1 San Juan 4

1De ru bicy na nu dzi rca̱, cue' cheña lagy der ni de mbecy ornu ricy dey nu rniiy por cuen ni Ñgyoozh, sinu bicy der preb dey ben a laab Espiriit Yon ni Ñgyoozh rcyiiñ mi nañ lardoo dey, uti walab. Gun gyishlombecy ii bzu laa mbecy rguu nu ricy nu rnii por cuen ni Ñgyoozh. 2Nii tub mod nu gac gad lagy der nu ca na mbecy nu ricy cup Espiriit Yon ni Ñgyoozh nañ lardoo: dela mbecy nu driib cuen nu Jesucrisht biid mi gyishlombecy byac mi mbecy nu rishli, orze' dela de yu ze' ricy cup yu Espiriit Yon ni Ñgyoozh. 3Ze' de mbecy nu wagriib cuen de coz ze', de yu ze' a̱' ricy cup dey Espiriit Yon ni Ñgyoozh, sinu de yu ze' ricy cup dey tub espiriit nu za contr ni Crisht. De ru bi reñ der nu bi ca lo cuen nu cyid espiriit a̱' nap ze'. Nunu mas na la bi rded espiriit ze' gyishlombecy ii. 4De ru yu feñ ne̱, de ru bi nac der ni Ñgyoozh. Nunu de ru bi bicy der gan de mbecy rguu ze'. Gun biñ nu rcyiiñ nañ lardoo der, mi ze' fert zir mi gaze' nuras nu riib ic nañ lardoo de mbecy ni gyishlombecy ii. 5De mbecy rguu ze' nac dey ni gyishlombecy ii. Nde' nu rnii dey de riidz nu druu gyishlombecy ii. Nunu dela de mbecy nu yu' gyishlombecy ii rzuub gyidag dey de riidz ze'. 6Ze' de ub na nac naa mbecy ni Ñgyoozh. Orze' de mbecy nu bi yu' lo Ñgyoozh rzuub gyidag dey de riidz nu rniin. Tees de mbecy nu walab mbecy ni Ñgyoozh, de yu ze' wacsuub gyidag yu ni de riidz nu rniin. Orze' nu nac de nu nde' rad lagy den ca na mbecy nu ricy cup Espiriit Yon ni Ñgyoozh, biñ nu rnii de coz rishli, nunu rad lagy den ca na de mbecy nu ricy cup nuras nu rguu. 7De ru bicy na nu dzi rca̱, rlagy ñi nu ca tub ca tub zi'l den losa'n. Gun nu caan losa'n, nde' coz nu bruu lo Ñgyoozh. Dela mbecy nu rca losa' nac yu i'ñ Ñgyoozh, nunu bi yu' loy mi. 8Ze' de mbecy nu waca losa', de yu ze' a̱' yu' loy Ñgyoozh, gun Ñgyoozh nac mi biñ nu rca mbecy. 9Ñgyoozh briic mi nu gad lagy den nu rcam de ub na nu nac nu bzuu nez mi I'ñ mi nu tub zi la zu nim nu biid mi gyishlombecy ii, gun orze' gad nu cui mbañ den nu nac I'ñ mi ze'. 10I mod rshaal ñi lac mod rca Ñgyoozh de ub na: walab ti de ub na pcaan mi, sinu mi ze' pcam de ub na. Nde' nu gashtal bzuu nez mi I'ñ mi nu biid mi gyishlombecy par nu gac mi gun, gun orze' Ñgyoozh gyicy sulagy mi cyi den. 11De ru bicy na nu dzi rca̱, ze' benu ni mod rca Ñgyoozh de ub na, orze' ni' zi'l de ub na ca tub ca tub zi'l den losa'n. 12Gun ni tub la mbecy nigul zac yu Ñgyoozh. Tees benu ca tub ca tub zi'l den losa'n, orze' Ñgyoozh nac num de ub na, nunu rabee de coz nu ricy mi nañ lardoo den nu nac nu rcam de ub na. 13Yu' tub mod par nu gad lagy den nu nac dun Ñgyoozh nunu Ñgyoozh nac num de ub na. Rad lagy der de nde' nu nac nu briic mi Espiriit Yon nim ni den. 14Nunu de̱ ya̱ laa bzaac de̱ nu Ñgyoozh Uz na bzeed mi I'ñ mi biid mi par nu co mbañ mi de mbecy nu yu' gyishlombecy ii. De nde' riidz nu rshaal den. 15Orze' cyu zi'l mbecy nu driib cuen yu nu Jesuuz nac mi I'ñ Ñgyoozh, orze' Ñgyoozh nac num yu, nunu yu ze' nac nuy mi. 16Ni mod gud lagy na nu Ñgyoozh rcam de ub na nunu guña lagy na niñ. Ñgyoozh nac mi biñ nu rca mbecy. Nde' nu de mbecy nu zaab rca la losa', de yu ze' nac nu dey Ñgyoozh, nunu Ñgyoozh nac num dey. 17Orze' ni mod gyac den mbecy nu ca za' la Ñgyoozh, gun orze' ornu shuub dzi nu gri beem ni de mbecy ni gyishlombecy, orze' de ub na wadziba'n, gun de ub na rded na gyishlombecy ii gal mod nu gusa Jesucrisht. 18Gun de mbecy nu rca de ub na, de yu ze' wadzib na loy. Nde' nu, como Ñgyoozh tona' rcam de ub na, orze' saca' la mod nu dzib den lom. Gun dzib den nu nac cashtig. Nde' nu benu ca na mbecy rdzib yu, orze' nde' gun wacabee riiñ nu bicy Ñgyoozh nañ lardooy nu nac nu rcam yu. 19De ub na rcaan mi, gun mi ze' pcam de ub na nu loga la. 20Benu ca na tub mbecy rniiy: “Ya̱ rca̱ Ñgyoozh”, rniiy, ze' laab tiem ze' rzi lagy yu lo losa'y, orze' yu ze' nac yu tub mbecy rguu. Gun benu ca na tub mbecy wacay losa'y, tub mbecy nu rzac yu, ze' yegar nu caa ga'y Ñgyoozh, biñ nu wagac zac yu. 21Jesucrisht mniim lo den nu gyicy na de coz ii: mbecy nu rca Ñgyoozh, yu ze' ni' zi'l rcay losa'y.

will be added

X\