1 Timoteo 5

1Cue' gab zir de mbecy gush, sinu benu gyicy dey coz nu walab se'ñ, orze' pshuu nu dey gal nu rshuu nur uz ru. Ze' de yu feñ, benu gyicy dey coz nu walab se'ñ, orze' pshuu nu dey gal nu rshuu nur tub bicy ru. 2Ze' de biñ mñaa gush, benu gyicy dem coz nu walab se'ñ, orze' pshuu nu dem gal nu rshuu nur ñaar. Ze' de fiñ feñ, benu gyicy deñ coz nu walab se'ñ, orze' pshuu nu deñ gal nu rshuu nur zan ru. Nunu cue' shiñ nii toor. 3De mbecy ni Crisht rlagy ñi nu locyuub yu de byud benu nu rishli sac cyu nu locyuub dem. 4Benu tub byud zu i'ñ mi, o zu yag mi, orze' yu ze' rlagy ñi nu gad lagy yu nu locyuub yum loga la. Como mi ze' nac mi famil niy. Orze' ni mod gyabic yu coz nu zaab yu ni de mbel niy nu nac nu bguul dey yu. Gun nde' coz nu yet lagy Ñgyoozh. 5Biñ mñaa nu rishli gaal nac byud, de biñ mñaa nu rishli byeeñ ub zi, mi ze' cue' checam nu cyish lom lo Ñgyoozh, nunu dzi rel la cyiñ mi lo Ñgyoozh. Nunu dzi rel la cue' checam nu nii num Ñgyoozh. 6Ze' byud nu zu par nu gyicy zi'l mi coz nu gusht nim, mas zum gyishlombecy ii, se la la cyiiñ mi ni Ñgyoozh. Nam gal nu na tub mbecy gut. 7Pcaa de mbecy ni Crisht nu ni mod gyicy nu dey de byud, gun orze' warusu mbecy nu griib gyidza too de mbecy ni Crisht. 8Benu tub mbecy wabic yu de coz cyiiñ ni de famil niy, benu wabic yu coz cyiiñ ni de mbecy nu yu' nañ yu'y, orze' wagyicy yac yu ni de riidz nu rzeña lagy yu. Orze' yu ze' a̱' nap zir yu gaze' de mbecy nu wagyicy cup consuel lo Crisht. 9Zaan ru nu caa dey nu la de byud lo lisht ni de biñ mñaa nu ricy riiñ nu de mbecy ni Crisht benu bi pshuub mi gayon ña'n, nunu benu bicy yac mi nu tub zi ñgyeem nu bzu. 10Nunu rlagy ñi nu nap neñ mbecy de coz nap nu ricy mi: nu nap rguul mi de i'ñ mi, nu nap rnii num de mbecy nu rza yu'm, nu a̱' le'm, sinu rzu bich mi nu nac de mbecy ni Crisht, nu rlocyuub mi de mbecy nu rzac zi. Orze' benu fert bicy mi de lo la riiñ nap, orze' zaan ru nu caa dey nu lam lo lisht ze'. 11Tees de byud nu nigul shuub gayon ña'n, cue' zaan ru nu caa dey nu lam lo lisht ze', gun ornu nii too dem nu gad tuuba' ñgyeem, orze' galagy mi nu chelaam tuuba' tir. Orze' gla yaam riiñ ni Crisht. 12Orze' yu' falt nim, gun wangyicy yac mi nu de riidz nu mniim lo Crisht nu gyicy mi. 13Nunu tuuba' coz, yu' nu gyac dem mbecy nu sac riiñ gyicy. Orze' chesam gaza' yu' mbecy la. Nunu walab tub lo zi'l nu sac riiñ gyicy dem, sinu cugyi' nii dem rishcuen. Cugyi' nu ne' ru' dem lat asunt ni reña' mbecy. Orze' nii dem coz nu walab se'ñ. 14Nde' nu ya̱ rlagya̱ nu chelaa de byud feñ. Orze' cyich mi famil, nunu nap gyub ic mi de riiñ nañ yu'. Orze' rila cue' cuic dem lugaar nu nii zi de mbecy nu rzi lagy lo den nu nac naa mbecy ni Crisht. 15Ni rne̱e̱ lor, gun yu' la be byud nu bi bruu chu dem lo de coz ni Crisht par nu ricy dem coz nu rlagy nuras. 16Benu zu tub byud lat de famil ni tub biñ mñaa nu ricy cup consuel lo Crisht, orze' biñ mñaa ze' rlagy ñi gyash mi byud ze' goow mim lugaar nu goow de' zir de mbecy ni Crisht mi, gun orze' de mbecy ni Crisht gac gyash yu de byud nu rishli ub zi, rishli sac famil ni. 17Rlagy ñi nu ca zir lagy de mbecy lo yu bel nu nap riib ic lat de mbecy ni Crisht gaze' de' zir mbecy. Nunu ricy zir ñi presis benu yu ze' yu nu rshaal riidz ni Ñgyoozh nunu rlyuuy ni de mbecy. 18Gun riidz ni Ñgyoozh rniiñ: “Cue' car coz nu gow tor lat nu ricy ma riiñ”, rniiñ. Nunu rniiñ: “Yu nu ricy riiñ yad ñi nu gyad iy”, rniiñ. 19Cue' gyicy cuen ru de cyi nu driib mbecy ic de yu bel benu wanrusu cyup o chon teshtig nu bzaac yu nu shiñ bicy yu. 20Ornu gyubee nu tub yu bel yu' falt niy, orze' shuu nur yu lo rgüii la dela de mbecy ni Crisht ornu yu' tublaazh dey, gun orze' de' zir mbecy dzib dey nu gyicy yu cyi. 21Ñgyoozh Uz na, nu Jesucrisht, nu de anc zub lo rzac dem ornu ya̱ ricya̱ mandaar lor nu gyicy yac ru nu de coz nu mne̱e̱. Ni gyicy ru mas cyu zi'l mbecy nac yu. Cue' nu reñ ga mod gyicy nur tub ga mbecy. 22Cue' glal ru nu griib yaar too mbecy nu gyicy ru nu gac yu yu bel. Gun benu ni gyicy ru, nde' cuen ni ru benu gyicy yu cyi. Cue' gyac ru mbecy nu yu' falt ze' ni. 23Timoteo, ru cya' rac nañ ru, nunu cya' rat ru. Orze' cue' go'r nis zi'l, sinu rlagy ñi nu go'r ñuu mi' ñup ni urbyay, gun orze' gyicy ñi guñaa nuñ ru. 24Rlagy ñi nu gyicy cuidad ru anzir nu riib ru riiñ ic yu bel, gun waric na raso̱o̱ la mbecy nay. Yu' mbecy lo nu loo la ricy yu cyi. Orze' rabee lac ricy yu anzir nu gyicy der preb yu. Ze' yu' ga' mbecy ngach ricy dey coz cyi. Orze' waca bee de cyi nu bicy yu, sinu gal despuees gaze' nu gruu zac ñi. 25Orze' ni' zi'l mod yu' mbecy nu lo nu loo la ricy yu coz nap. Orze' rabee lac ricy dey. Nunu yu' ga' mbecy ngach ricy yu coz nap. Tees ni' de coz nap nu ricy yu wagyeñ ñi ngach.

will be added

X\