1 Corintios 14

1Bicy der nu car losa'r. Bdiiñ der lo Ñgyoozh nu gyicy mi nu cyiiñ der nu gyicy ru riiñ nim nunu ricy zir ñi presis nu cyiñ der riiñ nu gac gnii der de riidz nu druu lom. 2Gun de mbecy nu rnii riidz reña' mbecy, walab lo mbecy rniiy ñi, sinu lo Ñgyoozh, gun de mbecy rila wagyet lag dey cuen de riidz nu rniiy. De riidz nu rnii de mbecy ze', nde' rniiy ñi por nu nac Espiriit Yon ni Ñgyoozh, tees dela riidz nu rniiy ze', nde' riidz nu wagyeñ dey. 3Tees de mbecy nu rshaal riidz nu druu lo Ñgyoozh laab nu riidz yu, de yu ze', rniiy ñi lo dela mbecy par nu locyuub yu dey, nunu rbic yu baloor ni dey, nunu rbic yu consuel ni dey. 4Ze' de mbecy nu rnii riidz reña' mbecy, de mbecy ze' laab ub zi'l yu rlocyuub yu. Tees de mbecy nu rshaal riidz nu druu lo Ñgyoozh, de yu ze' rlocyuub yu dela de mbecy ni Crisht. 5Yet lagya̱ benu dela der niir nu riidz reña' mbecy, tees gyet zir lagya̱ benu dela der cyiiñ ru nu shaal ru riidz nu druu lo Ñgyoozh. Gun dzi zir sac de mbecy nu rnii riidz nu druu lo Ñgyoozh gaze' de mbecy nu rnii riidz reña' mbecy. Nomaas benu grusu tub mbecy nu shaal de riidz reña' mbecy ze', gaze' nu sac ñi, gun orze' locyuub yu dela mbecy ni Crisht. 6Nde' nu der bicy na, ¿la cyiiña̱ yapa̱ lo der benu ne̱e̱ nu riidz reña' mbecy? Orze' se la la cyiiña̱. Tees benu shaala̱ lo der tub riidz nu briic Ñgyoozh nu ne̱e̱, o benu ne̱e̱ lo der tub coz nu rlagy ñi nu gad lagy der, o benu shaala̱ lo der tub riidz nu druu lo Ñgyoozh, o benu lyu̱u̱ ni der tub coz ni Ñgyoozh, benu ni gyicya̱, orze' cyiiña̱ ni der. 7¿A wacu' cuen der de gyiib ni musiic? Tub bdzi o tub arpa, mas walab nu mbañ ñii, tees benu a̱' nap rsiigy dey ñi, orze' wad lagy den la di rbooñ, gun a̱' nap rsiigy dey ñi. 8Ni' zi'l ornu rzu' gyel yuu. Benu mbecy nu rlaa trompet a̱' nap rlaay ñi, orze' wazu lily de soldad par nu chucooy. 9Ni' zi'l mod wagyet lag mbecy cuen de coz nu gnii de ru, benu nii der nu riidz reña' mbecy. Orze' nde' nañ gal nu na nu lo bi la gnii der ñii. 10Zañ lo riidz yu'ñ gyishlombecy, nunu segur la yu' mbecy nu gyet lag yu cuen tub lo ga de riidz ze'. 11Benu ya̱ wagyet laga̱ cuen de riidz nu rnii tub mbecy, orze' mbecy ze' nay gal nu na tub mbecy nu walab losa̱', nunu ya̱ na gal nu na tub mbecy nu walab losa' yu ze'. 12Como rlagy der cyiiñ ru nu gyicy ru riiñ nu rbic Espiriit Yon ni Ñgyoozh, nde' nu ricy zir ñi presis nu gyicy der fers nu gyicy ru riiñ par nu locyuub ru de mbecy ni Crisht. 13Orze' de yu nu rnii riidz reña' mbecy, rlagy ñi nu cyiñ dey lo Ñgyoozh nu gyicy mi nu cyiiñ dey shaal yu de riidz ze'. 14Gun benu ya̱ ne̱e̱ du̱ Ñgyoozh nu riidz reña' mbecy, orze' ne̱e̱ du̱m nañ lardo̱o̱ zi'la̱. Tees shcab ne̱ wagad lagy ñi la coz rne̱e̱. 15Orze' ¿la coz gyicya̱? Ornu rne̱e̱ du̱ Ñgyoozh, rne̱e̱ coz nu druu nañ lardo̱o̱, tees ni' zi'l rne̱e̱ de coz nu yet laga̱ cuen. Ornu rdula̱, rdula̱ nu dutuub la lardo̱o̱, tees ni' zi'l rdula̱ de coz nu yet laga̱ cuen. 16Ornu rbic der gras ni Ñgyoozh nu riidz reña' mbecy, orze' ¿lac mod nii de' zir de mbecy: “Laab ni”, nii dey? Ze' ii wangyet lag dey cuen coz nu rnii der. 17Mas tona' la cyit za de riidz nu rnii der, tees rila walocyuub ñi de' zir losa' der. 18Ya̱ drica̱ gras ni Ñgyoozh, gun ya̱ dzi zir rne̱e̱ nu riidz reña' mbecy gaze' de' zir de ru. 19Tees lat de mbecy ni Crisht, yet zir lagya̱ nu lyu̱u̱ gaay zi riidz nu gyet lag dey cuen gaze' nu ne̱e̱ tii miily riidz reña' mbecy nu wagyet lag dey cuen. 20Der bicy na, cue' gash der shcab mod nu rash de yu nguzh mi'. Bicy der mod nu ricy de yu nguzh mi' nu wagyicy yu coz a̱' nap. Tees ornu gash der shcab, bicy der mod nu ricy mbecy gush. 21Gun lat de riidz nu bzeeñ Ñgyoozh mniim lac gyicy num de mbecy Israeel. Orze' nam: “Gne̱e̱ lo de mbecy Israeel nu nac mbecy nu rnii reña' riidz, nunu nu nac de mbecy nu walab mbecy guledz. Tees mas ni gyicya̱ par wazuub gyidag dey ne̱”, nam. 22Gal nu bicy mi tiem ze', ni' zi'l ricy mi na, gun ornu cuic mi reña' riidz nu nii tub ga mbecy, nde' cyiiñ ñi par nu gad lagy de mbecy nu wagyicy cup consuel lom cyu nac mi. Walab nu cuic mi ñii par de mbecy nu bi ricy cup consuel. Ze' benu Ñgyoozh gyicy mi nu cyiiñ tub mbecy shaal yu riidz nu druu lom, orze' nde' cyiiñ ñi par de mbecy nu bi ricy cup consuel lom. Walab par mbecy nu wagyicy cup consuel. 23Orze' lat nu yatublaazh de ru, mbecy ni Crisht, benu dela der checuar niir riidz reña' mbecy, nunu benu lat la ze' chu' tub mbecy lat der, tub yu nu walab mbecy ni Crisht o tub yu nu a̱' nac nu der, orze' niiy nu raton der. 24Tees benu dela der niir riidz nu druu lo Ñgyoozh, orze' ornu chu' tub mbecy nu a̱' nac nu der o chu' tub mbecy nu walab mbecy ni Crisht lat der, orze' de riidz nu rnii der ze', orze' nde' lyuuñ niy nu nac yu mbecy cyi. Nunu de riidz ze' lyuuñ loy nu nac yu mbecy nu yu' falt ni nu nac nu gyet lag yu cuen dela coz nu rnii der. 25De riidz ze' gyicy caacy ñi de coz ngach nu rnii tooy. Orze' gzu tib yu, nunu griib zily yu Ñgyoozh. Orze' niiy nu rishli gaal zu Ñgyoozh lat der. 26Der bicy na, orze' i mod bicy der: ornu gyatublaazh der, tub ga la der ricy cup ru tub coz nu rlagy ru gul ru. Ze' tuuba' der lyuur ni de losa'r. Ze' tuuba' mbecy briic Ñgyoozh tub riidz nu niiy lo der. Ze' tuuba' mbecy rlagy yu niiy nu reña' riidz. Ze' tuuba'y rlagy yu nu shaal yu lac yaruu de riidz ze'. Tees dela coz ze' bicy der nu tub mod nu locyuub ñi dela de mbecy zigy. 27Benu la be mbecy rlagy yu nu niiy riidz reña' mbecy, orze' cyup zi'l mbecy o chon dey gac niiy. Cue' nu zigya' zir dey. Nunu bee lo dey niiy. Ze' tuuba' mbecy rlagy ñi nu shaal yu de riidz nu rnii dey ze'. 28Benu sac cyu nu shaal riidz ze', orze' mbecy nu rnii reña' riidz ze' rlagy ñi nu checay nu niiy lat de mbecy zigy. Orze' nañ lardoo zi'l yu gac niiy riidz ze' lo Ñgyoozh. 29Cyup mbecy o chon yu gac niiy riidz nu druu lo Ñgyoozh. Orze' de' zir mbecy ri zi'l gua dey gash yu shcab ben a laab ni gal nu rniiy. 30Tees benu Ñgyoozh cuic mi riidz nu nii tuuba' mbecy, orze' mbecy nu rshaal riidz ni Ñgyoozh ze' checay nu rniiy. 31Dela der gac nii der riidz nu cuic Ñgyoozh nu nii der, tees bee lo der niir, gun orze' gac dela mbecy zigy, nunu gad baloor ni dey. 32De mbecy nu rnii riidz nu druu lo Ñgyoozh gac gyub ic dey de riidz nu druu nañ lardooy. 33Gun Ñgyoozh wansa' lagy mi nu pshees chu' den, sinu Ñgyoozh psa' lagy mi nu gyicy den mod nu se'ñ. Bicy der gal nu ricy dela de' zir de mbecy ni Crisht lat nu yatublaazh dey. 34De biñ mñaa wac nii dem ornu yatublaazh de mbecy ni Crisht, gun nde' coz nu rlagy ñi. Nunu wac gyub ic dem lat de mbecy zigy gal nu rnii leey ni de mbecy Israeel. 35Benu rlagy mi gad lagy mi tub coz, orze' rlagy ñi cugyi'm lo ñgyeem ornu grim yu'm, gun a̱' nap benu tub biñ mñaa gniim lat de mbecy zigy, ze' nu rzat dey Crisht. 36Rlagy ñi gad lagy der nu de riidz ni Ñgyoozh walab lat de ru bzub gyi'ñ; ni walab lo de ru zi'l briñ. 37Benu tub mbecy rnii tooy nu cyiiñ yu shaal yu riidz ni Ñgyoozh o benu rnii tooy nu Espiriit Yon ni Ñgyoozh locyuub mi yu nu niiy, orze' rlagy ñi gad lagy yu nu Ñgyoozh bicy mi mandaar lo̱ nu ni ne̱e̱ de riidz ii lo der. 38Benu ca na mbecy wacheña lagy yu de nde', orze' cue' gyicy cuen der yu. 39Der bicy na, orze' bicy der nu gniir de riidz nu druu lo Ñgyoozh, tees cue' ca der ni de mbecy nu niiy nu reña' riidz. 40Dela coz nu gyicy der bicy der ñii mod nu se'ñ, nunu mod nu rlagy ñi.

will be added

X\