1 Corintios 12

1Der bicy na, ya̱ do̱o̱ rishlo der nu lac na coz nu rbic Espiriit Yon ni tub ga la der. Walagya̱ nu gac der mbecy nu wagad lagy. 2De ru rad lagy der nu anzir nu gyicy cup der consuel lo Crisht, mas lac ruu tees dzi radza der nu nac de nab gop nu wagac nii. 3Tees na wagadza ga' der, benu rad lagy der nu ni tub la mbecy wac nii dey riidz nu rbic Espiriit Yon benu zaa lagy dey ni Jesuuz, nunu ni tub la mbecy wac niiy: “Jesuuz nac mi Shuaan na”, niiy, benu walab lo Espiriit Yon druu de riidz ze'. 4Reñ ga la mod cyiiñ tub ga la mbecy nu gyicy yu, tees laab tub zi'l Espiriit Yon ricy mi ñii. 5Reñ ga la mod ricy tub ga mbecy ornu ricy yu coz nu rlagy Ñgyoozh, tees laab tub zi'l Shuaan den Jesucrisht riib ic mi delañ. 6Zañ lo mod ricy Ñgyoozh num tub ga la mbecy, tees laab tub zi'l mi ricy mi delañ. 7Ñgyoozh bicy mi nu locyuub Espiriit Yon nim tub ga la mbecy, gun orze' locyuub yu dela losa'y. 8Espiriit Yon rbic mi shcab ni tub mbecy par nu cuic yu consef ni losa'y. Ze' tuuba' mbecy, laab mi ze' rbic mi shcab niy par nu shaal yu de riidz ni Ñgyoozh nu dzi nap rad lagy yu. 9Tuuba' mbecy, laab mi ze' ricy mi nu tona' la nap ricy cup yu consuel lo Crisht. Ze' tuuba' mbecy, laab ub lam ricy mi nu cyiiñ yu gyicy yac yu mbecy rat. 10Ze' tuuba'y ricy mi nu cyiiñ yu gyicy yu nusuriidz. Ze' tuuba'y ricy mi nu cyiiñ yu nu shaal yu riidz nu druu lo Ñgyoozh lo de mbecy. Ze' tuuba'y ricy mi nu cyiiñ yu nu gad lagy yu ti coz ni nuras, ti coz ni Espiriit Yon. Tuuba'y ricy mi nu gac niiy nu riidz nu rnii reña' mbecy. Ze' tuuba'y ricy mi nu cyiiñ yu shaal yu riidz ze'. 11Tees laab tub zi'l Espiriit Yon ricy mi dela nde'. Ricy mi nu cyiiñ tub ga lo mbecy nu gyicy yu reñ ga la mod gal nu ub mi rlagy mi. 12Gun de mbecy ni Crisht na dey gal nu na tub zi cuerp nu ricy cup zañ lugaar. Mas ricy cup ñi zañ lugaar niñ tees nac ñii tub zi cuerp. 13Ni' zi'l mod na de ub na. Lat den yu' mbecy Israeel. Nunu yu' mbecy nu walab mbecy Israeel. Yu' ga' mbecy nu nac yu moz ni losa'y por fers la. Yu' ga' mbecy nu nac yu patro̱o̱ ni dey. Tees Espiriit Yon bicy mi nu byac dela den stub zi cuerp ornu wi nis den. Nunu Ñgyoozh bzeed mi tub zi Espiriit Yon nu nac num den. 14Gun tub cuerp walab tub zi'l lugaar ricy cup ñi sinu zañ lugaar ricy cup ñi. 15Benu tub gyi'n niiñ: “Ya̱ a̱' naca̱ ni cuerp, gun walab yaa naca̱”, niiñ. Mas ni niiñ tees nac ñii tub lugaar ni cuerp. 16Nunu benu tub gyidag na niiñ: “Ya̱ a̱' naca̱ ni cuerp, gun walab urlo naca̱”, niiñ. Mas ni niiñ tees nac ñii tub lugaar ni cuerp. 17Benu tub cuerp nac ñii du ub urlo zi'l, orze' ¿lac mod par nu gyeñ na? Nunu benu tub cuerp nin du ub gyidag zi'l nac ñii, orze' ¿lac mod par nu chu' gyidi'ñ na? 18Tees na den gal nu na de lugaar ni cuerp. Nunu gal nu bzu Ñgyoozh de zañ lugaar ni cuerp, ni zi'l bicy mi nu gyicy tub ga la de ub na mod nu rlagy mi. 19Benu dela den tub zi'l lugaar ni cuerp nac naa, orze' wacyiiñ cuerp nin. 20Tees cuerp ni den rishli, ricy cup ñi zañ lugaar niñ, tees tub zi cuerp nac ñii. 21Orze' tub urlon wac niiñ gab ñii yaan: “Ru se la la cyiiñ ru ne̱”, niiñ. Nunu toon wac niiñ gab ñii gyi'n: “Ru se la la cyiiñ ru ne̱”, niiñ. 22Tees de mod la, dela lugaar ni cuerp ni den nu rlyu nu walab lugaar nu ricy ñi presis, de lugaar ze' dzi zir cyiiñ ñi ni den. 23De lugaar nu a̱' ricy ñi presis, nde' tona' la cuidad ricy dun ñi, nunu de lugaar ngach ni cuerp nu cuidada' zir ricy dun ñi. 24Ze' de lugaar nu rabee, walagy ñi nu cuidad gyicy nu den ñi. Ñgyoozh bicy mi nu dela lugaar nu a̱' ricy ñi presis ni cuerp ni den, nde' dzi zir cuidad ricy den nu lugaar ze'. 25Gun orze' cue' nu la' losa' de lugaar ze'. Sinu delañ gzuñ altant nu nac de losa'ñ. 26Benu rzac zi tub lugaar ni cuerp ni den, orze' gur zu lagy dutuub la cuerp ni den. Benu tub lugaar ni cuerp ni den nap rzac ñi, orze' ni' zi'l nap zu lagy dela lugaar ni cuerp ni den. 27Na dela den na den gal nu na cuerp ni Crisht, nunu tub ga la den nac naa tub ga lugaar ni cuerp nim. 28Lat de mbecy ni Crisht, Ñgyoozh bzum tub ga la dey nu lugaar niy. Nu loga la yu' mbecy nu zuy riiñ nu nac yu aposht. Nu cyup yu' mbecy zuy riiñ nu nac yu yu nu rnii riidz nu druu lo Ñgyoozh. Nu chon yu' mbecy zuy riiñ nu rlyuuy de coz ni Crisht. Orze' despuees yu' mbecy zuy riiñ nu ricy yu nusuriidz. Nunu yu' ga' mbecy nu ricy guñaa. Orze' yu' ga' mbecy nu rlocyuub losa'. Orze' yu' ga' mbecy nu riib ic de riiñ nu ricy mbecy lat der. Orze' yu' ga' mbecy nu rnii nu riidz reña' mbecy. 29Walab dela mbecy nac yu aposht. Walab dela dey nac yu mbecy nu rnii de riidz nu druu lo Ñgyoozh. Walab dela dey ricy yu nusuriidz. 30Walab dela dey ricy yu guñaa nu nac Espiriit Yon ni Ñgyoozh. Walab dela dey rniiy nu riidz reña' mbecy. Walab dela dey gac shaal yu de riidz ze'. 31Bicy der nu gad tub riiñ nu ricy ñi presis nu gac der. Tees mod nu nap zir par dela de' zir ñi, nde' riidz nu ne̱e̱ lo der na.

will be added

X\