1 Corintios 13

1Mas Espiriit Yon ni Ñgyoozh shaal mi shcab ne̱ nu ne̱e̱ riidz reñ ga la de mbecy, nunu mas shaal mi shcab ne̱ nu ne̱e̱ riidz de anc, tees de riidz nu ne̱e̱ ze' se la la sac ñi benu waca̱ losa̱'. De riidz nu ne̱e̱ nañ gal nu na tub nu rzigy gyid o tub nu rzigy plati. 2Mas cyiiña̱ shaala̱ riidz nu druu lo Ñgyoozh, mas rad lagya̱ dela coz, mas gyet laga̱ cuen dela coz biigy ni Ñgyoozh, mas tona' la ricy cupa̱ consuel lo Ñgyoozh, gashtal gac gyicya̱ nu cha̱a̱ se' tub bicy, tees benu waca̱ losa̱', orze' se la la saca̱. 3Mas rica̱ dela coz ne̱ ni de mbecy zi, nunu mas zaana̱ caa dey gyi cuerp ne̱ par nu nac Crisht, se la la cyiiña̱ benu waca̱ losa̱'. 4Benu rca den losa'n, orze' gyicy cup den pase̱z dun dey, nunu nap gyicy dun dey. Benu rca den losa'n, orze' rila wayicy saap lagy den ich yu, ni wayabic den gyel mbecy ni de ub na. Ni a̱' nac den mbecy le'. 5Benu rca den losa'n, orze' wayicy ñgya den loy; ni wazu fert den nu nac coz nu rlagy ub zi'l na; ni wacha' ic den. Benu rca den losa'n, orze' ni wayeza' lagy den loy ornu shiñ ricy nuy ub na. 6Benu rca den losa'n, orze' wagyet lagy den ornu shiñ ricy nu mbecy dey, sinu gyet lagy den ornu gyicy de mbecy mod nu se'ñ. 7Benu rca den losa'n, orze' gagye la den la zi'l mod nu nay. Segur la gyicy cup den consuel loy, nunu rishlo den loy nu gyicy yu gan, nunu gyicy cup den pase̱z niy. 8Nu rca den losa'n, rila wayecañ. Shuub dzi nu walagya'ñ nu shaal den riidz ni Ñgyoozh; ni walagya'ñ nu gyicy mi nu nii den riidz reña' mbecy, ni walagya'ñ nu gyicy mi nu gad lagy den lac yaruu de coz. 9Gun Ñgyoozh ricy mi nu ñuu ga zi'l yet lag den cuen, nunu ricy mi nu ñuu ga zi rcyiiñ den nu shaal na riidz nu druu lom. 10Tees ornu shuub dzi nu gyanap den, ornu cyid Crisht tuuba' tir, orze' nap zir gad lagy den dela coz. 11Ornu gumiiña̱, mne̱e̱ mod nu rnii yu nguzh mi', nunu guze̱e̱ gal nu rzii yu nguzh mi', nunu brusha̱ shcab gal nu rash yu nguzh mi' shcab. Tees na bi guusha̱. Orze' walagya'ñ nu gyicya̱ mod nu ricy yu nguzh mi'. 12Na wagyet lag nap den cuen de coz ni Ñgyoozh. Rad lagy den gal nu rabee lo tub guan nu dzeeñ dzeeñ zi'l rabee loñ. Tees par lo se mbi la gabe dela coz, gun lo nu loo la zac den mi. Orze' gad lagy den gal nu rad lagy Ñgyoozh de coz nu yu' nañ lardoon. 13Tiem ze' chon coz nu ni zi'l gyicy den: nu gyicy cup den consuel lo Ñgyoozh, nunu rishlo den lom, nunu ca den losa'n. Tees coz nu ricy zir ñi presis lo chon coz ze', nde' nu ca den losa'n.

will be added

X\