1 Tesalonicenses 4

1Na der bicy na, como de̱ ya̱ nac de̱ mbecy nu rnii por cuen ni Shuaan den Jesuuz, rnishba̱a̱ de̱ lo der, nunu du̱' de̱ riiñ yaa der nu zaab chesa lar mod nu blyu̱u̱ de̱ ni der, tub mod nu ganap lagy Ñgyoozh, gal nu bi ricy der na. 2De ru bi rad lagy der de coz nu mnii Shuaan den Jesuuz nu blyu̱u̱ de̱ ni der. 3Ñgyoozh rlagy mi nu chesa der mod ni mbecy nu sac falt ni. Nunu rlagy mi nu cue' gal ni tub la der mbecy nu wanchelaar. 4Tub ga la der rlagy ñi nu gad lagy der lac mod gyicy nur mñaar. Gyicy nur ñii tub mod nu nap par lo Ñgyoozh, gal nu mod nu se'ñ. 5Cue' nu nii toor nu gyicy ru tub mod nu a̱' yad ñi nu gyicy ru nur ñii, gal nu ricy de mbecy nu a̱' yu' lo Ñgyoozh. 6Orze' ni tub la mbecy walagy ñi gyicy ras nuy bicy yu nu nac Crisht. Ni walagy ñi nu gyicy yu gan losa'y nu nac asunt ni biñ mñaa. De̱ ya̱ bi bdo̱o̱ de̱ rishlo der nu Ñgyoozh cuic mi cashtig ni de mbecy nu ni ricy. 7Gun Ñgyoozh wansum de ub na nu gac naa mbecy nu ral losa' nu wanchelaa, sinu bzum de ub na nu gac naa mbecy cacy. 8Orze' cyu zi'l mbecy nu washet ic nu gyicy gal nu rdunii ii, yu ze' walab nu wacshet ic yu de coz nu rnii mbecy zi'l, sinu washet ic yu nu gyicy yu de coz nu rnii Ñgyoozh, biñ nu rbic Espiriit Yon nim ni den. 9Walagy ñi zeeda̱ gyicy lo der par nu gad lagy der nu car de bicy ru nu nac Crisht, gun laab Ñgyoozh bi blyuum ni der nu ca tub ca tub zi'l der losa'r. 10Tees ni bicy der nu dela de bicy na nu yu' lo de yu ni Macedonia. Nde' nu der bicy na, de̱ ya̱ rnishba̱a̱ de̱ lo der nu tub dzi ga pca zir der losa'r. 11Bicy der nu nap chu'r nu losa'r. Nunu cue' ne' ru' der lat asunt ni mbecy. Nunu zaab bicy la der riiñ nu gad nu gow der. De nde' riiñ nu bdu' de̱ yaa der anzir. 12Ni mod bicy der, gun orze' ca lagy de mbecy nu walab mbecy ni Crisht lo der, nunu orze' wayicy falt ni tub la coz ni der. 13Der bicy na, walagy de̱ nu gac der mbecy nu shtee la nu nac coz nu gzac de mbecy nu bi gut, gun orze' cue' nu gyicy shni der gal nu ricy de mbecy nu wacyish lo nu gyabañ. 14Gun de ub na rzeña lagy den nu Jesuuz gut mi, nunu byabañ mi. Nunu nde' nu Ñgyoozh gyicy mi nu cyid Jesuuz tuuba' tir. Cyid num de yu nu bi gut nu bicy cup consuel lom. 15Na ne̱e̱ lo der gal nu blyuu Shuaan den Jesuuz ne̱ de̱. De mbecy nu yu' lat den nu gabee mbañ ornu shuub dzi nu cyid Shuaan den Jesuuz tuuba' tir, waya ga dey lo par de yu nu bi gut. 16Gun gzab ti' nu rbish ti, nunu gnii anc zub lo, nunu dulaa trompet ni Ñgyoozh. Orze' laab Shuaan den Jesuuz gruum gal gyibaa gyet gash mi. Orze' nu loga la de mbecy nu bicy cup consuel lo Crisht gyabañ dey. 17Orze' despuees de yu nu gabee mbañ gyes nañ dey lo bi tublaazh la nu de yu nu byabañ ze'. Gya dey lat za. Gun orze' dzeel den Shuaan na Jesuuz baa. Orze' cyiiñ du den mi tub la. 18Orze' briic der baloor ni losa'r nu nac de riidz ii.

will be added

X\