1 Corintios 15

1Na der bicy na, gyicya̱ nu gyeza' lagy der de riidz nu sac ni Crisht nu pshaala̱ lo der. Riidz ze' bi gush der ñii, nunu nde' riib ic ñi der na. 2Ni' par nu nac de riidz nu pshaala̱ ze', gruu mbañ der, benu gyicy yac der nur ñii, benu walab nu nu ru' zi'l der gyicy cup ru consuel loñ. Gun benu nu ru' zi'l der gyicy cup ru consuel loñ, orze' leew la gyicy cup ru consuel loñ. 3Ya̱ brica̱ nu gad lagy der de coz nu gud lagya̱, de coz nu ricy zir ñi presis par de' zir de coz. Nde' nu gut Crisht par nu nac cyi den gal nu rnii de riidz ni Ñgyoozh. 4Orze' pcach dey mi. Orze' dzi chon byabañ mi gal nu rnii de riidz ni Ñgyoozh. 5Orze' bruu sac mi lo Bed. Orze' bruu saca'm lo de trocyupa' de aposht. 6Orze' despuees bruu saca'm lo zigy zir de bicy na lat nu yu' tublaazh dey. Bded gaay gaynal dey nac yu yu'y. Nunu zigy dey gabee yu' mbañ yu na, nomaas la be zi'l dey bi gut yu. 7Despuees orze' bruu sac mi lo Santiag. Gaze' nu bruu sac mi lo dela de' zir aposht. 8Ornu laab nde' la nu blazh ze', orze' bruu sac mi lo ya̱. Ya̱ bzaca̱ gal nu rzac tub mdoo nu gul anzir nu shuub tiem ni ornu bzaaca̱m. 9Gun ya̱ gash zir zu̱ par lo de' zir de aposht. Ni wangyapa̱ nu nii dey ya̱ aposht, gun ya̱ psheed zi̱ de mbecy ni Crisht. 10Tees nu nac nu Ñgyoozh nap bicy num ya̱, nac la̱a̱ ca na nu naca̱. Nunu walab nu leew la nap bicy num ya̱, gun ya̱ ricy zira̱ riiñ nim gaze' de' zir de aposht. Tees walab nu bicya̱ de riiñ ze' ub zi̱, sinu Ñgyoozh bicy mi faboor num ya̱ nu blocyuub mi ya̱ nu gyicya̱ ñii. 11Tees a̱' ricy ñi presis nu cyu bicy zir riiñ: ti ya̱ o de' zir de yu ze', gun tub zi'l riidz rne̱e̱ de̱ lo der, nunu lo de riidz ze' ricy cup der consuel. 12Tees como de̱ ya̱ rshaal de̱ lo der nu Crisht byabañ mi, orze' ¿lagu yu' ru' la be mbecy lat der nu rnii dey nu wayabañ de mbecy nu bi gut? 13Tees benu wayabañ de mbecy nu bi gut, orze' ni' Crisht wangyabañ mi. 14Nunu benu cue' ñgyabañ Crisht, orze' de riidz nu rshaal de̱ lo der se la la sac ñi, nunu se la la sac ñi nu gyicy cup den consuel lom. 15Benu ni, orze' de̱ ya̱ nu bgu̱u̱ de̱, gun mne̱e̱ de̱ nu Ñgyoozh bicy mi nu byabañ Crisht. Tees benu rishli nu wayabañ de mbecy nu bi gut, orze' walab rishli bicy Ñgyoozh nu byabañ Crisht. 16Gun benu wayabañ de mbecy nu bi gut, orze' ni' Crisht wac ñgyabañ mi. 17Benu cue' ñgyabañ Crisht, orze' se la la sac ñi nu gyicy cup der consuel lom, nunu benu ni, orze' nigul gyicy sulagy Ñgyoozh de cyi der. 18Benu ni, ni' de mbecy nu bi gut, de yu nu bicy cup consuel lo Crisht, mnit lo dey. 19Benu lat nu yu' zi'l den gyishlombecy ii na, drish lo den lo Crisht, ze' wayabaña' den, orze' cuaa zir de ub na gaze' de' zir de mbecy. 20Tees rishli Crisht byabañ mi ornu gut mi. Mi ze' biñ nu byabañ loga la par lo de' zir de mbecy nu gyabañ par lo. 21Gun gal nu rat den nu nac tub zi mbecy, ni' zi'l gyabañ den nu nac tuuba' zi mbecy. 22Gun dela mbecy rat dey gyi' nu nac dey nez Adaang. Orze' ni' zi'l mod gyabañ dey gyi' nu nac nu dey Crisht. 23Tub ga la mbecy gyabañ yu ornu shuup tiem niy. Nu loga la byabañ Crisht. Orze' despuees gyabañ de mbecy nu nac nim, ornu cyid mi tuuba' tir. 24Orze' shuub dzi nu gya' lo dela coz. Orze' Crisht gyicy mi gan dela losa' yuum, nunu gu'm gyel gubier nim yaa Ñgyoozh, Uz mi. 25Gun Crisht rlagy ñi nu gyub ic mi gashtal gyicy lam gan dela losa' yuum. 26Orze' laab nde' la gyicy mi gan nu checa nu gat mbecy. 27Gun Ñgyoozh bicy mi nu Crisht gyub ic mi dela coz. Nomaas rabee nu walab nu gyub ic mi Ñgyoozh. 28Tees ornu Crisht gyub ic mi dela coz, orze' “O” niim nu gyub ic Uz mim, biñ nu bicy nu gyub ic mi dela mbecy. Orze' Ñgyoozh gyub ic mi dela coz. 29Yu' mbecy nu rzu nis dey nu nac de mbecy nu bi gut. ¿Lagu ni ricy dey benu wayabaña' de añ? 30Ze' par de̱ ya̱, ¿lagu de or la yu̱' de̱ lo rishdzidz nu gat de̱? 31Segur la rishli, der bicy na, de dzi la rdeda̱ lo rishdzidz nu gata̱. Tees yet lagya̱ nu nac der como nac der mbecy ni Shuaan den Jesucrisht. 32Orze' se la la pcyiiñ nu ptub su̱ de̱ de mbecy Éfeso, de mbecy nu na gal nu na bañ dañ, benu wayabañ den ornu gat na. Benu ni, orze' nap zir gyicy la den gusht gal nu rnii de mbecy ornu rniiy: “¡Dow na, do'n gun dzi ga gat na ina!”, rnii dey. 33Cue' zaan der nu guu mbecy ru. “Benu mbecy a̱' nap chesa nuy mbecy nap, orze' gyicy yu nu gnu mbecy nap”, rnii dey. 34Orze' pchaa der mod nu gyicy ru, nunu cue' ga' gyicy der coz cyi. Gun yu' mbecy lat der nu a̱' yu' lo dey Ñgyoozh. Nde' nu ni rne̱e̱ de riidz ii lo der par nu gat lo der. 35Che chii la ca na mbecy cugyi'y: “¿Nu lac mod gyabañ de mbecy nu bi gut? ¿Nu lac na cuerp ni dey?” nii dey. 36¡Nde' tub coz ton nu nii dey! Benu nuuz der tub mbigy tub ya mni, warib ñi benu wanit lo mbigy nu bdunuuz ze'. 37Coz nu nuuz der ze', nde' walab ub la ya mni, sinu nde' mbigy zi'l ñi: tub mbigy trig o la zi'l reña' lo mbigy. 38Tees Ñgyoozh gyicy mi nu galy ya mni ze', nunu gyicy mi nu gyac mbigy ze' gal nu na nu ub mi rlagy mi. Tub lo ga de mbigy ze' ricy mi nu reñ ga la nu nañ gac ñii. 39Nunu walab tub zi'l nu na beel mbecy nu de beel bañcyug. Reñ na beel mbecy, nunu reñ na beel bañcyug. Reñ na beel chigyiñ nunu reña' na beel bel gyoow. 40Ni' de coz nu ta' baa, reña' nañ par de coz nu yu' lo yu ii. De coz cyit na nu ta' baa reña' rabeeñ par de coz cyit na nu yu' lo yu ii. 41Cyit rabee doo güidz. Beey cyita' rabee ma. Tees reña' rabee ma par doo güidz. Bel baa reña' rabee ma. Mas de bel baa, reñ ga la rabee tub ga ma lat de losa' ma. 42Ni' zi'l mod gac ornu gyabañ de mbecy nu bi gut. Ornu rdugach cuerp ni mbecy, orze' gyayuñ. Tees ornu gyabañ ñi orze' wata'ñ. 43Ornu rdugach dey, orze' shni na dey; tees ornu gyabañ dey, orze' tona' la gyafert dey. 44Ornu rdugach dey, orze' cuerp ni dey nac ñii coz ni gyishlombecy ii; tees ornu gyabañ dey, orze' cuerp ni dey gyac ñi coz ni gyibaa. Yu' cuerp nac ñii ni gyishlombecy ii, nunu yu' ga' cuerp nu nac ñii ni gyibaa. 45Gun lat de riidz nu bzeeñ Ñgyoozh rniiñ: “Adaang, yu nu bzuub gyi'ñ nu rach mbecy, yu ze' byac yu tub mbecy mbañ. Ze' Crisht, biñ nu bzuub gyi'ñ nu gyabañ mbecy, mi ze' nac mi tub mbecy nu wat nu rbic gyel mbañ”, rniiñ. 46Nu loga la Ñgyoozh briic mi cuerp ni gyishlombecy ii ni den. Orze' despuees cuic mi cuerp ni mbecy gyibaa ni den. 47Nu loga la, Adaang psa' lagy Ñgyoozh yu nu yu. Tees nu cyup Crisht bruum gyibaa. 48Dela mbecy ni gyishlombecy na dey gal nu na Adaang, yu nu byaa nu yu, tees de mbecy nu nac nu Crisht na dey gal nu na biñ nu bruu gyibaa. 49Orze' na, na den gal nu na mbecy nu byaa nu yu, tees par lo gyac den gal nu na Crisht, biñ nu bruu gyibaa. 50Der bicy na, ya̱ rne̱e̱ ni cuerp gyidz ii ni den, cuerp ni beel nu ni rit, nii rila wac chu'ñ lo gyel gubier ni Ñgyoozh. Ni' cuerp gyidz ii ni den wacyiiñ ñi par nu gagyeñ tub la. 51Rlagya̱ gad lagy der tub coz nu wagad lagy la de mbecy. Walab dela den gat na. 52Tees nañ tub miiñ zi'l dela den dza nu nan. Tub lat nu shet zi'l gyid iz na, ornu dulaa trompet, orze' dela de añ gyabañ dey, nunu rila wata' dey. Nunu dza nu na dela den. 53Gun cuerp nu gat ni den ii rlagy ñi nu dzañ. Gyac ñi tub cuerp nu rila wata'. 54Orze' ornu cuerp ni den nu gat ii gyac ñi cuerp nu rila wata', orze' gyu' ni de riidz nu bzeeñ Ñgyoozh, ze' nu rniiñ: “Bi bicy mbecy gan. Rila wata' dey”, rniiñ. 55Orze' gyel gut rila wayicya'ñ gan dey. Rila wayicya'ñ nu zac zi ga' dey nu gat yu. 56Gat den nu nac de coz cyi nu bicy den. Nunu bicy den cyi como wangyicy den gal nu rnii leey nu bzeeñ Ñgyoozh. 57Tees gric den gras ni Ñgyoozh, gun bicy mi nu gyicy den gan nu nac de coz nu bicy Shuaan den Jesucrisht. 58Na der bicy na, bzu fert der nu nac de coz ni Crisht, nunu bicy paa der nim. Bloo lo der nu de riiñ nu ricy ru ni Ñgyoozh, gun bi neñ der nu la zi'l coz ni Ñgyoozh nu ricy der walab nu leew la ricy der ñii.

will be added

X\