1 San Juan 5

1Dela mbecy nu zeña lagy nu Jesuuz nac mi Mesías, biñ nu ca lo cuen nu cyid, de yu ze' nac yu i'ñ Ñgyoozh. Nunu de yu nu rca Ñgyoozh Uz den, orze' ni' zi'l rca ga' dey de yu nu nac i'ñ mi. 2Ornu rca den Ñgyoozh, nunu ricy den de coz nu rniim, orze' rad lagy den nu ni' zi'l rcaan de mbecy nu nac i'ñ mi. 3Nu caan Ñgyoozh, nde' yaruuñ nu ricy den de coz nu rniim. Nunu de coz nu rniim, nde' walab nu dzi biigy, 4gun dela mbecy nu nac i'ñ Ñgyoozh ricy dey gan de cyi nu yu' gyishlombecy ii. Nunu nu nac nu ricy cup den consuel lo Crisht, nde' nu ricy den gan de cyi ze'. 5De mbecy nu zeña lagy nu Jesuuz nac mi I'ñ Ñgyoozh, de yu ze' ricy dey gan de cyi nu yu' gyishlombecy ii. 6Tiem nu biid Jesucrisht, orze' wi nis mi nunu pshu reñ mi. Walab tub lo zi'l nu wi nis mi, sinu wi nis mi nunu pshu reñ mi. Nunu laab Espiriit Yon ni Ñgyoozh nac mi teshtig ni de nde'. Nunu mi ze' nac mi biñ nu rnii nu rishli. 7Orze' yu' chon coz nu ricy ñi nu gad lagy den nu Jesuuz laab mi nac mi Mesías: 8nu loga la nde' Espiriit Yon ni Ñgyoozh, nu cyup nde' ornu wi nis mi, ze' nu chon, nde' ornu pshu reñ mi. Nunu lo chon de coz ze' tub zi'l mod nu rniiñ. 9“O” rnii den ni de riidz ni de coz nu bzaac mbecy. Tees sac zir de riidz ni de coz nu rad lagy Ñgyoozh, gun de riidz ze', nde' de coz nu rnii Ñgyoozh nu nac I'ñ mi Jesuuz. 10Cyu zi'l mbecy nu ricy cup consuel lo Jesuuz, I'ñ Ñgyoozh, orze' bi yu' de riidz nu mnii Ñgyoozh ze' nañ lardooy. Ze' cyu zi'l mbecy nu wagyicy cup consuel lo Jesuuz, yu ze' ricy yu Ñgyoozh nu nac mi biñ rguu, gun wancheña lagy yu ni de riidz nu mniim nu nac I'ñ mi. 11Ze' de riidz ze' rniiñ nu Ñgyoozh bicy mi nu gac cui mbañ den tub la. Ze' nu cui mbañ den, nde' gad ñi nu nac I'ñ mi. 12Orze' de mbecy nu nac nu Jesuuz, I'ñ Ñgyoozh, de yu ze' bi guud nu cui mbañ yu. Tees de mbecy nu a̱' nac nu mi ze', de yu ze' wad nu cui mbañ dey. 13Ya̱ zeeda̱ gyicy ii lo de ru mbecy nu ricy cup consuel lo Jesuuz, I'ñ Ñgyoozh, par nu gad lagy der nu bi guud nu cui mbañ der tub la. 14Ricy cup den consuel lo Ñgyoozh, gun rad lagy den nu ornu rdiñ na la coz lom, orze' rzuub gyidag mi ni den benu nde' coz nu rlagy mi. 15Nunu como bi rad lagy den nu Ñgyoozh rzuub gyidag mi nin ornu rnii dun mi, orze' ni' zi'l rad lagy den nu bi ricy cup den de coz nu bdiñ na lom. 16Orze' benu ca na tub der zac ru ca na tub losa'r nu ricy yu cyi, ze' walab cyi nu gyicy ñi nu gat yu, orze' rlagy ñi nu cyiñ ru lo Ñgyoozh ni mbecy nu ricy cyi ze'. Orze' Ñgyoozh gyicy mi nu cui mbañ yu, benu nde' walab tub cyi nu gyicy ñi nu gat yu. Gun yu' cyi nu gyicy ñi nu gat mbecy. Tees walab nu rne̱e̱ nu cyiñ der lo Ñgyoozh nu nac cyi ze'. 17Dela coz a̱' nap nu ricy mbecy laab nde' cyi. Tees yu' cyi nu walab nu gyicy ñi nu gat mbecy. 18Rad lagy den nu benu mbecy nac yu i'ñ Ñgyoozh, orze' de yu ze' wayicy dey coz cyi. Gun Jesuuz, I'ñ Ñgyoozh, rñam dey. Orze' nuras wac gyicy ras nuy de yu ze'. 19Ni' zi'l rad lagy den nu nac naa mbecy ni Ñgyoozh. Nunu rad lagy den nu nuras riib ic yu dutuub la gyishlombecy ii. 20Nunu ni' zi'l rad lagy den nu Jesuuz, I'ñ Ñgyoozh, bi biid mi gyishlombecy ii, nunu briic mi shcab ni den par nu gad lagy na cyu nac Ñgyoozh nu rishli. Nunu bi nac du den Ñgyoozh, biñ nu rishli, gal nu I'ñ mi Jesucrisht. Mi ze' nac mi Ñgyoozh nu rishli. Nunu mi ze' biñ nu gyicy nu cui mbañ mbecy tub la. 21De ru yu feñ ne̱, cuidad der nu de coz nu ricy mbecy par ñgyoozh, tees walab ñgyoozh rishli.

will be added

X\