1 Timoteo 4

1Tees Espiriit Yon ni Ñgyoozh naal la rniim nu ornu bi yad shuub dzi ni gyishlombecy, yu' mbecy nu wayicy cupa' dey consuel lo riidz nu ricy cup de ub na consuel lo na, sinu gzuub gyidag dey ni de riidz nu gruu lo de nuras nu rguu mbecy, nunu gzuub gyidaga' dey ni de riidz fals nu rlyuu de nuras. 2Ni gyicy dey ornu gzuub gyidag yu coz nu gnii de mbecy rzuu lo, gal nu de mbecy rguu. De mbecy a̱' nap ze' mnu shcab ni dey nu nac coz nu ricy yu. Orze' na wagat lo ga' dey mas shiñ ricy yu. 3De mbecy ze' zañ coz a̱' nap lyuu dey. Ca dey ni de mbecy nu cue' gad mñaa dey. Nunu yu' coz nu wazaan dey nu gow mbecy. De nde' coz fals. De coz nu don ze', nde' nac ñii coz nu psa' lagy Ñgyoozh par nu gow de mbecy nu ricy cup consuel lo Crisht, de mbecy nu rad lagy de riidz rishli. Nunu de yu ze' rbic dey gras nim ornu row dey ñi. 4Gun dela coz nu psa' lagy Ñgyoozh nu dow na, caacy ñi. Walagy ñi zu chu mbecy ni tub la de coz ze' benu gric zi'l den gras ni Ñgyoozh ornu grush nañ. 5Dela coz nu dow na caacy ñi, gun Ñgyoozh rniim nu caacy ñi. Nunu caacy ñi gun rnii nu den mi nu nac ñii. 6Timoteo, ze' benu ru lyuur de coz ii ni de bicy na, nunu benu gyafert ru nu nac de riidz nu zeña lagy dela den, de riidz rishli nu ricy yac ru ni, orze' benu ni gyicy ru, orze' ru nac ru tub moz ni Jesucrisht nu ricy paa. 7Orze' cue' gyicy cuen ru de riidz ton nu walab lo Ñgyoozh bruu. Psya' de coz nu gyicy zir ñi nu gyicy ru de coz nu bi ca lo cuen nu ricy mbecy ni Ñgyoozh. 8Mbecy ñumiiñ zi gyicy yu gan benu gyicy yu riiñ par nu gyafert cuerp niy. Tees benu gyicy yu de coz nu ca lo cuen nu ricy de mbecy par lo Ñgyoozh, orze' coz ily gyicy yu gan, gun benu ni gyicy yu, orze' gruu nap yu gyishlombecy ii, nunu gruu nap yu ze' nu cyiiñ yu par lo. 9Dela nde' coz rishli, nunu dela mbecy rlagy ñi nu cheña lagy dey niñ. 10Nde' nu nu nac nde' fert ricy den riiñ ni Ñgyoozh. Nunu rzaan la den mas shiñ ricy nu mbecy de ub na, gun drish lo den lo Ñgyoozh mbañ. Gun Ñgyoozh nac ni biñ nu rboo mbañ dela mbecy. Co mbañ mi de mbecy nu ricy cup consuel lo Crisht. 11Orze' de coz ii caar de mbecy nu gyicy yuñ, nunu lyuur ni dey nu ni gyicy yu. 12Cue' zaan ru nu gyicy gyidz mbecy ru nu gabee nac ru mbecy feñ, sinu nap zir benu rlyuur ni de mbecy ni Crisht nu lac mod gyicy dey nu nac mod nu ricy ub ru. Mnii riidz nap. Bzu tub mod nu nap. Pca de losa'r. Bicy cup consuel lo Crisht. Nunu ru guc mbecy nu sac falt ni. Benu ni gyicy ru, orze' lyuur ni dey lac mod gyicy yu. 13Orze' blab de riidz ni Ñgyoozh nu dutuub la lardoor ze' nu yu' tublaazh de mbecy ni Crisht gal yap la̱. Pshaal lo dey lac yaruu de riidz ze', nunu blyuu ni dey. 14Cue' gac ru mbecy nu wagyicy cuen riiñ nu bdu' Ñgyoozh yaar. Ni bicy mi ornu mnii mbecy por cuen nim nu nac ru, nunu ornu de yu bel nu zu riiñ lat de mbecy ni Crisht briib yaa dey toor. 15Bicy de coz ze' nu dutuub la lardoor. Gun orze' gzac dela mbecy nu zaab ricy lar gan nu nap ricy ru riiñ ni Ñgyoozh. 16Bzu cuidad nu de coz nu ricy ru, nunu bzu cuidad nu de coz nu rlyuur. Fert la bzu nu delañ. Benu ni gyicy ru, orze' gruu mbañ ru, nunu ni' zi'l gyicy ru nu gruu mbaña' de mbecy nu zuub gyidag de coz nu niir.

will be added

X\