1 San Juan 1

1Ca̱a̱ de̱ lo gyicy nu zeed de̱ lo de ru de riidz ni biñ nu bi zu nil nese anzir nu gzub gyi' gyishlombecy. De̱ ya̱ güeñ de̱ riidz nu mniim. Nunu bzaac urlo̱ la̱ de̱m. Gun bgüi̱i̱ de̱ lom, nunu gul ya̱a̱ de̱m. Mi ze' nac mi biñ nu la riidz ni Ñgyoozh, biñ nu rbic gyel mbañ. 2Orze' bruu zac biñ nu rbic gyel mbañ ze' lat de̱ ya̱. Nunu bzac de̱m, nunu ne̱e̱ de̱ lo der cyu nac biñ nu rbic gyel mbañ nu rila walazh. Mi ze' biñ nu nil gulas nac nu Ñgyoozh, Uz den. Tees Ñgyoozh, Uz na, bicy mi nu bruu zac mi lo de̱ ya̱. 3Orze' shaal de̱ lo der de riidz nu güeñ de̱, gal nu de coz nu bzaac de̱, gun orze' gac nu der de̱ ya̱. Orze' de ub na gac du den Ñgyoozh Uz na gal nu I'ñ mi Jesucrisht. 4Orze' rca̱a̱ de̱ de riidz ii, gun orze' gyet lagy de̱ gashtal ze' nu wagaca' la. 5Nii riidz nu güeñ de̱ nu mnii Jesucrisht lo̱ de̱. Nunu shaal de̱ ñii lo der: Ñgyoozh nam gal nu na ze' yu' yaa, gun dzi yon mi. Par lo Ñgyoozh sac la cyi. 6Benu niin nu nac dun mi, ze' laab tiem ze' rded na ricy na cyi, orze' rguun, nunu wagyicy den gal nu rlagy Ñgyoozh. 7Tees benu rded na ze' nu yu' yaa gal nu Ñgyoozh zum ze' nu yu' yaa, orze' nac du den losa'n. Nunu nu nac reñ I'ñ mi, Jesucrisht, gyecy dela cyi den. 8Benu niin nu sac cyin, orze' rguun laab ub na, nunu wacsaan den nu chetib ic coz rishli nañ lardoon. 9Ze' benu shuub ru' den de cyi nu ricy na, orze' mi ze' ricy paam, nunu ricy mi coz nu se'ñ. Orze' gyicy sulagy mi dela cyi den, nunu cyib mi dela coz cyi nu ricy den. 10Benu nii den nu sac cyin, orze' ricy na nu Ñgyoozh nac mi tub biñ rguu, nunu wacsaan na nu chetib ic riidz nim nañ lardoon.

will be added

X\