1 Timoteo 2

1Nu loga la rne̱e̱ lo de mbecy ni Crisht nu ricy ñi presis nu zaab cyiñ la dey dela coz nu cyiiñ ni mbecy lo Ñgyoozh. Nunu ricy ñi presis nu nii nu dey mi. Ricy ñi presis nu cyiñ dey lom par dela mbecy. Nunu ricy ñi presis nu cuic dey gras nim. 2Cyiñ dey lom nu nac de mbecy nu riib ic. Nunu cyiñ dey lom nu nac dela de fushtiz. Cyiñ dey lom tub mod nu locyuub ñi dela mbecy. Gun orze' gusht cyiiñ den, nunu chu'n nu gyel ri zu lat nu gyicy na coz nu rlagy Ñgyoozh, gal nu coz nu se'ñ. 3Rlagy ñi nu cyiñ ru lom nu nac dela mbecy, gun nde' coz nap nu gyicy ru, nunu nde' coz nu gyicy ñi nu gyet lagy Ñgyoozh, biñ nu co mbañ de ub na. 4Gun mi ze' rlagy mi nu ruu mbañ dela mbecy, nunu rlagya'm nu dela mbecy gad lagy dey riidz nu rishli nim. 5Gun zu tub zi Ñgyoozh par dela mbecy. Nunu zu tub zi biñ nu mne' ic ni de mbecy lo Ñgyoozh. Biñ nu mne' ic ze', mi ze' Jesucrisht. Nunu laab ub mi nac mi mbecy. 6Gun Jesucrisht pshet ic mi nu gut mi par nu briish mi cyi dela mbecy. Ornu pshuub tiem nu gut mi, orze' nde' blyuuñ lo de mbecy nu Ñgyoozh rlagy mi nu gruu mbañ dela mbecy. 7Nde' nu ya̱ bdugyi̱ nu naca̱ tub aposht, nunu naca̱ tub yu nu rshaal laab de riidz ze'. Nunu bdu'm riiñ ya̱a̱ nu lyu̱u̱ lat dela mbecy nu walab mbecy Israeel de riidz rishli ni Ñgyoozh. Nunu ya̱ rishli rne̱e̱, walab nu rgu̱u̱. 8Nde' nu ya̱ rlagya̱ nu de yu gyeey nu yu' dela lugaar shes nañ dey yaay ornu nii nu dey Ñgyoozh. Nunu yaay nu shes nañ yu ze', nde' rlagy ñi nu yaa mbecy nu wayicy cyi. Rlagy ñi nu gac yu mbecy nu wagazi lagy. Rlagy ñi gac yu mbecy nu wagnii deet. 9Ze' de biñ mñaa rlagy ñi nu mod nap gzu dem shab mi. Rlagy ñi gzu dem negy nu a̱' le' byaa, nunu rlagy ñi nu raso̱o̱ gzu dem shab mi. Ornu gzu cyudz dem, orze' rlagy ñi nu cue' le' gyicy nap dem gyich toom. Rlagy ñi nu cue' nu dzi dii dem ub mi nu or, nu urndub nu dzi sac, o nu negy nu dzi ñgyup sac. 10Walab nde' mod nu gyicy dem nu cyit nam, sinu coz nap nu gyicy dem, nde' gyicy ñi nu cyit nam. Nde' mod nu rlagy ñi par biñ mñaa nu nac ni Ñgyoozh. 11Orze' de biñ mñaa rlagy ñi nu gzuub gyidag dem de riidz nu rdulyuu lat de mbecy ni Crisht. Rlagy ñi nu “O” nii dem nañ lardoom, tees cue' la grib riidz ru'm. 12Ya̱ warica̱ rishbeey nu lyuu biñ mñaa lat mbecy zigy. Nunu warica̱ rishbeey nu gyub ic dem lat de yu gyeey. Sinu rlagya̱ nu ri gzub dem. Cue' gniim. 13Gun Adaang, yu ze' psa' lagy Ñgyoozh yu loga la. Gaze' nu despuees psa' lagy mi Eva. 14Nunu walab Adaang bguu nuras yu, sinu Eva. Na ornu bi bguu nuras mi na, orze' bet lag mi lo cyi. 15Tees na de biñ mñaa gruu nap mi, ornu gaal mi mdoo, benu zaab gyicy cup lam consuel lo Ñgyoozh, nunu zaab caa lam de mbecy, nunu zaab gyicy lam coz nu gyedzu' lagy Ñgyoozh, nunu gac dem mbecy raso̱o̱.

will be added

X\