1 Corintios 2

1Der bicy na, ornu byap shaala̱ de riidz nu rishli ni Ñgyoozh lat der, walab nu riidz biigy mne̱e̱ ñii. Nunu ni walab nu bicya̱ ñii nu nac schab lily ni uba̱. 2Gun lat nu gusa̱ lat der, bicya̱ nu wangad lagya̱ de' zir de coz, nomaas nu gut Jesucrisht lo cruuz nu nac de ub na, nde' zi'l gud lagya̱. 3Nunu ornu bri̱ lat der, ya̱ guze̱e̱ nu wacyiiña̱ guze̱e̱. Gush la bisa̱, nunu tona' la gudziba̱. 4Ornu ya̱ pshaala̱ riidz ni Ñgyoozh lo der, nunu ornu blyu̱u̱ ni der, walab nu riidz ni mbecy lily pcuugya̱ lardoo der, sinu bguugy lardoo der nu nac coz nu bicy Espiriit Yon ni Ñgyoozh, nunu nu nac de coz ily nu bicy Ñgyoozh lat der. 5Gun orze' consuel nu ricy cup der lo Ñgyoozh nde' par nu nac nu dzi coz ily ricy mi, nde' nu ricy cup der consuel lom, walab par nu nac shcab ni mbecy lily. 6Tees ya̱ ni' zi'l rne̱e̱ riidz lily par de mbecy nu bi rad lagy nap de coz ni Crisht. Tees riidz ze', nde' walab riidz lily ni de mbecy nu yu' gyishlombecy na. Ni walab riidz lily ni de mbecy nu riib ic gyishlombecy ii, de yu nu bi ca lo cuen nu nit lo. 7De coz nu rzata̱ lo der, nde' coz lily nu bruu lo Ñgyoozh. Coz ze' wancuic Ñgyoozh nu ñgyad lagy de mbecy gulas tees gal na briic mi nu gad lagy den. Nunu nde' psa' lagy Ñgyoozh nil nese anzir nu gzub gyi' gyishlombecy gun orze' zac den lo gyel lily nu ca lo cuen nu gad nin. 8Ni tub la de mbecy nu riib ic gyishlombecy ii wangyet lag dey cuen de coz ze', gun benu ñgyet lag dey cuen, orze' wacaa dey Shuaan den lo cruuz, biñ nu tona' la zily nac. 9Tees lat de riidz nu bzeeñ Ñgyoozh rniiñ: Ñgyoozh bi bzu lily mi tub coz par de yu nu rcam. Coz ze', nde' tub coz nu rila nigul zac ur lo la mbecy, nunu rila nigul gyeñ gyidag la dey, nunu ni wagnii too dey nu nac ñii, rniiñ. 10De coz ze' Ñgyoozh bicy mi nu rad lagy de ub na nu nac Espiriit Yon nim. Espiriit Yon nim gyet lag mi cuen dela coz, mas de coz biigy ni Ñgyoozh. 11Ze' par de mbecy, nomaas espiriit nu ri nañ lardoo ub zi'l dey rad lagy ñi de coz nu yu' nañ lardooy. Ni' zi'l Ñgyoozh. Espiriit Yon ni ub zi'l mi rad lagy mi de coz nu yu' nañ lardoom. 12Ze' de ub na a̱' ricy cup na espiriit nu rzu bich nu nac gyishlombecy ii, sinu de ub na ricy cup na Espiriit Yon nu bruu lo Ñgyoozh. Gun orze' gad lagy den de coz nu cuic leew lam nin. 13De coz ze' rne̱e̱ lo der nu riidz nu blyuu Espiriit Yon ni Ñgyoozh ne̱. Ni mod rshaal de̱ de coz rishli ni Ñgyoozh lo de mbecy nu ricy cup Espiriit Yon nim. Walab nu rshaal de̱ ñii nu riidz nu bloo ic de̱. 14De mbecy nu a̱' riib ic Espiriit Yon ni Ñgyoozh, wagnii dey “O” ornu rbic mi de coz nim ni dey, gun par de yu ze', nde' coz ton zi'l. Nunu ni wac gyet lag dey cuen de coz ze', gun de coz ze' rlagy ñi nu Espiriit Yon ni Ñgyoozh locyuub mi den, par nu gad lagy na ben a nde' coz nap nim. 15Tees mbecy nu riib ic Espiriit Yon ni Ñgyoozh, yu ze' nap yet lag yu cuen dela coz. Ze' de' zir mbecy wagyet lag dey cuen de coz nu ricy yu. 16Riidz nu bzeeñ Ñgyoozh rniiñ: Ni tub la mbecy wagad lagy dey la coz rnii too Ñgyoozh, Shuaan den. Nunu ni tub la mbecy wac glyuuy nim, rniiñ. Tees de ub na ricy cup den shcab ni Crisht.

will be added

X\