1 Tesalonicenses 2

1Der bicy na, de ru rad lagy der nu wangyap leew de̱ lat der. 2Rad lagy der nu anzir nu yap de̱ lat der, orze' bri̱ de̱ Filipos. Orze' ze' gugy zi dey de̱ ya̱, nunu shiñ bicy nu dey de̱ ya̱. Tees Ñgyoozh blocyuub mi de̱ nu wanchib la de̱ pshaal la̱ de riidz nu sac ni Crisht lo der, mas zigy mbecy guay contr ne̱ de̱. 3Gun walab nu rshaal de̱ riidz ni Ñgyoozh nu nac de̱ mbecy nu radza. Ni walab nu rshaal de̱ riidz nim par nu gad mod nu gyicy de̱ gan losa̱'. Ni walab nu rshaal de̱ riidz nim par nu gad mod nu gu̱u̱ de̱ losa̱'. 4Orze' lugaar nu ni gyicy de̱, ca nu bicy Ñgyoozh de̱ par mbecy nu cyiiñ. Orze' bdu'm riiñ ya̱a̱ de̱ nu shaala̱ riidz nu sac nim. Orze' ni mod rshaal de̱ de riidz ze'. Walab nu gyicy de̱ mod nu gyet lagy mbecy, sinu gyicy de̱ mod nu gyet lagy Ñgyoozh, biñ nu rad lagy la na lardoo dela den. 5Nap rad lagy der nu walab nu mne̱e̱ de̱ riidz nu cyit zi'l za lo der. Ni walab nu mne̱e̱ de̱ riidz par nu soow ñi lo gyel ye rzac ne̱ de̱. Ñgyoozh rad lagy mi nu nde' rishli. 6Rila wanyub de̱ mod par nu gyicy zily ni tub la mbecy de̱ ya̱: ni de ru, ni reña' mbecy. 7Mas yad ñi nu ne̱e̱ de̱ lo der nu gyabic der gyel mbecy ne̱ de̱, gun nac de̱ aposht ni Crisht, tees guc de̱ mbecy gugy na du̱ der. Bicy du̱ de ru gal nu ricy tub biñ mñaa nu de yu nguzh mi' nim. 8Par nu nac nu dzi rca̱ de̱ de ru, bi bzu lily de̱ walab tub lo zi'l nu shaal de̱ de riidz nu dzi sac nu bruu lo Ñgyoozh, sinu ni' bzu lily de̱ nu gyicya̱ la zi'l coz nu rlagy ñi par nu glocyuub de̱ de ru nu nac nu tona' la rca̱ de̱ der. 9Der bicy na, segur la yeza' lagy der nu dzi fert bicy de̱ riiñ par nu gad coz nu da̱w de̱. Dzi rel la bicy de̱ riiñ par nu cue' ñgyicy zeed de̱ ni tub la der lat nu rshaal de̱ de riidz nap nu bruu lo Ñgyoozh lat der. 10De ru, nu Ñgyoozh rad lagy der nu de mod nu bicy du̱ de ru, mbecy nu ricy cup consuel lo Crisht, nde' tub mod nu nap, tub mod nu laab ñi, tub mod nu sac falt ni. 11De ru rad lagy der nu bicy du̱ der gal nu ricy tub mbecy nu i'ñ yu. 12Bric de̱ baloor ni der. Bric de̱ consuel ni der. De̱ ya̱ zaab rne̱e̱ la̱ lo der nu chesar gal nu rlagy Ñgyoozh, biñ nu blo su de ru par nu gzac der lo gyel gubier nim, gal nu gyel lily nim. 13Nu nac de nde', zaab dric la̱ de̱ gras ni Ñgyoozh, gun ornu güeñ der de riidz nim nu byap shaal de̱ lat der, orze' “O” mnii der. Bicy der ñii par riidz ni Ñgyoozh, walab riidz ni mbecy zi'l, gun laab rishli riidz ni Ñgyoozh nac ñii. Gun Ñgyoozh ricy mi coz nap nañ lardoo de ru, mbecy nu ricy cup consuel lom. 14Der bicy na, laaba' coz nu bzac de ru laaba' coz ze' nu bzac de mbecy ni Ñgyoozh nu yu' lo de yu ni Judea, de yu nu nac ni Jesucrisht. Pshet zi de mbecy Israeel de yu ze', laaba' gal nu pshet zi de losa'r de ru. 15De mbecy Israeel biit dey de yu nu mnii por cuen ni Ñgyoozh gulas, nunu biita' dey Shuaan den Jesucrisht, nunu pcyuu nu dey de̱ ya̱. De yu ze', wagyedzu' lagy Ñgyoozh lo dey, nunu za dey contr ni dela mbecy. 16Tees ornu rlagy de̱ ne̱e̱ lo de mbecy nu walab mbecy Israeel, par nu ni' gruu mbañ dey, bicy pee dey nu ncay ne̱ de̱ nu cue' ni ñgyicy de̱. Orze' ni mod bicy dey nu psa' la dey suuy nu nac cyi. Orze' na Ñgyoozh bi bzeed mi cashtig nim too dey. 17Der bicy na, ornu bla' losa' den tub tiem, mas wansac de̱ de ru, tees nañ lardo̱o̱ de̱ rniiñ nu yu' der, nunu tona' la bloo lo̱ de̱ nu yuba̱ mod nu gzaca̱ de ru lo nu loo la. 18De̱ ya̱ ngulagya̱ nyapa̱ lo der. Nunu ub la ya̱, Baly, bicy pe̱e̱ nyapa̱ lo der zañ tir. Tees nuras wansaan yu. 19Gun ¿cyu ñuu gyicy nu yet lagy de̱? ¿Cyu ñuu gyicy nu nap zu lagy de̱ benu walab de ru ornu cyid Shuaan den Jesucrisht tuuba' tir? 20Gun laab nu nac de ru nap zu lagy de̱, nunu yet lagy de̱.

will be added

X\