1 Corintios 3

1Der bicy na, ya̱ wangac ne̱e̱ lo der gal nu rne̱e̱ lo de mbecy nu riib ic Espiriit Yon ni Ñgyoozh, sinu mne̱e̱ lo der gal nu rdunii lo de mbecy nu rzu bich nu nac coz nu rlagy ub zi'l. Gun par de coz ni Crisht, na der gal nu na tub mdoo, gun wagad lagy nap der. 2Ya̱ blyu̱u̱ de coz a̱' biigy ni der gal nu ricy biñ mñaa ornu rgaagy mi mdoo nim. Gal nu na mdoo miiñ nu wacyiiñ yu gow yu gyit, ni na de ru nu wacyiiñ der nu gyeñ ru de coz biigy ni Crisht. Mas na wagac ne̱e̱ de coz biigy ze' lo der. 3Gun gabee rzu bich der nu nac de coz nu rlagy ub zi'l der. Ornu ricy der gyel saap lagy, ro zi der riidz nu losa'r. Wagyap riidz ni der. Orze' rabee nu rzu bich der nu nac coz nu rlagy ub zi'l der. Ricy der gal nu ricy cualcyer la mbecy. 4Gun ornu tub der rniir: “Ya̱ nac du̱ Baly”, rnii der. Ze' tuuba' der rniir: “Ya̱ nac du̱ Apolos”, rnii der. Orze' rabee nu ricy der gal nu ricy cualcyer la mbecy, walab gal nu rlagy Ñgyoozh. 5Tees ¿cyu nac ya̱, Baly? Nunu ¿cyu nac Apolos? De̱ ya̱ nac de̱ yu nu ricy de coz nu rlagy Ñgyoozh. Nunu par nu nac de̱ ya̱, nde' nu ricy cup der consuel lo Shuaan den. Tub ga la de̱ ya̱ nu riiñ nu ricy de̱, riiñ nu bzeeñ mi ya̱a̱ de̱. 6Ornu ya̱ mne̱e̱ cyu nac Crisht lo der, orze' nde' nañ gal na nu mnuuza̱ tub mbigy nañ lardoo der. Ze' Apolos bdiily yu ya mni ze' ornu blyuuy ni der zañ zir coz ni Crisht. Tees Ñgyoozh, mi ze' biñ nu ricy nu raly ñi ornu ricy nap mi nañ lardoo der. 7Walab dzi coz ily nac yu nu rnuuz ñi, nunu ni' walab dzi coz ily nac yu nu rgyiily ñi. Tees Ñgyoozh zily zir nac mi, gun mi ze' ricy mi nu raly ñi. 8Yu nu rnuuz ñi, gal nu yu nu rgyiily ñi, tub zi'l nac dey, nunu Ñgyoozh gyabic mi i dey dub gal lac na riiñ nu ricy tub ga la dey. 9Gun de̱ ya̱ tublaazh la ricy de̱ riiñ nim nu losa̱'. Ze' de ru na der gal na yu nim, ze' nu ricy de̱ riiñ. O na der gal na tub yu' nu rzaam. 10Nu nac faboor nu bicy nu Ñgyoozh ya̱, bicya̱ gal nu ricy tub biryu. Ñgyoozh bicy mi nu bzu̱ simient ni yu' ze', gun ya̱ bzata̱ Crisht lo der loga la. Ze' tuuba' mbecy rshup yu yu' lo simient nu bi zu ze'. Tees tub ga la den rlagy ñi nu nu cuidad shup den yu' ze'. 11Gun ni tub la mbecy wac gzuy reña' simient ni yu' nu bi zu ze', gun simient ze' bi bzu Ñgyoozh ñi, nunu simient ze', nde' ub la Jesucrisht. 12De ub na gac shup na yu' ze' nu zañ lo coz. Mbecy nu tona' la nap na riiñ ricy, yu ze' nay gal nu na tub mbecy nu shup yu' nu or. Yu' ga'y nay gal nu na tub mbecy nu rshup yu' nu plat. Yu' ga'y nay gal nu na tub mbecy nu rshup yu' nu gyita' nu dzi sac. Ze' yu' ga' mbecy beñ nap na riiñ nu ricy yu. Yu ze' nay gal nu na mbecy nu rshup yu' nu yag. Yu' ga'y nay gal nu na tub mbecy nu rzaa yu' nu gyizh. Yu' ga'y nay gal nu na tub mbecy nu rgu' lo' yu' nu yagyi. 13Ornu shuub dzi nu gri bee Jesucrisht ni dela mbecy, orze' gyu' bee la na riiñ nu ricy tub ga la mbecy. Gun Jesucrisht gyicy mi preb dela riiñ nu bicy de mbecy, gal nu ricy gyi nu rzaay ñi tub la coz. Orze' gabe la na riiñ nu bicy tub ga la mbecy, ben a gagyeñ nu wayic ñi lo gyi. 14Benu de coz nu pshup mbecy lo simient ze' wayic ñi lo gyi ze', orze' gyad iy. 15Tees benu de coz nu pshup mbecy lo simient ze' chic ñi lo gyi ze', orze' leew la bicy yu riiñ. Nit lo dela riiñ nu bicy yu, mas ub yu gruu mbañ yu. Tees nay gal na tub mbecy nu ruu chu lo gyi. 16¿Walab gaal wagad lagy der nu nac der yu' wedz ni Ñgyoozh, nunu Espiriit Yon nim rcyiiñ mi lat der? 17Benu tub mbecy gnuy yu' wedz ze', orze' Ñgyoozh gnum yu, gun yu' wedz nim nde' tub coz yon, nunu yu' wedz ze' nim, nde' de ru. 18Rlagy ñi nu cue' ga' guu der ub ru. Benu ca na tub mbecy tona' la yu' shcab niy nu nac de coz nu yu' gyishlombecy ii, orze' rlagy ñi nu cue' gyicy le'y, sinu gyicy yu ub yu par tub mbecy nu wagad lagy la, gun orze' gac yu tub mbecy nu rishli yu' shcab ni. 19Gun shcab nu rzii mbecy nu tona' la shcab lily, nde' shcab ton par Ñgyoozh. Gun bi cañ lat de riidz nu bzeeñ mi ze'. Orze' rniiñ: “De mbecy nu yu' shcab ni dunu dey par nu nac de coz nu rboo ic dey”, rniiñ. 20Tub se' ga' lat de riidz ze' nim rniiñ: “Shuaan den rad lagy mi nu se la la cyiiñ de coz nu rnii too de mbecy nu dzi yu' shcab ni”, rniiñ. 21Nde' nu ni tub la mbecy walagy ñi nu gyicy dey gyel le' niy nu nac ca na mbecy, gun dela coz nde' par de ru. 22Ñgyoozh bzeed mi ya̱, Baly, nu Apolos, nu Bed par nu locyuub de̱ der. Nunu bicy mi nu dela coz nu yu' gyishlombecy ii nde' par de ru. Briic mi gyel mbañ ni der, nunu ni' zi'l bicy mi nu nap par de ru mas gat der. Bicy mi nu de coz nu yu' na nde' nap par de ru, nunu tub tanta' de coz nu chu' par lo. Dela coz ze' bicy mi ñii nu nap par de ru. 23Nunu de ru nac der ni Crisht. Ze' Crisht nac mi ni Ñgyoozh.

will be added

X\