1 San Juan 2

1Der yu feñ, ya̱ ca̱a̱ de coz ii lo gyicy nu zeed de̱ lor, gun orze' cue' gyicy der cyi. Tees benu tub mbecy gyicy yu cyi, orze' zu tub biñ nu ne' ic ni den lo Ñgyoozh, Uz den. Mi ze' Jesucrisht. Nunu mi ze' ricy mi coz nu se'ñ. 2Jesucrisht guc mi tub gun nu gua lo Ñgyoozh, gun orze' gyicy sulagy mi de cyi den: nunu walab tub lo zi'l de cyi de ub na, sinu ni' zi'l de cyi de mbecy nu yu' dutuub la gyishlombecy. 3Benu gyicy yac den de riidz nu rnii Ñgyoozh, orze' rad lagy den nu segur la yu' lon mi. 4Tees benu tub mbecy rniiy: “Ya̱ yu' lo̱ Ñgyoozh”, rniiy, ze' benu wagyicy yu gal nu rniim, orze' yu ze' nac yu tub mbecy rguu, nunu wacsaan yu chetib ic coz rishli nañ lardooy. 5Ze' mbecy nu ricy yac de riidz nim, yu ze' rca za' lay mi. Nunu nde' mod nu gad lagy na nu tub zi'l nac naa dun mi. 6Mbecy nu rnii nu rcyiiñ nu Ñgyoozh, yu ze' rlagy ñi nu chesay gal nu gusa Jesucrisht. 7Der bicy na, riidz nu rca̱a̱ lo gyicy nu gyicy der, nde' nu ca tub ca tub zi'l der losa'r. Walab nu sa güeñ der ñii, sinu nde' riidz nu bi gush der nese nu bzub gyi' nu ricy cup der consuel lo Crisht. 8Mas ni, tees riidz nu rca̱a̱ ii, nii tub riidz cub nu rnii coz rishli nu nac Crisht nu coz rishli nu nac de ub na. Gun na bi rded tiem nu chu' den ze' nu cow, nunu Jesucrisht bi rlyuum yaa nu rishli lo den. 9Benu tub mbecy rniiy nu rded yu ze' nu yu' yaa nu rbic Crisht, ze' gabee rzi lagy yu lo bicy yu, orze' yu ze' gabee rded yu ze' nu cow. 10Yu nu rca bicy, yu ze' rded yu ze' nu yu' yaa nu rbic Crisht. Ni tub la coz wac gyicy ñi nu gadzay. 11Tees yu nu rzi lagy lo bicy, yu ze' rcyiiñ yu nunu rded yu ze' nu cow. Yu ze' wagad lagy yu ni ca par chay, gun ze' nu cow ze' ricy ñi nu wacsac yu. 12Ya̱ zeeda̱ gyicy ii lo de ru yu nguzh, gun Ñgyoozh bi bicy sulagy mi de cyir nu nac Jesucrisht. 13Ya̱ zeeda̱ gyicy ii lo de ru yu bel, gun de ru nap yu' lor Ñgyoozh, biñ nu nil zu nese anzir nu gzub gyi' gyishlombecy. Ya̱ zeeda̱ gyicy ii lo de ru yu feñ, gun bi bicy der gan nuras. 14Ya̱ zeeda̱ gyicy ii lo de ru yu nguzh, gun bi yu' lo der Ñgyoozh Uz den. Ya̱ zeeda̱ gyicy ii lo de ru yu bel, gun de ru nap yu' lor Ñgyoozh, biñ nu nil zu nese anzir nu gzub gyi' gyishlombecy. Ya̱ zeeda̱ gyicy ii lo de ru yu feñ, gun fert der nu nac de coz ni Crisht, nunu “O” mnii der nu gutib ic riidz ni Ñgyoozh nañ lardoo der, nunu bi bicy der gan nuras. 15Cue' ca der gyishlombecy ii, ni de coz nu yu' gyishlombecy, gun benu ca na mbecy cay gyishlombecy, orze' wacay Ñgyoozh Uz na. 16Gun de coz nu druu gyishlombecy ii, nde' coz a̱' nap. Druu nu rlagy dey shiñ gyicy yu. Druu nu ye rzac dey lo de gyel nap. Druu nu le' dey. Dela coz ze' walab lo Ñgyoozh Uz den druuñ, sinu druuñ gyishlombecy. 17Tees ded ni gyishlombecy nunu ded ni de coz a̱' nap nu rlagy mbecy nu gyicy yu, tees yu nu ricy gal nu rlagy Ñgyoozh, yu ze' cui mbañ yu tub la. 18Der yu feñ, na yu' den tiem nu bi rlazh gyishlombecy ii. Nunu bi güeñ der nu bi yad tub mbecy nu zay contr ni Crisht. Tees mas na bi guzañ mbecy bi biid yu nu guay contr ni Crisht. Nde' nu rad lagy den nu bi yu'n tiem nu bi rlazh gyishlombecy ii. 19Tees de mbecy nu za contr ni Crisht ze' bruu dey laab lat den. Tees rishli wangac nu dey den. Gun benu ñgyac nu dey den, orze' waruu dey lat na. Tees nu nac nu bruu dey lat den, orze' rad lagy den nu ni tub la dey wangac nuy de ub na. 20Crisht briic mi Espiriit Yon ni Ñgyoozh ni der. Orze' dela der rad lagy der de riidz rishli. 21Ya̱ walab nu zeeda̱ gyicy ii lo der par nu wagad lagy der de riidz rishli ni Crisht, sinu par nu bi rad lagy der ñii. Nunu de ru rad lagy der nu rila wacyuu gyel rguu lat de riidz rishli. 22Orze' ¿cyu nu mbecy rguu ze'? Yu ze' yu nu rnii nu Jesucrisht, mi ze' walab Mesías, biñ nu ca lo cuen nu cyid, rniiy. Nunu laab yu ze' yu nu za contr ni Crisht. Yu ze' rdiily loy lo Ñgyoozh, Uz den, nu lo I'ñ mi Jesuuz. 23Cyu zi'l yu nu rdiily lo lo Jesucrisht, I'ñ Ñgyoozh, ni' zi'l rdiily loy lo Ñgyoozh Uz na. Tees cyu zi'l mbecy nu “O” rnii ni Crisht, I'ñ Ñgyoozh, yu ze' ni' zi'l yu' loy Ñgyoozh. 24Bicy der nu caa ic ru de riidz nu güeñ der nese nu loga la. Gun benu ni gyicy der, orze' rcyiiñ der nu Crisht, I'ñ Ñgyoozh, nunu rcyiiñ der nu Uz mi. 25Nunu coz nu mnii Ñgyoozh nu segur la cuic mi ni den, nde' nu cui mbañ den tub la. 26Ya̱ ca̱a̱ de riidz ii nu zeeda̱ lo der, de riidz nu rnii nu cyu de mbecy nu rlagy guu de ru. 27Tees de ru bi ricy cup der Espiriit Yon nu briic Crisht ni der. Orze' walagy ñi ni tub la mbecy nu lyuuy ni der. Gun laab mi lyuum ni der dela coz. Nunu de coz nu lyuum ze', nde' coz rishli, walab coz rguu. Orze' rlagy ñi nu cyiiñ nu der Crisht dub gal mod nu lyuu Espiriit Yon ni der. 28Na de ru yu feñ, rlagy ñi nu cyiiñ nu der Crisht, gun orze' cuic der baloor ornu gruu zac mi tuuba' tir. Gun orze' cue' nu gat lo den lat nu zu den lom ornu cyid mi. 29De ru bi rad lagy der nu Jesucrisht dzi nap mi. Orze' ni' zi'l rlagy ñi nu gad lagy der nu dela mbecy nu ricy gal nu rlagy Ñgyoozh, de yu ze' nac yu i'ñ mi.

will be added

X\