1 Timoteo 3

1Mbish tub riidz nu rlagy ñi nu cheña lagy mbecy. Riidz ze', nde' “Benu ca na tub mbecy rlagy yu gac yu yu bel lat de mbecy ni Crisht, orze' tona' la riiñ nap rlagy yu gac yu.” Nde' riidz nu rlagy ñi nu cheña lagy mbecy. 2Nde' nu na, par nu cyiiñ yu nu gac yu yu bel, orze' rlagy ñi nu cyiiñ yu tub mod nu cue' la griib mbecy gyidza tooy. Rlagy ñi gac yu mbecy nu ricy paa nu tub zi'l biñ nu nac mñaay. Rlagy ñi gac yu mbecy nu zu cuidad nu nac ub. Rlagy ñi nu gac yu mbecy nu nap rash shcab. Rlagy ñi nu gac yu mbecy raso̱o̱. Rlagy ñi nu nap nii nuy mbecy nu rza yu'y. Rlagy ñi nu gac yu mbecy nu nap na shcab ni par nu lyuuy ni losa'y. 3Cue' gac yu mbecy rzugy. Cue' gac yu mbecy dzech na. Sinu rlagy ñi nu gac yu mbecy nu nap ri lardoo. Rlagy ñi nu gac yu mbecy gugy na. Cue' gac yu mbecy nu ye rzac lo tiñ. 4Nunu rlagy ñi gac yu mbecy nu nap riib ic lat de famil ni. Rlagy ñi nu de i'ñ yu gac yu mbecy nu rca lagy lo de mbecy nunu gac dey mbecy nu rzuub gyidag. 5Gun benu tub mbecy wagac gyub ic yu lat de famil niy, orze' ni' zi'l wac ña nap yu de mbecy ni Crisht. 6Yu nu gac yu bel wac mbecy nu sa brugyi' ricy cup consuel lo Jesuuz, gun nis gyale'y. Gun benu ni gyicy yu, orze' gnii Ñgyoozh nu cyi nu gyicy yu zañ contr nim gal nu bicya' zi'l nuras. 7Tuuba' coz rlagy ñi nu cue' gzab riidz nu nac yu mbecy a̱' nap lat de mbecy nu walab mbecy ni Crisht, gun orze' cue' nu gruu gyel mbecy niy. Orze' cue' gyicy nuras gan yu. 8Ni' zi'l de yu nu gzu ayudant lat de mbecy ni Crisht rlagy ñi nu gac dey mbecy nu rca lagy losa' lo. Rlagy ñi gac yu mbecy nu rnii nu dutuub la lardoo. Cue' gac yu mbecy rzugy. Cue' gac yu mbecy nu ye rzac lo tiñ. 9Rlagy ñi nu dutuub la lardoo dey gyicy cup yu consuel lo de riidz nu gal na briic Ñgyoozh nu gad lagy den. Nunu rlagy ñi nu cyiiñ yu tub mod nu cue' gat loy nu nac de coz nu ricy yu. 10Rlagy ñi gac preb dey. Orze' despuees, benu wayu' falt ni dey, orze' gaze' nu cyiiñ dey nu gac yu ayudant. 11Ni' zi'l mñaa dey rlagy ñi nu gac dem mbecy nu rca lagy losa' lo. Nunu cue' gac dem mbecy nu rnii rishcuen. Rlagy ñi nu gac dem mbecy nu zu cuidad nu nac ub. Nunu rlagy ñi gyicy paa dem nu dela coz nu gyicy mi. 12De ayudant rlagy ñi nu gyicy paay nu tub zi'l biñ nu nac mñaay. Nunu rlagy ñi nu nap gyub ic yu de i'ñ yu, nu de' zir mbecy nu yu' yu'y. 13Benu de ayudant nap gyub ic dey riiñ nu bdugyiy, orze' ca lagy mbecy lo dey. Orze' wadzib lagy la dey nu shaal yu de riidz nu ricy cup yu consuel lo, de riidz nu rnii coz ni Jesucrisht. 14Na ya̱ drish lo̱ nu gac yap güi̱i̱ gyiilya̱ ru, tees na ca̱a̱ gyicy ii zeeda̱ lor, 15gun ze' benu wac yap gyiilya̱, bi neñ ru lac mod gyicy de mbecy ni Ñgyoozh nu de losa'y, gun de mbecy ze' nac dey mbecy ni Ñgyoozh mbañ. De yu ze' yu nu ricy cup consuel lo Crisht, nunu de yu ze' gzu fert dey nu de riidz rishli nim. 16Rishli gaal dzi coz ily de riidz nim nu gal na briic mi nu gad lagy den. Riidz ze', nde' nu: Crisht gush mi cuerp ni mbecy, nunu bruu zac mi gyishlombecy ii. Orze' Espiriit Yon ni Ñgyoozh bicy mi nu byu' bee nu nac mi biñ nu sac ni tub la falt ni. De anc bzaac dey mi. Orze' brush las riidz nu rnii de coz nu bicy mi lat zañ nac mbecy. Orze' bicy cup mbecy consuel lom zañ lugaar ni gyishlombecy. Nunu despuees ni de nu nde', pshupa' Ñgyoozh mi gyibaa. De nde' de riidz nu gal tiem na briic Ñgyoozh nu gad lagy den.

will be added

X\