1 San Pedro 3

1Na de ru biñ mñaa, ni' zi'l rlagy ñi nu “O” nii der ni ñgyeer, gun benu nac yu mbecy nu wagyicy cup consuel lo de riidz nu sac ni Crisht, orze' ornu gzac yu de mod nap nu ricy der, orze' dzi ga guugy lardooy. Orze' gyicy cup yu consuel. Orze' ni walagy ñi nu niir ni tub la riidz, 2gun ornu gzac yu nu nap ricy der, nunu ca lagy der lo Ñgyoozh, orze' guugy lardooy. 3Nunu cue' cyish lo der lo coz nu rabee par ich nu gyacyit nar. Ni walagy ñi nu ti laca' la gyicy nu der gyich toor. Ni walagy ñi nu zaab der bec or de lugaar ni cuerp nir. Ni walagy ñi nu zu der negy nu dzi ñgyup sac. 4Nap zir nu bicy der nu nac ru mbecy cyit na nu nac mod nu na nañ lardoo der. Na benu gugy na der, nunu benu rag zi'l zu lagy der nañ lardoor, orze' nde' nañ gal nu na bec cyit na nu rila waded ni. Nunu nde' tub coz nu tona' la sac par lo Ñgyoozh. 5Ni mod bicy de biñ mñaa ni Ñgyoozh nu gu' gulas par nu bicy mi nu nap rabeem. De mi ze' bicy cup mi consuel lo Ñgyoozh, nunu bicy paa dem nu ñgyeem. 6Ni mod bicy Sara. Bzuub gyidag mi ni ñgyeem, Abraham. Orze' rniim rab mi yu “Shi Abraham”, rniim. Orze' na de ru nac der mbecy nu rsya' lo Sara benu nap ricy der, nunu benu wacchib lagy la der lo ni tub la coz. 7Na de ru yu gyeey, pcyiiñ nu der mñaar tub mod nu raso̱o̱, nunu pca lagy der lom, como ta zir na de biñ mñaa gaze' de ru. Gun ni' de mi ze' cuic Ñgyoozh nu cui mbañ mi gal nu cuic mi nu cui mbañ de ru. Ni mod bicy der, gun orze' gad mod nu nii nu der Ñgyoozh gal nu rlagy ñi. 8Laab nii la de riidz nu ne̱e̱ lo der. Rlagy ñi nu nap chu' dela der nu losa'r. Nunu rlagy ñi nu gyicy der tub zi'l shcab. Nunu pca der de losa'r gal nu rlagy ñi nu gyicy de mbecy nu de bicy yu. Nunu guc der mbecy gugy na. Nunu bicy shni der ub ru. 9Cue' shiñ gyicy nu der mbecy nu shiñ ricy nu de ru. Ornu rab zi mbecy der cue' gab zir yu. Lugaar nu gyicy gal gar, orze' nap zir nu nap bicy nuy, gun Ñgyoozh bloo sum de ru par nu nap gyicy num der. 10Gun lat de riidz ni Ñgyoozh rniiñ: Benu ca na mbecy yet lagy yu nu cyiiñ yu gyishlombecy ii, nunu benu rlagy yu nu gusht cyiiñ yu, orze' rlagy ñi nu cue' shiñ niiy, nunu cue' niiy riidz rguu. 11Bruu chu der lo de coz a̱' nap. Orze' bicy der coz nap. Byub der tub mod nu nap nu chu' nur de losa'r. Orze' nde' zaab bicy la der ñii. 12Gun Shuaan den rñam de mbecy nu nap ricy. Nunu rzuub gyidag mi ornu rnii nu dey mi. Tees zam contr ni de mbecy nu shiñ ricy. Ni Rniiñ lat de riidz ni Ñgyoozh. 13¿A grusu mbecy nu shiñ gyicy nuy de ru, ze' benu de ru dub laa tiem co lo der nu gyicy ru coz nap? 14Tees mas rzac zi der nu nac nu ricy ru coz nap, orze' ¡dzi nu der! Nunu cue' dzib der lo ni tub la mbecy. Nunu cue' sug ic der. 15Sinu pca lagy der lo Crisht, gun mi ze' nac mi Shuaan der. Dub laa tiem bzu der altant nu tush cya der riidz nu cugyi' mbecy lo der nu nac consuel nu ricy cup der nañ lardoor. 16Tees ornu tush cyar riidz ze', orze' cue' nii der riidz nu tañ za lo dey, nunu pca lagy der lo dey. Dub laa tiem bicy der coz nap, gun orze' cue' gat lo der. Gun orze' de mbecy nu nii zi ni der nu nac de coz nap nu ricy ru nu nac ru mbecy ni Crisht, orze' de yu ze' gat lo dey nu nac de riidz a̱' nap nu rnii dey. 17Gun nap zir nu gzac zi der nu nac de coz nap nu ricy ru benu nde' coz nu rlagy Ñgyoozh, gaze' nu gzac zi der nu nac de coz a̱' nap nu ricy der. 18Gun Crisht gut mi tub tir zi'l par tub la nu nac dela cyi den. Mi ze' sac cyim. Tees gut mi par de ub na, mbecy nu yu' cyi, gun orze' guud mod nu gya num de ub na lo Ñgyoozh. Mbecy bicy dey nu gut mi, tees Espiriit nim bicy mi nu byabañ mi. 19Ze' Espiriit nim blocyuub mi ub mi nu gua shaal mi riidz ni Ñgyoozh lo de espiriit nu yu' pres. 20De espiriit ze' guc ñi espiriit ni de mbecy nu gu' gulas tiem nu pcyiiñ Noé. Ñgyoozh tona' la pase̱z mi gugyeem lo dey lat nu bzaa Noé barc. Tees Ñgyoozh bicy mi nu bruu nap la be dey nu nac nis ze'. Orze' tub shuñ dey bruu nap yu. 21Nis ze', nde' muesht ni nis nu gzu nis de ru tiem na. Orze' nu nac nis ze', orze' Ñgyoozh co mbañ mi de ru. Ornu gzu nis den, nde' walab nu yaruuñ nu gyecy bid nu ta' cuerp ni den, sinu nu gzu nis na, nde' yaruuñ nu gdiñ na lo Ñgyoozh nu gyicy caacy mi nañ lardoon, nunu Ñgyoozh co mbañ mi de ub na nu nac nu byabañ Jesucrisht. 22Jesucrisht, biñ nu gup gyibaa, nunu zub mi par yaa bee Ñgyoozh, riib ic mi de anc, gal nu de' zir espiriit nu riib ic de espiriit nu dzi rcyiiñ.

will be added

X\