1 Corintios 4

1De ru rlagy ñi nu gyicy der de̱ ya̱ par mbecy nu ricy de coz nu rlagy Crisht. Rlagy ñi nu gyicy der de̱ ya̱ par mbecy nu bdugyi riiñ nu shaal de̱ de riidz nu gal na rbic Ñgyoozh nu gad lagy de mbecy. 2Tub coz rlagy ñi nu gyicy yu zu riiñ. Rlagy ñi nu gyicy paay nu patro̱o̱ niy. 3Ze' ya̱ wagyicy cuena̱ mas rsa' lagy der lo̱ ti nap ricya̱. Ni' zi'l wagyicy cuena̱ la zi'l coz nu rsa' lagy mbecy lo̱. Mas ya̱, wagyicy cupa̱ consuel lo shcab ni uba̱. 4Ya̱ rze̱e̱ nu se la la coz bicya̱ rze̱e̱, tees walab nu nac nde' gruu caacya̱, gun Shuaan den, mi ze' gniim ti yu' falt ne̱. 5Orze' nde' nu walagy ñi nu gnii der ti yu' falt ni losa'r, lat nu lez den gashtal shuub la dzi nu cyid Shuaan den tuuba' tir. Orze' mi ze' gyicy caacy mi de coz nu ricy mbecy dze ga. Nunu shaal mi de coz nu rnii too mbecy nañ lardooy. Orze' Ñgyoozh gyabic mi gyel mbecy ni tub ga la dey gal nu yad ñi. 6Der bicy na, ya̱ rne̱e̱ dela coz ii lo der par nu locyuuba̱ der. Ya̱ bzata̱ Apolos nu uba̱ par nu gad lagy der lac mod gyicy nur losa'r. Tub zi'l mod nu gyicy nu der dey. Gal mod nu rnii de riidz ni Ñgyoozh, ni mod rlagy ñi. Ni tub la der walagy ñi nu cui der mbecy nu ricy riiñ ni Ñgyoozh. Cue' gyicy zily der tub yu. Ze' tuuba'y gyicy gyidz der yu. 7¿Cyu bicy nu byalily zir der par lo de' zir mbecy? Wagad lagy der ni tub la coz. Nomaas rad lagy der de coz nu briic Ñgyoozh nu gad lagy der. Orze' benu rad lagy der coz nu briic Ñgyoozh zi'l, orze' ¿lagu dzi ricy der gyel le' nir gal nu ricy mbecy nu ricy cup coz nu walab coz nu guud leew la? 8Che rzii der nu bi ricy cup gyel la der dela coz ni Crisht nu rlagy ñi ni der, rziir. De ru na der gal nu na mbecy guani'ñ, rziir. Nunu byac der gal nu na rey, rzii der, mas de̱ ya̱ se la' la sac de̱. Dzi ga nap benu gyac der rey, gun orze' de̱ ya̱ gyaca' de̱ rey tublaazh la nu de ru. 9Ya̱ rze̱e̱ nu Ñgyoozh bicy mi nu rlyu nu de̱ ya̱ nu de' zir de aposht nu blaazh la gal ich la zab de̱. Rabee de̱ gal nu rabee tub pres nu bi zuu la nu gat lo rgüii la dela mbecy nu yu' gyishlombecy: tant de anc nunu tant de mbecy. 10De mbecy rzii dey nu de̱ ya̱ nac de̱ mbecy ton par nu nac Crisht. Ze' de ru rzii dey nu dzi lily na shcab ni der par de coz ni Crisht. De̱ ya̱ wacyiiñ de̱, tees de ru dzi cyiiñ der rzii dey. De mbecy rca lagy dey lo de ru, tees lo de̱ ya̱ waca lagy dey. 11Mas gashtal dzi na yu' tiem nu ran de̱, nunu yu' tiem nu rbigy de̱ nis, nunu yu' tiem ni shab de̱ wagad. Yu' tiem nu shiñ ricy nu mbecy de̱ ya̱. Nunu yu' tiem nu wagad yu' cyiiñ de̱. 12Nunu tona' la fert ricy de̱ riiñ nu ya̱a̱ de̱ par nu gad nu da̱w de̱. Ornu mbecy rzaa lagy dey ne̱ de̱, orze' rdiñ de̱ lo Ñgyoozh nu nap gyicy num dey. Ornu mbecy rsheed ziy de̱, orze' ragye̱e̱ la̱ de̱ lo dey. 13Ornu mbecy rnii ziy ne̱ de̱, orze' nap la rne̱e̱ du̱ de̱ yu. Par lo de mbecy na de̱ gal nu na toop. Nunu gashtal dzi na, na de̱ gal nu na toop. Na de̱ gal nu na de nu gu' bid nu yu' gyishlombecy. 14Ya̱ zeeda̱ gyicy ii lo der walab nu gyicya̱ nu gat lo der, sinu par nu do̱o̱ rishlo der, como de ru na der gal nu na tub i'ñ ya̱ nu dzi rca̱. 15Gun mas tii miily mbecy yu'y nu rlyuuy de coz ni Crisht ni der, tees tub zi uz der zu, gun ya̱ byaca̱ uz der nu nac Jesucrisht, gun laab ya̱ byapa̱ mne̱e̱ lo der de riidz nu sac nim. 16Nde' nu rnishba̱a̱ lo der nu gyicy der gal nu ricy ya̱. 17Nunu nde' nu zuu neza̱ Timoteo cyid yu lo der. Yu ze' nay gal na tub i'ñ ya̱, gun bicya̱ nu fert zir ricy cup yu consuel lo Shuaan den. Nunu tona' la rca̱ yu. Nunu tona' la la ricy paay. Yu ze' gyicy yu nu gyeza' lagy der lac mod rlagy ñi nu chu' de mbecy nu ricy cup consuel lo Crisht. Niiy de coz nu rlyu̱u̱ lat de mbecy ni Crisht dela lugaar ze' nu rdeda̱. 18Gun yu' mbecy lat der nu tona' la byale'y. Rsa' lagy dey nu rila wayap güi̱i̱ der. 19Tees benu Shuaan den rlagy mi, orze' ya̱ yap gyiily la̱ nu yap güi̱i̱ ga̱' der. Gaze' nu gad lagya̱ la ñuu coz rac ricy de mbecy le' ze'. Walab tub lo zi'l de coz nu rnii dey. 20Gun lat de mbecy nu riib ic Ñgyoozh, walab nu riidz zi'l rnii dey, sinu coz ily ricy dey nu nac mi. 21Ornu yap güi̱i̱ der, ¿ca na coz rlagy der? ¿A rlagy der nu rica̱ cashtig ni der, uti rlagy der nu ca̱ der, nunu nap gyicy du̱ der?

will be added

X\