1 San Juan 3

1Mnii ñuu too der nu tona' la rca Ñgyoozh Uz na de ub na. Par nu tona' la rcam de ub na, nde' nu rniim nu nac naa i'ñ mi, rniim. Nunu rishli gaal nac naa i'ñ mi. Nde' nu de mbecy nu yu' gyishlombecy ii wagad lagy dey cyu nac naa, como ni' zi'l wangad lagy dey cyu Ñgyoozh. 2Orze' de ru bicy na nu dzi rca̱, bi nac den i'ñ Ñgyoozh. Mas gaal zi gabee wagad lagy nap den lac mod na den gyac na par lo, tees rad lagy den nu ornu Jesuuz gruu zac mi tuuba' tir, orze' gzac den gal nu na la ub mi, gun orze' gyac den gal nu na gaal mi. 3Gun dela mbecy nu ni mod rgyish lo lom, ricy dey nu cue' chu' falt niy gal nu Jesucrisht sac falt nim. 4Tees dela mbecy nu ricy cyi, de yu ze' zay contr ni coz nu rlagy Ñgyoozh. Gun cyi, nde' la zi'l coz nu walagy Ñgyoozh. 5De ru rad lagy der nu Jesucrisht biid mi gyishlombecy ii par nu cyib mi de cyi nu ricy cup mbecy. Nunu mi ze' rila a̱' nac mi mbecy cyi. 6Orze' dela mbecy nu rcyiiñ nu Crisht, de yu ze' wagyicy dey cyi. Tees dela de mbecy nu ricy cyi wagad lagy dey la nam. Ni wagad lagy dey cyu nac mi. 7De ru, yu feñ ne̱, cue' zaan ru nu guu ni tub la mbecy der, gun de mbecy nu zaab ricy la de coz nu se'ñ, de yu ze' nac dey mbecy nap gal nu mi ze' nac mi biñ nu dzi nap. 8Tees de mbecy nu zaab ricy la cyi, de yu ze' nac yu mbecy ni nuras. Gun nuras ricy yu cyi nese nu bzub la gyi' gyishlombecy. Gun par nu nac nde' zi'l biid Jesuuz, I'ñ Ñgyoozh, par nu nit lom dela coz nu ricy nuras. 9Ni tub la mbecy nu nac i'ñ Ñgyoozh walab nu zaab ricy lay cyi, gun Ñgyoozh rcyiiñ mi nañ lardoo dey. Nunu wagyicy dey cyi, gun nac dey i'ñ mi. 10Bi rabee ca na mbecy nu nac yu i'ñ Ñgyoozh, nunu bi rabee ga' ca na mbecy nu nac i'ñ nuras, gun cyu zi'l mbecy nu wagyicy coz nap o nu wacay de bicy yu, yu ze' a̱' nac yu ni Ñgyoozh. 11Nii de riidz nu bi güeñ der nese nu loga la: Nu rlagy ñi nu ca tub ca tub zi'l den losa'n. 12Cue' gac naa gal nu na Caiing. Yu ze' tub mbecy ni nuras. Biit yu bicy yu. ¿La gyi' biit yu bicy yu? Gyi' nu shiñ ricy ub yu. Ze' bicy yu, Abeel, yu ze' nap bicy yu. 13Der bicy na, cue' cha nu ic der benu de mbecy ni gyishlombecy rzi lagy yu lo der. 14De ub na bi bded lon lo lugaar ze' nu yu' de mbecy gut. Nunu bi guud nu cui mbañ den tub la. Rad lagy den nu cui mbañ na nu nac nu rca den losa'n. Orze' mbecy nu waca losa' nay gal nu na mbecy nu bi gut. 15Dela mbecy nu rzi lagy lo losa', de yu ze' gal gaa la nay nu de mbecy nu rut losa'. Nunu de ru rad lagy der nu ni tub la mbecy nu rut losa' a̱' nac yu mbecy nu cyiiñ nu Ñgyoozh tub la. 16Bi rad lagy den lac na mod nu caan losa'n, gun Jesucrisht pshet ic mi gut mi nu nac de ub na. Orze' ni' zi'l mod, de ub na rlagy ñi nu shet ic na mas gat na nu nac losa'n. 17Ze' benu tub mbecy yu' la coz niy, ze' zac yu tub losa'y nu ricy falt ñi niy, ze' wabic yu niy, orze' mbecy, yu nu wabic ze', wacay losa'y nañ lardooy gal mod nu rlagy Ñgyoozh. 18De ru yu feñ ne̱, cue' nu niin nu caan losa'n nu ru' zi'l na, sinu gyicy na tub mod par nu gabe nu rishli rcaan losa'n. 19Ni mod rad lagy den nu rishli zan faboor ni Ñgyoozh, nunu wat lo den ornu gyecha'n lom. 20Tees benu rnii toon nu yu' cyi nañ lardoon, Ñgyoozh zily zir nac mi par lardoon. Mi ze' rad lagy mi dela coz. 21Der bicya̱ nu dzi rca̱, benu rad lagy den nu sac cyi nañ lardoon, orze' wadzib la den nu gyecha'n lo Ñgyoozh. 22Nunu mi ze' cuic mi dela coz nu diñ na lom, gun ricy yac den ni dela riidz nim. Nunu ricy den coz nu yedzu' lagy mi. 23Nunu de riidz nu mniim nu gyicy den ze', nde' nu gyicy cup den consuel lo I'ñ mi, Jesucrisht, nunu ca tub ca tub zi'l den losa'n, gal nu mi ze' mniim nu ni gyicy den. 24De mbecy nu rzuub gyidag ni de riidz nim, de yu ze' rcyiiñ nu dey mi, nunu mi ze' rcyiiñ num dey. Nunu nu nac de nde', rad lagy den nu mi ze' rcyiiñ num de ub na. Rad lagy den par nu nac Espiriit Yon nim, biñ nu briic mi ni den.

will be added

X\