1 San Pedro 4

1Orze' como Crisht bzac zim nu cuerp nim, orze' ni' zi'l de ru bzu der tub shcab nu gzac zi der benu galagy ñi, gun cyu zi'l mbecy nu rzac zi, yu ze' bi bruu chuy lo cyi. 2Ze' par lo na, rlagy ñi nu cyiiñ der mod nu rlagy Ñgyoozh. Cue' gal mod nu rlagy de ub ru. 3Gun bi guzañ tiem nu de ru ni' zi'l bicy der laab de coz nu ricy de mbecy nu a̱' yu' lo Ñgyoozh. Lat nu gusa der gulas, orze' bicy der de lo la coz nu druu nañ lardoor. Nunu bgyiiñ lagy der lo de coz a̱' nap. Nunu bzugy shaad der gal ze' wagaca' la. Nunu bicy der sa' a̱' nap. Nunu go' der gashtal wancuica' la der raso̱o̱. Nunu briib zily der nab a̱' nap. 4Na ornu de mbecy nu a̱' yu' lo Ñgyoozh rzac dey nu wachesa nu der dey ornu ricy dey de coz a̱' nap ze', orze' rza nu ic dey nunu rnii ziy ni der. 5Tees ni' de yu ze' rlagy ñi nu zeed cuen dey de coz nu ricy yu lo Ñgyoozh, biñ nu bi zu lily nu gri bee ni de mbecy nu bi gut, gal nu de mbecy nu gabee mbañ. 6Tees Crisht gua shaal mi de riidz nu sac nim lat de mbecy nu bi gut, gun orze' Espiriit Yon nim gyicy mi nu cui mbañ dey gal nu Ñgyoozh mbañ mi. Nomaas lat nu pcyiiñ dey gyishlombecy nu cuerp niy, orze' Ñgyoozh briic mi cashtig ni dey gal nu ricy num de' zir de mbecy. 7Bi yad gaab tiem nu gya' lo dela de coz. Nde' nu dela de ru bzu der altant, nunu bicy der mandaar ub ru, gun orze' gac nii nu der Ñgyoozh. 8Coz nu ricy zir ñi presis, nde' nu tona' la ca der losa'r, gun benu rca der losa'r, orze' gyicy sulagy der dela cyi zañ nu ricy yu. 9Dela der, ornu ryiid mbecy yu'r, orze' bgu' dey nañ yu', nunu nap bicy nu der yu. Nunu cue' nid ru' der ornu ni gyicy ru. 10Orze' tub ga la der bicy paa nu riiñ nu briic Ñgyoozh nu cyiiñ der nu gyicy ru. Tub ga la der bicy riiñ nu guud lo Ñgyoozh par nu locyuub der de' zir de losa'r. 11Ornu tub mbecy rniiy lat de mbecy zigy, orze' rlagy ñi shaal yu riidz ni Ñgyoozh. Benu tub mbecy rlagy yu nu locyuub yu losa'y, orze' rlagy ñi nu gyicy yuñ nu dela fers niy nu rbic Ñgyoozh. Dela coz nu gyicy der bicy der ñii par nu gyed gyel mbecy ni Ñgyoozh nu nac Jesucrisht. Mi ze' tona' la lily nam, nunu nac mi biñ nu gac gyicy dela coz tub la. ¡Laab ni gac ñii! 12De ru bicy na nu dzi rca̱, cue' cha nu ic der ornu gzac ru lo de preb nu dzi gatow. Nunu cue' nii too der nu nde' tub gyel zi nu a̱' zac mbecy. 13Lugaar nu cha nu ic der, orze' bet lagy der, gun gal nu bzac zi Crisht, ni' zi'l zac zi ga' de ru, gun orze' tona' la gyet lagy der ornu gruu zac Crisht tuuba' tir nu gyel lily nim. 14Dzi ni der benu tub mbecy gab ziy der par nu nac Crisht. Gun orze' Espiriit Yon ni Ñgyoozh, biñ nu dzi lily na, zaab rded nu laam de ru. 15Orze' cue' nu gzac zi ni tub la der nu nac der mbecy nu rut losa', o nu nac der mbecy nu ricy gubaan, o nu nac der mbecy nu ricy cyi, o nu nac der mbecy nu rne' ru' lat asunt ni losa'. 16Ze' benu rzac zi der gyi' nu nac der mbecy ni Crisht, orze' cue' gat lo der, sinu byabic der gyel mbecy ni Ñgyoozh par nu rnii dey nu nac der mbecy ni Crisht. 17Bi yad shuub tiem nu Ñgyoozh gri beem. Orze' nu loga la gri beem ni de mbecy nim. Orze' dzi zir fert gri beem ni de mbecy nu wansuub gyidag de riidz nim. 18Orze' benu dzi fers gruu mbañ de mbecy nap, orze' dzi ga' zir fert gyicy num de mbecy a̱' nap gal nu de mbecy cyi. 19Orze' ni' zi'l mod par de mbecy nu rzac zi, gun nde' coz nu rlagy Ñgyoozh. Orze' de yu ze' rlagy ñi nu zaab gyicy la dey de coz nap. Nunu gu' dey ub yu yaa Ñgyoozh, biñ nu psa' lagy dey. Nunu nac mi biñ nu ricy paa.

will be added

X\