1 Corintios 16

1Na par ornu te' der de tiñ nu glocyuub der de mbecy ni Ñgyoozh nu yu' lo de yu nu la Judea, rlagy ñi gyicy der mod nu mne̱e̱ lo tub nac ga de mbecy ni Crisht nu yu' lo de yu ni Galacia. 2Tub noming ga rlagy ñi nu co reñ der ñuu tiñ. Dub gal lac ricy der gan dub ni cuic der. Orze' cu' choow der ñii, gun orze' ornu yapa̱, walagy ñi dude' de tiñ ze'. 3Ornu yapa̱, orze' zeeda̱ de mbecy nu bi pcui der ze', nu cha nu dey de tiñ ze' par Jerusaleeng, nunu cha nu dey tub gyicy ni rishbeey nu zeeda̱ lo de bicy na nu yu' lugaar ze'. 4Benu galagy ñi nu cha̱, orze' ni' zi'l ya̱ cha̱ du̱ dey. 5Nez nu yapa̱, rlagy ñi nu deda̱ lo de mbecy nu yu' Macedonia. Orze' niga deda̱ par lo de ru. 6Rlagya̱ gyiyeeñ du̱ der tub tiem, ben a wac cyiiña̱ lat der dub laa lat lascyey. Orze' gac locyuub der ya̱ nu de coz nu galagy ñi ne̱ ornu cha̱ tuuba' lugaar. 7Walab nu rlagy zi'l ya̱ nu zaca̱ der nez nu deda̱, sinu rlagya̱ nu les cyiiña̱ lat der benu zaan Shuaan den. 8Tees gyiyeeña̱ Éfeso ii gashtal shuub la dzi nu chu' sa' ni Pentecostés. 9Gun mas yu' zigy mbecy nu zay contr ni Shuaan den, tees na tiem niñ par nu gyicya̱ gan de riiñ ily nim Éfeso ii. 10Benu gri Timoteo lo der, orze' gyicy der nu nap zu lagy yu, gun yu ze' ricy yu riiñ ni Shuaan den gal nu ricy ya̱. 11Cue' gyicy gyidz der yu, sinu rlagy ñi nu locyuub der yu nu de coz nu galagy ñi niy par ornu chay tuuba' lugaar, gun orze' cush cyay cyida'y lo̱. Gun ya̱ rishlo̱ yu nu cyid yu nu de' zir de bicy na. 12Ze' Apolos, ya̱ mnishba̱a̱ loy nu cyid güiiy der gal nu de' zir de bicy na. Na la walagy yu cyid yu. Tees ornu gad mod niy orze' cyid yu. 13Bicy cuidad der ub ru ni de coz a̱' nap. Nunu ni cue' gya' ich der nu nac de coz ni Crisht. Cue' dzib der. Bzu fert der. 14Nunu dela coz nu gyicy der, bicy der ñii par nu nac nu rca der losa'r. 15Der bicy na, de ru rad lagy der nu par de' zir de mbecy nu yu' lo yu ni Acaya, Estéfanas nu de famil niy, de yu ze' byac dey mbecy ni Crisht nu loga la, nunu de yu ze' byu'y lo de riiñ par nu locyuub dey de mbecy ni Crisht. 16Der bicy na, rlagya̱ nu gyicy yac der nu de coz nu rnii de yu ze', nunu de coz nu rnii de mbecy nu na gal nu na de yu ze'. Nunu bicy yac der nu cyu zi'l mbecy nu ricy nu dey riiñ. 17Tona' la yet lagya̱ nu biid Estéfanas, nu Nat, nu Acaico. De yu ze' blocyuub dey ya̱ lugaar ni de ru, gun sac der ii. 18Gal nu bicy dey nu bet lagy de ru, ni' zi'l bicy dey nu bet lagya̱. Cyu zi'l mbecy nu ni na gal nu na de yu ze' rlagy ñi nu griib zily der yu. 19Dela de mbecy ni Ñgyoozh nu yu' lo yu ni Asia, bzeed dey ñgyoozh ni der. Aquila nu Priscila gal nu dela de mbecy ni Crisht nu ryatublaazh nañ yu' dey bzeed dey ñgyoozh ni der como ni' nac der mbecy ni Crisht. 20Dela de bicy na nu yu' ii bzeed dey ñgyoozh ni der. Dela der nap nii nu der losa'r par nu gabe nu nac der losa' bicy ru. 21Ya̱ Baly, ca̱a̱ de riidz ii nu ya̱a̱ nu zeeda̱ ñgyoozh ni der. 22Benu tub mbecy wacay Shuaan den Jesucrisht, orze' bi gul yu duu. ¡Shuaan de̱, da! 23Shuaan den, Jesucrisht, nap gyicy num der. 24Nunu bi neñ der nu ya̱ rca̱ der nu nac Jesucrisht.

will be added

X\