1 Corintios 1

1Ya̱ Baly, yu nu bzu Ñgyoozh nu gac aposht ni Jesucrisht par nu cha̱ tush lasa̱ de riidz nim. Ni bicy num ya̱ gun nde' coz nu bruu gal nañ lardoom. De̱ ya̱ nu biicy na Sosht tublaazh la 2zeed de̱ gyicy ii lo der bicy na nu ricy cup consuel lo Crisht, de ru mbecy nu yu' gyedz Corinto. De ru nac der mbecy ni Ñgyoozh nu nac nu rded nu der Jesucrisht, nunu Ñgyoozh bzum der nu gac ru nim tublaazh la nu de mbecy nu rcyiiñ dela lugaar, de yu nu rnishbaa lo Shuaan den Jesucrisht. Jesucrisht, mi ze' Shuaan de ub na, nunu laaba' mi ze' Shuaan de yu ze'. 3Ñgyoozh, Uz den, nu Shuaan den Jesucrisht gyicy mi faboor num der nunu gyicy mi nu cheti ri añ ni der. 4Dub laa tiem drica̱ gras ni Ñgyoozh par nu nac de ru, gun bicy mi faboor num der nu nac Jesucrisht. 5Par nu nac nu nac nu der Crisht, Ñgyoozh tona' la nap bicy num der. Nde' nu nap za de riidz nu rnii der, nunu nap yet lag der cuen de coz rishli. 6Dela coz nu mne̱e̱ lo der nu gyicy Crisht, dela nde' bi bicy mi ñii num der. 7Gun orze' rila wayicy falt ni tub la coz nu gac gyicy Ñgyoozh num der lat nu cuez der ornu gruu zac Shuaan den Jesucrisht tuuba' tir. 8Nunu mi ze' locyuub mi nu gagye der gashtal shuub la dzi ze', gun orze' ni tub la mbecy wac riib dey cyi too der ornu cyid mi. 9Segur la ni gyicy Ñgyoozh, gun dub laa tiem ricy yac mi dela coz nu rniim. Nunu ub mi bzum der nu gac nur I'ñ mi Jesucrisht, biñ nu nac Shuaan den. 10Ya̱ rnishba̱a̱ lo der, bicy na, nu nac Shuaan den Jesucrisht, nu gnii der tub zi'l riidz gun orze' cue' gyac zañ nac der nu losa'r, sinu guc tub nac zi'l mbecy. Bicy der tub zi'l shcab, nunu bicy der tub zi'l riidz. 11Ni rne̱e̱, der bicy na, gun yu' la be mbecy lat de famil ni Cloé, mniiy lo̱ nu yu' mbecy nu rnii deet dey nu losa'y. 12Coz nu rne̱e̱, nde' nu reñ ga la riidz rnii tub ga der. Yu' mbecy lat der nu rniiy: “Ya̱ nac du̱ Baly”, rniiy. Yu' ga'y rniiy: “Ya̱ nac du̱ Apolos”, rniiy. Ze' tub naca'y rniiy: “Ya̱ nac du̱ Bed”, rniiy. Ze' tub naca'y rniiy: “Ya̱ nac du̱ Crisht”, rniiy. 13¿Walab gaal yu' zañ la' Crisht? ¿Walab gaal ya̱, Baly, guta̱ lo cruuz par nu nac der? ¿Walab gaal bzu nis der par nu gabe der nu nac ru mbecy ne̱ ya̱? 14¡Drica̱ gras ni Ñgyoozh nu wanriib nisa̱ ni tub la der! Nomaas Crispo nu Gayo, de yu ze' zi'l briib nisa̱, 15gun nis gruu su tub mbecy lat der nu gniiy nu bzu nis yu par nu gabe nu nac nuy ya̱. 16Ni' de famil ni Estéfanas briib nisa̱' dey, tees wagyeza' lagya̱ ti briib nisa̱ de' zir mbecy. 17Gun Crisht wansuu nez mi ya̱ par nu riib nisa̱ mbecy, sinu bzuu nez mi ya̱ par nu shaala̱ de riidz nu sac nim. Nunu ornu rne̱e̱ de riidz ze', walab nu nac shcab lily ni mbecy rne̱e̱ ñii, gun benu ya̱ ni ne̱e̱, orze' dzi ga wayicy cuen mbecy coz nu ricy zir ñi presis. Coz ze', nde' nu gut Crisht lo cruuz. 18Gun de mbecy nu gdune', de yu ze' rzii dey nu de riidz nu rnii nu gut Crisht lo cruuz, nde' riidz ton. Tees par de ub na, como gruu mbañ den, orze' nu nac riidz ze', Ñgyoozh tona' la coz ily ricy mi. 19Gun lat de riidz ni Ñgyoozh, lat ze' rniim: Ya̱ nit lo̱ shcab lily ni de mbecy lily, nunu zu chu̱ shcab ni de yu nu yet lag cuen, nam. 20Orze' de mbecy nu yu' shcab ni, wayet lag dey cuen coz ni Ñgyoozh nu nac shcab niy. Nunu yu nu dzi yu' lo leey wagad lagy dey coz ni Ñgyoozh nu nac nu dzi yu' lo dey. Nunu mbecy nu dzi riidz ru' nu nac coz ni gyishlombecy ii, mas nap rnii dey tees wagad lagy dey de coz ni Ñgyoozh nu nac nu dzi rnii dey. 21Gun Ñgyoozh, nu nac nu yu' shcab nim, bicy mi nu rila wac chu' lo de mbecy mi nu nac shcab lily ni de ub zi'l dey. Sinu ricy mi nu gruu mbañ mbecy nu ricy cup consuel lom par nu nac de riidz nu rshaal na nim, mas mbecy rzii dey nu riidz ze', nde' riidz ton. 22Riidz nim, nde' riidz ton par de mbecy Israeel, gun rlagy dey tub nusuriidz par nu gabe nu nde' riidz ni Ñgyoozh. Nunu nde' riidz ton par de mbecy griego, gun rlagy dey tub shcab lily. 23Ze' de ub na rshaal na de coz nu bzac Crisht lo cruuz. De riidz nu rshaal den ze', nde' ricy ñi nu walagy de mbecy Israeel gyicy cup dey consuel lo Crisht, nunu de mbecy griego rnii dey nu nde' riidz ton zi'l. 24Tees par de ub na mas nac naa mbecy Israeel, o a̱' nac naa mbecy Israeel, tees par de ub na, mbecy nu bzu Ñgyoozh nu gac nim, de riidz ze' rzat ñi Crisht. Nunu par nu nac mi, nde' nu dzi coz ily ricy nu Ñgyoozh den. Nunu nu nac mi rabee nu tona' la lily na shcab ni Ñgyoozh. 25Gun mod nu bicy Ñgyoozh, par de mbecy rzii dey nu nde' tub mod ton, tees mod nu bicy mi nap zir bicy mi par dela de mbecy nu ricy cup shcab lily. Nunu mas mbecy rzii dey nu a̱' fert mi nu nac coz nu bicy mi, tees fert zir mi par dela mbecy. 26Na, der bicy na, bicy der nu gyeza' lagy ru mod nu na der nu lo ga ornu bzu Ñgyoozh der nu gac der nim. Par de mbecy nu yu' gyishlombecy ii, sac zigy mbecy nu yu' shcab lily ni lat der. Sac zigy mbecy nu gac gyicy coz ily lat der. Nunu sac zigy mbecy nu bruu lat de famil zub lo zir lat der. 27Gun mbecy ricy dey de ru par mbecy ton, tees Ñgyoozh bicy mi nu gyicy der nu gat lo de mbecy nu ricy cup shcab lily. Nunu mbecy ricy dey de ru par mbecy gyidz. Tees Ñgyoozh bicy mi nu de ru gyicy der nu gat lo de mbecy lily. 28De ru nac ru mbecy shni. Rzii mbecy nu se la la sac der. Tees Ñgyoozh pcuim der par nu gyicy ru nu gabe nu de coz nu rzii de mbecy lily nu dzi sac, nde' se la la sac ñi. 29Nde' nu par Ñgyoozh ni tub la mbecy wac gyicy le' dey lom. 30Tees laab Ñgyoozh bicy mi nu nac nu der Jesucrisht, nunu nu nac Jesucrisht yu' shcab ni den. Par nu nac mi, byanap den par lo Ñgyoozh. Nunu nu nac mi yu' den nu gyel cacy, nunu bruu chu den lo coz cyi. 31Nde' nu rniiñ lat de riidz nu bzeeñ Ñgyoozh: “Benu mbecy rlagy dey gyabic yu gyel mbecy, orze' rlagy ñi nu gyabic dey gyel mbecy ni Ñgyoozh”, rniiñ.

will be added

X\