1 Tesalonicenses 5

1Der bicy na, walagy ñi zeeda̱ tub gyicy lo der nu nac nu la dzi o la or gac de coz ze', 2gun de ru nap rad lagy der nu dzi nu cyid Shuaan den Jesuuz tuuba' tir cyid ñi gal nu ryiid tub gubaan rel. 3Ornu gnii de mbecy: “Sac la gyel deet. Ri zu”, orze' sij la ru'ña gyel zi lo dey. Sij la gzac dey gal nu rzac tub biñ mñaa ornu bi gaal mi mdoo. Wada' la mod nu ruu chu dey loñ. 4Der bicy na, de ru walab nu na der gal nu na de mbecy nu rded ze' nu cow, nunu dzi nu cyid Shuaan den tuuba' tir, nde' wac ñi nu largut la der gal ricy tub gubaan. 5Dela de ru na der gal nu na mbecy nu rded ze' nu yu' yaa. Na der gal nu na mbecy nu rded orwidoo. Walab nu na der gal nu na mbecy nu rded rel o ze' nu cow. 6Nde' nu walagy ñi nu gac den gal nu na de mbecy nu nas, gal nu ricy de' zir mbecy, sinu rlagy ñi nu zu ga lagy den, nunu gzu den altant. 7De mbecy nu raas, raas dey rel. Nunu de mbecy rzugy, rel rzugy dey. 8De ub na nac naa mbecy nu rded or widoo. Orze' rlagy ñi nu gzu den altant. Gun benu gyicy cup der consuel lo Ñgyoozh nu nac nu rca der mi, orze' nde' nañ gal nu na tub cyug nu rsoow too der, gun cue' nu gad güii too der. 9Gun Ñgyoozh wansum den par nu chan lo cashtig nim, sinu bzum den par nu gruu mbañ naa nu nac Shuaan den Jesucrisht. 10Jesucrisht gut mi par nu nac de ub na, gun orze' mas cui mbañ na, o mas gat na, tees gyan cyiiñ dun mi. 11Nde' nu briic der baloor ni losa'r, nunu blocyuub losa' der nu gyafert yu gal nu bi ricy der na. 12Der bicy na, de̱ ya̱ rnishba̱a̱ de̱ lo der nu ca lagy der lo de yu nu ricy riiñ ni Crisht lat der, de yu nu riib ic, de yu nu rshuu nu de ru. 13Rlagy ñi ca lagy der loy, nunu ca der yu nu nac de riiñ nu ricy dey. Nap gu' nu der losa'r. 14Der bicy na, de̱ ya̱ rnishba̱a̱ de̱ lo der nu niir lo de mbecy sed nu cue' gazed dey. Briic der baloor ni de mbecy dzidz. Nunu blocyuub der de mbecy shni. Bicy cup der pase̱z nu dela mbecy. 15Rila cue' gyicy gal ga der. Sinu dub laa tiem bloo lo der nu nap gyicy nu der losa'r, nu dela de mbecy. 16Dub laa tiem bicy der nu zu cyit lagy ru. 17Zaab mnii nu la der Ñgyoozh. 18Briic der gras ni Ñgyoozh mas la zi'l coz nu rzac der, gun nde' coz nu rlagy mi nu gyicy der gyi' nu nac der mbecy ni Crisht. 19Cue' gyicy der nu checa Espiriit Yon ni Ñgyoozh nu gyicy mi riiñ lat der. 20Nunu cue' gyicy zet lagy der lo de riidz ni Ñgyoozh nu rshaal dey lat der. 21Gush der shcab nu nac ñii ben a rishli. Orze' “O” mnii der ni de riidz nap, 22tees bzu chu der de lo la de coz a̱' nap ze'. 23Orze' Ñgyoozh, biñ nu rbic gyel ri zu nañ lardoon, gyicy mi nu de mod la gac der mbecy cacy, nunu gyicy mi nu dela lugaar ni der sac falt niñ ornu cyid Shuaan den Jesucrisht tuuba' tir: gaza' espiriit ni der, gal nu lardoo der, gal nu cuerp ni der. Delañ sac falt niñ. 24Orze' segur la ni gyicy Ñgyoozh, biñ nu bzu der nu gac nim, gun dub laa tiem mi ze' ricy paam. 25Der bicy na, ni' zi'l bdiiñ der lo Ñgyoozh nu nac de̱ ya̱. 26Dela der mnii ñgyoozh nu rishnap nu de bicy ru nu nac Crisht. 27Ya̱ rnishba̱a̱ lo der por cuen ni Shuaan den Jesucrisht nu lab der lo gyicy ii lo dela de bicy na. 28Shuaan den Jesucrisht gyicy mi faboor nu nap gyicy num der.

will be added

X\