1 Corintios 10

1Der bicy na, rlagya̱ nu gyeza' lagy der de coz nu bzac de gyitoo bel ne̱ de̱. Ñgyoozh gusa num dey lat tub nac za, nunu dela dey bded nap yu lo nisyudoo ña. 2Orze' nu nac nu gusa dey lat za ze', nunu bded dey lo nisyudoo ze', orze' byac dey mbecy nu bzuub gyidag ni Moisees, gal nu byaca' de ub na mbecy nu zuub gyidag ni Jesuuz ornu bzu nis den. 3Dela dey bdow yu coz nu bruu lo Ñgyoozh. 4Nunu go' dey nis nu briic Ñgyoozh ornu Moisees pshet yu yangay ich gyita'. Tees walab Moisees bicy yu nu bruu nis ze' lo gyita', sinu Crisht bicy mi nu bruuñ, gun mi ze' gusa num dey. 5Mas ni, tees zigy dey wangyet lagy Ñgyoozh mod nu bicy dey. Orze' nde' nu gut dey lugaar ub zi ze' nu gusa dey ze'. 6De coz nu guc ze', nde' cyiiñ ñi par nu lyuuñ ni de ub na nu cue' galagy na gyicy na coz cyi gal nu bicy de gyitoo bel ne̱ de̱. 7Nunu cue' griib zily den nab gal nu bicy la be de mbecy lat de yu ze'. Gun lat riidz nu bzeeñ Ñgyoozh rniiñ: “De mbecy gucua dey row yu gyit. Gaze' nu wes su dey nu rulgyi'y lo nab”, rniiñ. 8Nunu cue' gyicy den cyi nu losa'n nu wanchelaan gal nu bicy la be mbecy lat de yu ze'. Orze' nañ tub dzi zi'l gut gal zu chon miily de yu nu bicy de cyi ze'. 9Nunu cue' gyicy den preb Ñgyoozh, Shuaan na, gal nu bicy la be de gyitoo bel ne̱ de̱. Orze' gut dey nu nac nu bducua' bily yu. 10Ni cue' nii zi den ni Ñgyoozh gal nu bicy la be de gyitoo bel ne̱ de̱. Orze' tub anc nu la Anc nu Rbic Cashtig ni Ñgyoozh biit yu dey. 11Dela coz nu bzac de gyitoo bel ne̱ de̱ gulas, nde' par nu gad lagy mbecy nu gyicy cuidad dey ub yu. Nunu dela nde' pcañ lat de riidz nu bzeeñ Ñgyoozh par nu gad lagy den lac mod chu'n tiem na. Nunu na sñuu ga shuub dzi nu gya' lo dela coz. 12Orze' nde' nu de mbecy nu rzii nu dzi fert ricy cup consuel lo Crisht, rlagy ñi nu gyicy cuidad dey ub yu nis gyicy cyi gan dey. 13Dela de coz deet nu rzac den, nde' coz nu rzac de' zir de mbecy. Tees Ñgyoozh ricy paam nu de ub na. Orze' mi ze' wazaan mi nu gzac zi den ni de coz gashtal wagagyee ga' la den de coz ily nu yad, sinu tiem nu gzac deet den, orze' Ñgyoozh locyuub mi de ub na nu gad tub mod nu gyicy den gan. 14Orze' der bicya̱ nu dzi rca̱, rila cue' griib zily der nab. 15Ya̱ rne̱e̱ lo der gal nu rne̱e̱ lo de mbecy nu yet lag cuen. Orze' gush der shcab ni de coz nu rne̱e̱ ben a rishli. 16Despuees ornu dric den gras ni Ñgyoozh, orze' rdo'n ñup ni urbyay mod nu bzeeñ Jesucrisht. Orze' ral den gyel nap ni nu pshu reñ mi lo cruuz. Nunu ornu rdow den gyishtily mod nu bzeeñ mi, orze' ral den gyel nap ni cuerp nim. 17Mas zigy den nac naa, tees dela den rdow na laab tub zi'l gyishtily ze'. Orze' lo dela den tub zin nac naa. 18Güii der la ricy de mbecy Israeel. Row dey de gun nu rbic mbecy lo Ñgyoozh. Nunu ornu ni ricy dey, orze' ral dey gyel nap nu druu lo gun ze'. 19Walab nu rne̱e̱ nu nab, nde' coz nu cyiiñ. Nunu walab nu rne̱e̱ nu beel nu gua lo nab, nde' cyiiñ ñi. 20Sinu rlagya̱ ne̱e̱ nu de gun nu rbic mbecy lo nab, nde' walab lo Ñgyoozh rbic dey ñi sinu lo nuras. Nunu ya̱ walagya̱ gal der coz nu druu lo nuras. 21Wac gal der gyel nap nu druu lo Shuaan den ornu row der gyishtily mod nu bzeeñ mi, benu laab tiem ze' gala' der coz nu druu lo nuras. Nunu wac gal der gyel nap ornu ro' der ñup ni urbyay mod nu bzeeñ mi, benu laab tiem ze' gala' der coz nu druu lo nuras. 22¿Uti rlagy der gyicy den nu gasaap lagy Shuaan den? ¿Uti rzii der nu fert zir de ub na gaze' ub mi? 23Yu' mbecy rniiy: “Gac gyicya̱ la zi'l coz nu yad ica̱”, rniiy. Rishli rniiy tees walab dela coz cyiiñ ñi ni den. Gac gyicy den la zi'l coz tees walab dela coz locyuub ñi nu gyanap den. 24Rlagy ñi yub den mod nu nap zir par de' zir mbecy. Cue' mod nu nap par ub zi'l den. 25Gac gow der la zi'l coz nu rut mbecy ze' nu rsa'y de beel. Nunu walagy ñi nu cugyi' der lo de mbecy nu rut beel ze' par nu rdzib der nu gad beel nu gua lo nab. 26Gun gyishlombecy, gal nu dela coz nu yu' lo yu ii, dela nde' coz ni Ñgyoozh. 27Benu tub mbecy nu walab mbecy ni Crisht cuedz yu der nu gow nu der yu gyit, ze' benu shet ic der gow nur yu, orze' gow laa der la zi'l coz nu gzuy lo der. Walagy ñi nu cugyi' der loy nu nac nu rdzib der nu gow ru coz nu gua lo nab. 28Tees benu tub mbecy niiy lo der: “Nii beel nu gua lo nab”, niiy, orze' cue' gow der ñii, gun cue' nu gyicy ras nu der yu, nunu cue' nu gyicy der nu gnu shcab niy. 29Walab de ru gnu shcab nir, gun de ru rad lagy ru nu beel nu gua lo nab se la la gyicy ñi. Sinu gnu shcab ni mbecy ze', gun yu ze' wagad lagy yu. Tees yu' mbecy rniiy: “¿Lagu nu nac nu dzi ta ricy reña' mbecy wac gyicya̱ la zi'l coz nu yad ica̱? 30¿Lagu rnii zi mbecy ne̱ ornu rda̱w la coz, ze' benu drica̱ gras ni Ñgyoozh nu nac ñii?” rnii dey. 31La zi'l coz nu gyicy der, nu gow der o nu go' der o la zi'l coz nu gyicy der, bicy der mod nu gyabic mbecy gyel mbecy ni Ñgyoozh. 32Cue' cuic der mod nu chu' gyel deet lat ni tub la mbecy: ni lat de mbecy Israeel, ni lat de mbecy nu walab mbecy Israeel, ni lat de mbecy ni Crisht. 33Ni' zi'l ya̱ ricya̱ tub mod nu gyedzu' lagy dela mbecy. A̱' yuba̱ mod nu gyedzu' lagy ub zi'la̱, sinu ryuba̱ mod nu nap par nu gyedzu' lagy de' zir mbecy, ben a wayicy cup dey consuel lo Crisht. Orze' gruu mbañ dey.

will be added

X\