1 Corintios 5

1Ya̱ güeña̱ nu lat de ru, zu tub mbecy nu gush yu ñaa naan yu. Yu ze' tona' la cyi ily bicy yu. Mas de mbecy nu a̱' yu' lo Ñgyoozh wagyicy yu cyi ze'. 2Orze' ¿lagu gaal nu dzi ricy der gyel le' nir? Lugaar nu gyicy le' der, nap zir nu gyicy shni der, nunu rlagy ñi co der mbecy nu bicy cyi ze' lat der. 3Mas ya̱ saca̱ lat der tees ya̱ ca ica̱ der. Nunu nu nac rishbeey nu briic Shuaan den Jesuuz ne̱, nde' nu ya̱ mnii to̱o̱ nu lac mod rlagy ñi gyicy nu der mbecy nu bicy cyi ze'. Mas ya̱ saca̱ lat der tees ya̱ ne̱e̱ lo der. Orze' nde' nañ gal na nu zu̱ lat der. 4Lat nu yu' tublaazh der, ya̱ ca ica̱ der, nunu Shuaan den Jesucrisht locyuub mi der. 5Orze' mbecy nu bicy cyi ze', bgu' der yu yaa nuras, gun orze' chay lo cashtig, tees gruu mbañ yu ornu cyid Shuaan den Jesuuz tuuba' tir. 6Walagy ñi nu gyicy le' der. Mbish tub riidz nu rnii mbecy: coz cyi nañ gal nu na lebadur. Orze' nu nac ñuu miiñ lebadur gyicy ñi nu gyafert dela cub gyishtily. 7Rlagy ñi nu co der lebadur ze' lat ru. Gun orze' sac la coz cyi lat der. Gun orze' na der gal nu na cub gyishtily nu du ub la nu sac la lebadur ze' lat der. Nunu rad lagya̱ nu caacy der, gun Jesucrisht bi gut mi par nu nac de ub na. Par de ub na, mi ze' nam gal nu na shily nu rshu reñ lat sa' ni Pas. 8Nunu de ub na nan gal na mbecy nu yu' sa' ze'. Nde' nu rlagy ñi chu' den nu gyel cacy, nunu gyicy den coz nu se'ñ. Gun nde' nañ gal nu na gyishtily nu sac lebadur ze'. Walagy ñi nu shiñ gyicy den nunu walagy ñi nu gyicy den coz cyi gal nu bicy den gulas. Gun nde' nañ gal nu na gyishtily nu yu' lebadur. Nunu wac gow mbecy gyishtily nu yu' lebadur ze' lat nu yu' dey sa' ni Pas. 9Lo tuuba' gyicy nu bzeeda̱ lo der ze', pca̱a̱ nu cue' gac nu der de mbecy nu ral losa' nu wanchelaa. 10De mbecy nu walab mbecy ni Ñgyoozh, mas ral dey losa'y nu wanchelaay, mas nac dey mbecy saap lagy, nunu mas nac dey gubaan, mas nac dey mbecy nu driib zily nab, tees wane̱e̱ nu rlagy ñi nu gruu der lat dey, gun benu ni gyicy der, orze' rlagy ñi nu ruu der gyishlombecy ii. 11Tees coz nu rlagya̱ ne̱e̱ lo der, nde' nu cue' gac nu der ni tub la de mbecy nu rnii nu nac yu bicy der, ze' ii ricy dey de cyi ze'. Ral dey losa'y nu wanchelaay. Rasaap lagy dey coz ni losa'y. Driib zily dey nab. Rzat zi dey losa'y. Nac dey mbecy rzugy. Ricy dey gubaan. Cue' gac nu der ni tub la de mbecy ze'. De mbecy ze' ni cue' gow nu der yu gyit. 12Gun nde' walab cuen ne̱ ya̱ nu gri be̱e̱ ni de yu nu walab mbecy ni Crisht. Sinu Ñgyoozh gri beem ni de mbecy ze'. Tees de mbecy nu nac ni Crisht, rlagy ñi nu gri bee der ni dey. Orze' rlagy ñi nu co der mbecy nu bicy cyi ze' lat der.

will be added

X\