1 Timoteo 1

1Ya̱ Baly naca̱ tub aposht, tub yu nu rded riiñ ni Jesucrisht. Ya̱ byaca̱ aposht, gun ni bicy Ñgyoozh, biñ nu co mbañ de ub na. Nunu ni' zi'l Jesucrisht, biñ nu drish lo den lo, mi ze' bicy mi nu byaca̱ aposht. 2Orze' Timoteo, ya̱ ca̱a̱ gyicy ii nu zeeda̱ ñii lor. Ru nar gal nu na yu feñ ne̱ nu nac nu ya̱ bicya̱ nu fert zir ricy cup ru consuel lo Crisht. Orze' Ñgyoozh Uz den nu Shuaan den Jesucrisht gyicy mi faboor nu nap gyicy num ru, nunu gashni lagy mi ru, nunu gyicy mi nu cheti ri añ nir. 3Lat nu pcyiiñ na Éfeso, ornu bi zu̱ la̱ nu cha̱ par Macedonia, orze' mne̱e̱ lor nu ricy ñi presis nu gyiyeeñ ru Éfeso, gun orze' gac niir lo ca na de mbecy nu cue' lyuu dey de coz fals. 4Mnii lo dey nu laa yaay de riidz nu bloo ic mbecy zi'l ze', gal nu de lisht nu ta' nu la de gyitoo bel ni dey. Gun de nu nde', tub lo zi'l nu ricy ñi nu ro zi mbecy riidz nu losa'y. De coz ze' walocyuub ñi nu “O” nii mbecy ni de coz nu rlagy Ñgyoozh nu nac nu gyicy cup dey consuel lo Crisht. 5Rlagy ñi nu gyicy dey gal nu rne̱e̱, gun orze' ca tub ca tub zi'l dey losa'y. Rlagy ñi ca dey losa'y gal nu ricy mbecy nu caacy lardoo, gal nu ricy mbecy nu sac nu gat lo nu nac coz nu ricy yu, gal nu ricy mbecy nu ricy cup consuel lo Jesuuz nu dutuub la lardoo. 6Nde' nu la be mbecy gudza dey nez nu rlagy ñi nu chay. Orze' nde' nu nac nu riidz ton zi'l ro dey. 7Rlagy dey gac yu mbecy nu rlyuu leey nu bzeeñ Moisees, tees ni ub dey wagyet lag yu cuen de coz nu rniiy. Nunu de riidz nu fert la zu dey nu rshaal yu, ni' wagyet lag yu cuen. 8Rad lagy den nu leey ni Moisees, nde' coz nap benu gyicy duñ ñi gal mod nu rlagy ñi. 9Rlagy ñi gad lagy den nu Ñgyoozh briic mi leey walab par nu chañ contr ni mbecy nu sac falt ni, sinu par nu chañ contr ni mbecy nu yu' falt ni, par de mbecy nu wagyicy yac coz nu rnii leey, par de mbecy nu wacsuub gyidag ni Ñgyoozh, par de mbecy nu shiñ ricy, par de mbecy cyi, par de mbecy nu waca lagy lo Ñgyoozh, par de mbecy nu waca Ñgyoozh, par de mbecy nu rut uz, par de mbecy nu rut ñaa, par de mbecy nu rut losa', 10par de mbecy nu ral losa' nu wanchelaa, par de mbecy nu ricy losa' gyeey par biñ mñaa, par de biñ mñaa nu ricy losa' mñaa par yu gyeey, par de yu nu rut losa' nu tiñ, par de mbecy rguu, par de mbecy nu rnii cyoozh, orze' despuees rguuy. Par dela de mbecy nu ni ricy ze', za leey ze' contr ni dey. Nunu de riidz ni Ñgyoozh rniiñ nu yu' coz nu wac gyicy na. Benu mbecy gyicy yu de coz ze', orze' za ga' leey contr niy. 11Dela de coz ni leey nu rne̱e̱ ii bruuñ lo de riidz nap ni Jesucrisht. Nunu dela riidz nap ze', Ñgyoozh Yon bicy mi nu rad lagy na. Nunu riiñ nu briic mi nu gyicya̱, nde' nu tush lasa̱ de riidz nap ze'. 12Ya̱ tona' la drica̱ gras ni Shuaan den Jesucrisht, gun bicy mi ya̱ par mbecy nu ricy paa, nunu nde' nu bdu'm riiñ nim ya̱a̱. Nunu laab ub mi locyuub mi ya̱ nu gyicya̱ riiñ ze'. 13Ni bicy num ya̱ mas shiñ bicya̱ gulas. Mne̱e̱ riidz nu gua contr nim. Psheed zi̱ de mbecy nim. Nunu mne̱e̱ zi nim. Tees gushni lagy mi ya̱, gun gyel ton zi'l bicya̱ nde', nunu tiem ze' nigul gyicy cupa̱ consuel lom. 14Orze' Shuaan den Jesucrisht bicy mi tub faboor ily num ya̱ nu dzi nap bicy num ya̱. Orze' nde' nu na bi ricy cupa̱ consuel lo Jesucrisht, nunu rca̱m. Ni ricya̱ nu nac nu nac du̱ Jesucrisht. 15De riidz nu rne̱e̱ na, nii coz nu segur la, nunu dela mbecy rlagy ñi cheña lagy dey niñ. Riidz ze', nde' nu Jesucrisht biid mi gyishlombecy ii, gun orze' co mbañ mi de mbecy cyi. Orze' lo dela de mbecy cyi, ya̱ naca̱ mbecy cyi ga' zir. 16Nde' nu Ñgyoozh gushni lagy mi ya̱, gun orze' gac lyuu Jesucrisht ni de mbecy nu tona' la ricy cup mi pase̱z num dey. Gun mas ya̱ naca̱ tub mbecy cyi zub lo zir, tees nu nac ya̱, orze' sya' de' zir de mbecy nu bi ca lo cuen nu gyicy cup consuel lom. Orze' cui mbañ dey tub la. 17Orze' rlagy ñi nu ca lagy den lo biñ nu riib ic, nunu rlagy ñi nu gyabic den gyel mbecy nim tub la. Mi ze' biñ nu mbañ tub la. Mi ze' biñ nu wacsac na. Tub zi lam nac mi Ñgyoozh nu rishli. ¡Laab ni gac ñii! 18Timoteo, ru nar gal nu na tub yu feñ ne̱. Orze' ya̱ rdu̱' riiñ ii yaar laaba' gal nu mnii de yu nu mnii por cuen ni Ñgyoozh nu nac ru. Gun orze' fert la char contr ni de mbecy nu rlyuu coz fals. 19Orze' lat nu gyicy ru de coz ze', ni' zi'l bicy cup consuel lo Jesuuz. Nunu tub lo zi'l de coz nu rad lagy ru nu se'ñ, de nde' bicy, gun yu' la be mbecy nu bicy lay coz a̱' nap nu mnii too dey. Orze' nu mnu dey consuel nu bicy cup yu. 20Lat de yu ze' bruu Himeneo nu Alejandro. De yu ze' bi bgu̱' dey yaa nuras nu gyicy ras nuy dey, gun orze' sya' dey nu cue' nii dey riidz nu za contr ni Ñgyoozh.

will be added

X\