1 Tesalonicenses 1

1Ya̱ Baly, gal nu Silvano, gal nu Timoteo zeed de̱ gyicy ii lo der bicy na nu nac Crisht nu yu' gyedz Tesalónica, de ru mbecy ni Ñgyoozh, Uz den, gal nu Shuaan den Jesucrisht. Ñgyoozh gyicy mi faboor nu nap gyicy num de ru, nunu gyicy mi nu cheti ri añ ni der. 2Dub laa tiem dric de̱ gras ni Ñgyoozh nu nac dela der, nunu rzat de̱ de ru lat nu rne̱e̱ du̱ de̱ Ñgyoozh. 3Nunu lat nu rne̱e̱ du̱ de̱ Ñgyoozh Uz den, ryeza' lagy de̱ de coz nu ricy der nu nac nu ricy cup der consuel lom, gal nu de riiñ nu ricy der nu nac nu dzi rca der mi, gal nu lac mod ragyee der ornu rzac zir nu nac nu rgyish lo der lo Shuaan den Jesucrisht. 4Der bicy na, Ñgyoozh rcam de ru, nunu rad lagy den nu bi pcuim der nu gac nim. 5Tees ornu pshaal de̱ de riidz nu sac ni Crisht lat der, walab riidz zi'l mne̱e̱ de̱, sinu bicy de̱ nu gad lagy der de coz ily nu ricy Espiriit Yon ni Ñgyoozh, nunu bric de̱ nu gad lagy der nu zeña lagy nap la de̱ nu de riidz ze', nde' coz rishli. De ru nap rad lagy der mod nu gusa̱ de̱ lat der. Byub de̱ tub mod nu nap par de ru. 6Ze' de ru bicy der gal mod nu bicy de̱ ya̱ nunu gal mod ni Shuaan den Jesuuz. Nunu Espiriit Yon ni Ñgyoozh bicy mi nu tona' la bet lagy der ornu pshet ic der ni de riidz ze' mas tona' la bzac zi der nu nac ñii. 7Nde' nu briic der nu gad lagy dela mbecy nu ricy cup consuel lo Crisht nu yu' lo de yu ni Macedonia, gal nu de yu nu yu' lo yu ni Acaya nu lac mod gyicy dey. Briic der nu gad lagy dey nu lac mod gyicy dey nu nac mod nu bicy de ru. 8Walab tub lo zi'l nu brush las de riidz ni Shuaan den Jesucrisht lo de yu ni Macedonia nu Acaya, nu nac de ru, sinu ni' dela lugaar zaab riidz nu lac mod ricy cup der consuel lo Crisht. Nde' nu walagya'ñ nu gne̱e̱ de̱ ni tub la riidz. 9Dela mbecy ze' rnii dey nu dzi nap bicy nu der de̱ ya̱ ornu bri̱ de̱ lat der. Nunu rnii dey nu bi guca der nu driib zily ru nab. Orze' brugyi' nu ricy der de coz nu rlagy biñ nu rishli nac Ñgyoozh, biñ nu mbañ. 10Nunu ni' rnii ga' dey nu rbez der Jesuuz, I'ñ Ñgyoozh, biñ nu bicy mi nu byabañ. Rbez der mi gal ornu ruum gyibaa cyid mi tuuba' tir. Mi ze' biñ nu co mbañ de ub na lo cashtig ni Ñgyoozh.

will be added

X\