecy gugy na. 12Ornu shet yaar riiñ ni Ñgyoozh, orze' fert la bloo lo, gun orze' gyicy ru gan nu cui mbañ ru tub la. Ni gyicy ru gun nac ru mbecy nu ricy cup consuel lo Jesuuz, gun Ñgyoozh pcuim ru nu cui mbañ ru, nunu par nu gad nu cui mbañ ru, mnii lat zigy mbecy nu ru ricy cup ru consuel lo Jesuuz. 13Lo rgüii la Ñgyoozh, biñ nu rbic gyel mbañ ni dela coz nu yu' gyishlombecy, nunu lo rgüii la Jesucrisht, biñ nu mnii cyu nac lo Poncio Pilato, nde' nu ya̱ rne̱e̱ lor 14nu gyicy yac ru dela coz ze'. Gun cue' nu gad lugaar nu griib mbecy gyidza ic ru. Ni bicy gal shuub la dzi nu cyid Shuaan den Jesucrisht. 15Orze' Ñgyoozh gyicy mi nu cyid mi ornu shuub tiem. Mi ze' nac mi Biñ yon. Mi ze' nil ricy cup mi rishbeey nu gyicy mi la zi'l coz nu rlagy mi. Mi ze' riib ic mi dela mbecy nu riib ic. Nunu nac mi Shuaan dela yu nu nac shuaan. 16Tub zi la mi ze' nil zum tub la. Nunu tub zi la mi ze' gac gyicy mi nu cyiiñ mbecy tub la. Rcyiiñ mi ze' nu yu' yaa ni gyel lily nim, ze' nu rila wac gyecha' mbecy. Sac ni tub la mbecy nu bi bzaac yum, nunu ni tub la mbecy wac zac yum. ¡Rlagy ñi ca lagy mbecy lom, nunu rlagy ñi nu gyub ic mi dela mbecy tub la! ¡Laab ni gac ñii! 17Tees de mbecy nu ricy cup gyel nap gyishlombecy ii, mnii lo dey nu cue' gyicy ñgyay. Nunu mnii lo dey nu cue' cyish loy lo gyel nap niy. Gun wagad lagy yu lac gaal tuñ tiem gyicy cup yu gyel nap ze'. Sinu mnii lo dey nu cyish loy lo Ñgyoozh. Gun Ñgyoozh cuic za' lam dela coz ni den, gun orze' gyicy den gusht dun ñi. 18Mnii lo dey nu gyicy yu zañ coz nap. Gun benu ni gyicy dey, orze' na dey gal nu na mbecy guani'ñ nu nac coz nu ricy yu. Orze' mnii lo dey nu cyaañ yu de coz nap nu gyicy yu. Mnii lo dey nu gzu dey altant par nu locyuub yu losa'y, nunu mnii lo dey nu cue' ziy cuic yu coz ni losa'y. 19Benu ni gyicy dey, orze' Ñgyoozh gyabic mi ñii ni dey par lo. Nunu benu ni gyicy dey, orze' tub la cyiiñ nu dey Ñgyoozh gal mod nu rlagy ñi. 20Timoteo, bicy cuidad nu riiñ nu gutib ic ru. Nunu cue' zuub gyidag ru de riidz wacyiiñ nu za contr ni Ñgyoozh, de riidz nu ricy zily dza la mbecy. 21Yu' mbecy nu rzeña lagy dey de riidz wacyiiñ ze'. Orze' nu nac nde' gudza dey nu de coz ni Crisht. Ñgyoozh gyicy mi faboor nu nap gyicy num der.

will be added

X\