1 San Pedro 2

1Nde' nu blaa yaa der de lo la coz a̱' nap nu ricy der. Rila cue' guu der. Nunu cue' gac der mbecy rzuu lo. Nunu cue' gasaap lagy der. Nunu rila cue' gzat zi der losa'r. 2Guc der gal nu na mdoo nu sa gul. Bicy der nu cuigy ru lech du ub nu cyiiñ par espiriit ni der, gun orze' nu nac nde' gal shcab ni der par nu gruu mbañ ru. 3Gun rishli gaal de ru bi gud lagy nap la der nu Ñgyoozh Shuaan den dzi nap mi. 4Nde' nu becha' der lo Shuaan den Jesuuz, gun mi ze' nam gal nu na tub gyita' nu mbañ. Orze' de mbecy guzii dey nu wacyiiñ gyita' ze'. Orze' mne' dey ñii. Tees par Ñgyoozh, nde' tub gyita' nu bducui. Nunu nac ñii gyita' nu dzi sac. 5Orze' ni mod bicy der nu gac ru gal nu na gyita' ze'. Orze' Espiriit Yon nim gash mi de ru par nu shup mi yu' wedz nim. Orze' nañ yu' wedz ze' gac der uz par nu gyicy der riiñ ni ub zi'l mi. Orze' nu nac Jesucrisht cuic der gun lo Ñgyoozh, de gun nu rnii Espiriit Yon nim nu cuic der. Nde' gun nu gyedzu' lagy mi. 6Nde' nu ni' zi'l rniiñ lat de riidz ni Ñgyoozh: Ya̱ grisha̱ tub gyita' Sión gyedz ni Ñgyoozh. Nde' nac ñii tub gyita' nu ricy zir ñi presis. Nde' tub gyita' nu ya̱ pcui̱ nu gac ñii gyita' nu dzi sac. Cyu zi'l mbecy nu gyicy cup consuel lo biñ nu nac gyita' ze', orze' de mbecy ze' waruu to' loy, na Ñgyoozh lat de riidz nim. 7Par de ru mbecy nu ricy cup consuel lo biñ nu nac gyita' ze', orze' mi ze' tona' la ricy ñi presis par de ru, tees par de mbecy nu wagyicy cup consuel lom, orze' gyu' niñ gal nu rniiñ lat de riidz nim. Orze' rniiñ: Gyita' nu mne' biryu, nde' byac ñi gyita' nu ricy zir ñi presis, rniiñ. 8Ze' tuuba' lugaar rniiñ: Nde' tub gyita' nu gyicy ñi nu glagy gyi' mbecy. Nunu gyicy ñi nu gyes saa dey, rniiñ lat de riidz ni Ñgyoozh. De mbecy ze' glagy gyi' dey nu nac nu wacsuub gyidag yu ni riidz nim. Nde' tub coz nu bi ca lo cuen nu ni gzac dey. 9Ze' de ru nac der mbecy nu pcui Ñgyoozh nu gac famil nim. Nac der uz nu zu riiñ lo Ñgyoozh, biñ nu nac rey ni den. Nac der tub nac mbecy nu nac ni Ñgyoozh. Nac der de mbecy ze', gun orze' gzat der de coz ily nu ricy mi. Mi ze' biñ nu pcui de ru par nu gruu der ze' nu cow, gun orze' chu' der ze' nu yu' yaa nu tona' la cyit zu. 10De ru a̱' nac der mbecy ni Ñgyoozh gulas. Ze' na nac der mbecy nim. Gulas wangashni lagy Ñgyoozh de ru. Tees na rashni lagy mi der. 11Ya̱ rnishbaa lo der bicy na nu dzi rca̱, bicy der gal nu ricy mbecy nu walab mbecy guledz. Cue' shet ic der nu gyicy ru de coz a̱' nap nu druu nañ shcab nir, gun de coz ze' zañ contr ni espiriit nir. 12Nap bicy der lat de mbecy nu a̱' yu' lo Ñgyoozh, gun orze' mas griib dey cyi fals too der nu nii dey nu nac der mbecy shiñ ricy, tees ornu gad lagy dey de coz nap nu ricy der. Orze' gyabic dey gyel mbecy nim ornu cyid mi tuuba' tir. 13Orze' par nu nac Shuaan den Jesucrisht “O” mnii der ni dela mbecy nu nac fushtiz gyishlombecy ii. Gaza' yu nu riib ic de nasyoong, “O” mnii der nu zuub gyidag ru niy, gun yu ze' zuy riiñ ily par de' zir dey. 14Ni' zi'l “O” mnii der ni yu nu riib ic por cuen ni gubier, gun yu ze' bdugyiy riiñ par nu cuic yu cashtig ni de mbecy nu shiñ ricy, nunu par nu gyabic yu gyel mbecy ni de mbecy nu nap ricy. 15Gun Ñgyoozh rlagy mi nu nap gyicy der, gun orze' de mbecy nu wagad lagy, gal nu de mbecy ton, wad la ru' dey nu niiy nu chay contr ni der. 16Bicy der gal mod nu ricy mbecy nu riib ic ub. Mas riib ic der ub ru, tees cue' cuic der lugaar ni ub ru nu gyicy ru coz a̱' nap. Sinu bicy der tub mod nu nap zir par nu nac der mbecy nu ricy coz nu rlagy Ñgyoozh. 17Bicy der mod nu rabee nu rca lagy der lo dela mbecy. Pca der de bicy ru nu nac Crisht. Nunu nap pca lagy der lo Ñgyoozh. Nunu pca lagy der lo yu nu riib ic de nasyoong. 18De ru moz nu ricy riiñ ni mbecy, rlagy ñi nu “O” nii der ni patro̱o̱ nir nu rca lagy der loy. Cue' nu tub lo zi'l nu nap gyicy der nu de yu nu nap ricy, gal nu nu de yu nu gugy na, sinu ni' zi'l gyicy der nu de mbecy a̱' nap. 19Gun nde' tub coz nap ornu tub mbecy ragyeey nu rzac ziy ornu sac falt niy nu nac nu rad lagy yu nu nde' coz nu rlagy Ñgyoozh. 20Tees benu cuic dey cashtig ni der nu nac nu shiñ ricy ru, orze' se la la cyiiñ ñi mas gagye der nu pase̱z. Ze' benu zac zi der nu nac de coz nap nu ricy ru, nunu benu gagyer looñ nu pase̱z, orze' nde' coz nap par lo Ñgyoozh. 21Gun Ñgyoozh bzum de ru par nu gagye der lat de tiem nu gzac zir, gun Crisht bzac zim nu nac de ru. Nunu blyuum ni der lac mod gyicy ru, gun orze' gyicy der gal nu bicy mi. 22Crisht wangyicy mi ni tub la cyi. Ni wanguum ni tub la mbecy. 23Ornu gugy zi mbecy mi, orze' rila wanniim ni tub riidz. Ni wantush cyam riidz nu tañ za lo dey ornu pted zi dey mi, sinu bdu'm ñii yaa Ñgyoozh, biñ nu ri bee mod nu se'ñ. 24Laab ub la Crisht, lat nu pcam lo cruuz nu cuerp la nim, orze' za num dela cyi den, gun orze' de ub na nan gal nu na mbecy gut par lo de cyi. Orze' cyiiñ den gyishlombecy par nu gyicy na de coz nu se'ñ. Crisht gud güiim, gun orze' de ru gruu nap der. 25Gun de ru gusa der gal nu gusa shily bdune'. Tees na bi bish cya der brir lo Crisht, gun orze' mi ze' ñam de ru gal nu rña tub mbecy shily niy, nunu ca laa lom lo den.

will be added

X\