1 San Pedro 1

1Ya̱ Bed, tub aposht ni Jesucrisht, zeeda̱ gyicy ii lo de ru mbecy Israeel nu bruu ledz nu za cyiiñ reña' gyedz. Rcyiiñ der lo de yu ni Ponto, gal nu lo yu ni Galacia, gal nu lo de yu ni Capadocia, gal nu lo de yu ni Asia, gal nu lo de yu ni Bitinia. Dela lugaar ze' yu' der. 2De ru nac der mbecy nu pcui Ñgyoozh gulas, gun nde' coz nu rlagy ub mi. Espiriit Yon nim bzu chum der par nu gzuub gyidag der ni Jesucrisht, nunu bicy mi nu byecy cyi der nu nac reñ Jesucrisht. Ñgyoozh gyicy mi faboor nu ded ru' ga' la nap gyicy num de ru, nunu gyicy mi nu cheti ri añ ni der. 3Gyabic den gyel mbecy ni Ñgyoozh Uz Shuaan den Jesucrisht, gun par nu nac nu tona' la rashni lagy mi de ub na, nde' nu bicy mi nu byac den mbecy cub nu nac nu byabañ Jesucrisht, nunu nde' gyicy ñi nu rishli gad nu grish lo den. 4Nde' nu grish lo den nu cuic mi gyel nap nu bdu' choow mi gyibaa par de ub na, de coz nu wac nit lo, ni watop ñi, ni waziñ. 5Ñgyoozh zaab ic mi der nu nac nu rac ricy mi coz ily nu nac nu ricy cup der consuel lom. Ni gyicy mi, gun orze' gad nu gruu mbañ der gal nu psa' lagy mi. Nunu laab Ñgyoozh gyicy mi nu yet lag der cuen lac mod co mbañ mi der ornu bi yad nu gya' lo tiem. 6Par nu nac nde', orze' tona' la gyet lagy der. Nomaas tub tiem zi galagy ñi nu gyicy shni der nu nac nu gzac der zañ lo coz deet. 7Consuel nu ricy cup der lo Crisht, nde' nañ gal nu na or. Na or ze' chañ lo gyi, mas nit lo lañ, gun orze' gabe ben a rishli nac ñii or nap. Ni' zi'l ornu gzac deet der, orze' gabe ben a rishli ricy cup der consuel lo Crisht. Nunu consuel ze' sac zir ñi gaze' or. Benu gabee ricy cup der consuel lo Crisht ornu ded ni nu gzac deet der, orze' Ñgyoozh gyabic mi gyel mbecy ni der, nunu gyicy mi nu gyac der mbecy nu lily na, nunu griib zily mi de ru. Ni gyicy der ornu gruu zac Jesucrisht tuuba' tir. 8De ru rca der Jesucrisht mas nigul zac der mi. Nunu ricy cup der consuel lom mas wac zac der mi na. Orze' gucyit lagy der tub mod nu tona' la coz ily. Tub mod nu druu gal gyibaa. Ni wagaca' cuic der raso̱o̱ de riidz ni de coz nu rzac ru. 9Gun par nu nac nu guud nu bruu mbañ der, orze' nde' nu ricy cup der consuel lom. 10Orze' gulas de yu nu mnii por cuen ni Ñgyoozh nap tona' la psya' dey nu byub yu de ze' nu rniiñ ni de riidz nu gruu mbañ de mbecy. Nunu bzat dey de coz nu gyicy Ñgyoozh faboor num de ru nu cuic mi ni der. 11Orze' Espiriit ni Crisht bicy mi nu gud lagy de yu ze' de coz nu gzac zim, gal nu de gyel lily nim nu gruu zac despuees. Nde' tona' la gulas gud lagy dey. Nunu bicy pee dey nu ñgyad lagy yu cyu mbecy nde'. Nunu bicy pee dey nu ñgyad lagy yu la tiem gac de coz nu mnii Espiriit ni Crisht, biñ nu bicy cup dey nañ lardooy tiem ze'. 12Tees Ñgyoozh bicy mi nu guud lagy dey riidz nu mniiy. Nde' walab par de ub yu, sinu nde' par de ub na. De riidz ze', nde' riidz nu güeñ der ornu mnii de yu nu rshaal de riidz nu sac ni Crisht nu nac Espiriit Yon ni Ñgyoozh, biñ nu bruu gal gyibaa. ¡Nunu mas gashtal de anc ngulagy dey nu ñgyet lag yu cuen lac yaruu de riidz ze'! 13Nde' nu bzu der altant, nunu byub ic der ub ru tub mod nu nap. Brish lo nap la der lo de coz nap nu cuic Ñgyoozh ni der ornu gruu zac Jesucrisht tuuba' tir. 14Bicy der gal nu rlagy ñi como nac der i'ñ Ñgyoozh. Nunu bzuub gyidag der nim. Nunu cue' gyicy der de coz a̱' nap nu druu nañ lardoor, gal nu bicy der anzir nu chu' lo der mi. 15Lugaar nu gyicy der de coz a̱' nap ze', orze' bicy der mod nu nap par lo Ñgyoozh. Gun Ñgyoozh, biñ nu bzu de ru nu gac nim, mi ze' nac mi biñ yon. 16Ñgyoozh nam lat de riidz nim: “Guc der mbecy nu wagyicy cyi, gun ya̱ wagyicya̱ cyi”, nam. 17Ñgyoozh gri beem ni tub ga la de mbecy dub gal nu na coz nu ricy dey, nunu walab nu reñ ga la mod gyicy mi num tub ga mbecy. Como de ru “Uza̱”, rnii der lo Ñgyoozh, nde' nu rlagy ñi nu ca lagy der lom dub laa tiem lat nu yu' der gyishlombecy ii. 18Ñgyoozh bi bloo nap mi de ru lat de mod wancyiiñ nu pcyiiñ der gulas, de mod nu bzeeñ de gyitoo bel ni der. Na de ru nap rad lagy der la be la yu' lo mod nu bloo mbañ mi der. Walab nu coz nu ded ni briish mi. Ni walab nu briish mi nu or. Ni walab nu briish mi nu plat. 19Sinu briish mi nu reñ Crisht nu dzi sac. Mi ze' guc mi gun lo Ñgyoozh. Guc mi gal nu na tub shily nu rila sac falt ni. 20Crisht nil bi ca lo cuen nim nu ni zac mi nese anzir nu sa' lagy Ñgyoozh gyishlombecy. Tees na nu bi yad lazh tiem bruu zac mi par nu locyuub mi de ru. 21Ze' na nu nac Crisht, de ru ricy cup der consuel lo Ñgyoozh, biñ nu bicy nu byabañ mi. Nunu briic mi gyel lily nim ni I'ñ mi. Nde' nu de ru ricy cup der consuel lo Ñgyoozh, nunu rgyish lo der lom. 22Ze' na ornu de ru bzuub gyidag der de riidz nu rishli ni Crisht, orze' byecy dela cyi der. Gun orze' rishli gaal ca tub ca tub zi'l der losa'r nu dutuub la lardoor, gal nu dela fers ni der. 23Tees de ru na der gal nu na mbecy nu bi gul tuuba' tir. Na walaba' nu gul der nu nac mbecy nu yu' gyishlombecy ii, de yu nu ca lo cuen nu gat, sinu gul der nu nac de riidz ni Ñgyoozh. Riidz ze' nim gyicy ñi nu cui mbañ mbecy, nunu gzuñ par dub laa tiem. 24Gun lat de riidz ni Ñgyoozh rniim: Dela mbecy na dey gal nu na gyish. Ze' gyel lily ni dey, nde' nañ gal nu na gyee ni gyish. Gyish ze', nde' chawach ñi. Ze' gyee, nde' glag ñi. 25Tees de riidz ni Shuaan den, nde' gzuñ par tub la. Ni rnii de riidz ni Ñgyoozh. De riidz nu rzat ñi ze', nde' riidz nu sac ni Crisht nu rshaal de̱ lo de ru.

will be added

X\