1 Corintios 6

1Ornu ca na mbecy nu yu' lat der rziiy nu shiñ bicy bicy yu nuy yu, orze' rila walagy ñi chay lo mbecy nu walab mbecy ni Ñgyoozh par nu gri beey ni dey, sinu rlagy ñi chay lo de' zir mbecy ni Ñgyoozh. 2¿Walab gaal wagad lagy der nu de mbecy ni Ñgyoozh gri bee dey ni dela mbecy gyishlombecy? Benu gri bee der ni dela mbecy, orze' segur la cyiiñ der nu gri beer de coz deet mi' nu yu' lat der. 3¿Walab gaal wagad lagy der nu gri bee den ni de anc? ¡Ze' yegar ñuu de coz deet nu rac lat nu rcyiiñ den gyishlombecy ii na! 4Orze' benu cyid coz deet lat der, ¿lagu cha nu der gyel cha' ic ze' lo de mbecy nu wacha lat de mbecy ni Crisht? 5Ya̱ ni rne̱e̱ gun par nu gat lo der. ¿Walab gaal warusuu la mas ñuu tub mbecy nu yu' shcab ni lat der nu cyiiñ yu za' loy de coz deet nu rac lat de bicy na? 6Nap zir duri bee ni dey lat de mbecy ni Crisht, gaze' nu cha dey lo de fushtiz nu walab mbecy ni Ñgyoozh nu gri beey ni dey. 7Benu ca na der char lo de fushtiz nu nac tub gyel cha' ic ni bicy ru, orze' wayicy ru gan gal nu rlagy ñi nu gyicy tub mbecy ni Crisht. Nap zir zaan la der nu shiñ gyicy nu mbecy der. Nap zir nu gyicy gubaan dey coz ni der gaze' nu gyicy der tub mod nu walagy ñi gyicy mbecy ni Crisht. 8Lugaar nu nap gyicy der, ca nu shiñ ricy nu der losa'r. ¡Nunu ricy gubaan der coz ni laab losa'r mas nac yu bicy ru nu nac Crisht! 9¿Walab gaal wagad lagy der nu de mbecy a̱' nap rila wazac dey lo gyel gubier ni Ñgyoozh? Cue' guu der ub ru. Neñ der nu de mbecy nu ral biñ mñaa nu walab mñaa, de mbecy nu driib zily nab, de mbecy nu ral losa' nu wanchelaa, de yu gyeey nu ricy losa' gyeey par mod ni biñ mñaa o ni' zi'l tub biñ mñaa nu losa'm, 10de mbecy nu ricy gubaan, de mbecy nu rasaap lagy de coz ni losa', de mbecy rzugy, de mbecy nu rzat zi losa', de mbecy nu rboo coz ni losa', dela de mbecy ze' wazac dey lo gyel gubier ni Ñgyoozh. 11Gu' mbecy lat der nu ni nay guc yu. Tees na bi byecy dela cyi nu bicy der. Bi byac der mbecy cacy, nunu byanap der par lo Ñgyoozh. Dela nde' ni bzac der nu nac Jesucrisht, nunu nu nac de coz nu bicy Espiriit Yon ni Ñgyoozh. 12Yu' mbecy rniiy: “Gac gyicya̱ la zi'l coz nu rlagya̱”, rnii dey. Nunu nde' rishli, tees walab delañ nap nu gyicy nañ. Mas gac gyicya̱ la zi'l coz tees ya̱ rila wazaana̱ nu gyub ic ni tub la coz ya̱. 13Yu' mbecy nu rnii dey nu gac gow dey gun: “Coz nu rdow den, nde' par nu chu'ñ nañ den, nunu nañ den nde' par nu chu' de coz nu rdon”, rnii dey. Nunu nde' rishli, tees shuub tiem nu za' lo Ñgyoozh rup laañ. Tees walab rishli nu cuerp ni mbecy, nde' cyiiñ ni par nu gal zi'l dey losa'y nu wanchelaay. Sinu cuerp ni mbecy, nde' cyiiñ ñi par nu gyicy ñi de coz nu rlagy Shuaan den. Ze' Shuaan den, mi ze' rlagy ñi nu gyub ic mi cuerp ni den, gun orze' gac gyicy den de coz nu rlagy mi. 14Nunu gal nu Ñgyoozh bicy mi nu byabañ Shuaan den ornu gut mi, ni' zi'l gyicy mi nu gyabañ de ub na ornu gat den nu nac coz ily nu ricy mi. 15¿Walab gaal wagad lagy der nu tub ga la der na der gal nu na tub la' cuerp ni Crisht? ¿Orze' lac gyicya̱? ¿Walab gaal lo̱o̱ tub la' cuerp ni Crisht; orze' cheela̱ñ nu cuerp ni biñ mñaa che̱'? Rila wac. 16¿Walab gaal wagad lagy der nu benu tub mbecy gal yu tub biñ mñaa che̱', orze' yac dey se tub zi'l cuerp? Gun lat de riidz nu bzeeñ Ñgyoozh rniiñ: “Lo cyup mbecy yac dey se tub zi'l cuerp”, rniiñ. 17Tees benu tub mbecy nac nuy Shuaan den, orze' tub zi'l nac yu nuy mi par lo Ñgyoozh. 18Bruu chu der lo cyi nu ral mbecy losa'y nu wanchelaay. Dela cyi nu ricy mbecy a̱' shiñ gyicy nuy cuerp niy. Tees mbecy nu ral losa' nu wanchelaa, yu ze' shiñ ricy nuy cuerp niy. 19¿Walab gaal wagad lagy der nu cuerp ni der, nde' yu' wedz ni Espiriit Yon nu briic Ñgyoozh ni der, nunu Espiriit Yon nim rcyiiñ mi nañ cuerp ni der? Gun cuerp ni der, nde' walab coz par ub zi'l der, sinu cuerp ze', nde' coz ni Ñgyoozh. 20Gun Ñgyoozh tona' la ñgyup briib mi der. Orze' rlagy ñi nu griib zily der mi nu cuerp nir.

will be added

X\