Tito 3

1Basa'ra'll be'nn ka' ba nxenra'll Jesucriston', llaya'l wzenay ake', na' wzoa ake' xti'll koxchis, na' ke be'nn wnebia' ke ake' ka' batteze, na' llaya'l gon ake' da wen. 2Wzen akroe' bi llaya'l nne ake' ke be'nne. Bi llaya'l yesdile yeschach ake', llaya'l gak ake' be'nn cha'o, na' gap ake' yel llxhenra'll rao yeolol be'nne. 3Le lli'o bi byejnie'llo kana', na' bi bzoallo xti'll Diosen'. Byejle'llo di'll wenra'lle, na' bentezllo bi da xhinnje da bzera'll lo ra'llda'ollo. Bdallo benllo kon da bawello. Bzollo bchachrén lwelljllo. Bwie be'nne lli'o, na' bwie lwelljllo. 4Bixha bllin lla Diosen' be'nnen' nak wasrá kello, broe're' lli'o katek be'nn cha'o nake', na' katek nllie're' lli'o be'nnach. 5Na' basre'e lli'o kere bi da wen benllo, zan baya'chra'lle' lli'on. Na'llen' bayibe' yichjra'llda'ollon' ke da xhinnj ka' benllo, na' Spíritu ke'en bakoben yichjra'llda'ollon', na' ba bayakllo ka to be'nn kobe. 6Diosen' bse'le' Spíritu ke'en zorenen lli'o, le Jesucristo na'n be'nnen' nak wasrá kello na' bnnabe'n. 7Na' ka' basre'e lli'o rao do'l kellon', le bllie're' lli'on bayone' lli'o be'nn wen rawe'n nench sollo kwezllo, le nnézello wllin lla yellinllo gan' llie' na' ke chnare. 8Da ki ba bnia' ni, naken da li, na' gono' bien wzenay be'nn ka', wzejnie'ro'n len na'. Le be'nn ka' ba llonlira'll Dios, llaya'l kwek yichj ake' gon ake' da wen. Na' da ki ba bnia'n naken da wen, na' gakrenen noteze be'nne. 9Bi gono' txhen be'nn ka' llasdil llaschach ake' ke bi gaze bi di'll da'o. Na' bi kwek yichjo' di'll da bi za'ke ke dialla da xozxta'ollo ka'. Bi gono' txhen be'nn dile llaschach ake', akre zejen dan' nyoj le' ley dan' bzoj da Moisésen', le ka nak di'll ki, bi llakrenen be'nne, na' bi naken da za'ke. 10Na' cha' ren be'nn radj be'nn ka' lldop llonlira'll Jesucriston', llone' leake' chopre, bdil ake' bill gon ake' ka', na' cha' ba bdil akoe' to chop ras, na' bi llzenay ake', babej ake' ka'le. 11Dan' bi llzenay ake' na', na'llen' nnézello ba nbeyi' ake', le nap ake' do'l ke da xhinnjen' llon ake' na'. 12Kate wse'la' be'nnen' nzi'i Artemas o cha' Tíquico gan' zo'o na', ben bien ga zerao sa'kro' yedo', nench yellayllo yellen' nzi'i Nicópolis, le ba bachoyra'lla' soa' na'ze doxhente be'o ka' llak zay. 13Na' ben yeolol da gak gono', nench gakreno' be'nnen' nzi'i Zenas, be'nnen' nzed ley na', na' Apolos na', na' kat yeza'a ake' gan' zo'o na', be'e ake' bi da gonrén ake' llin, nench ke bi yallj akre' tnez. 14Na' be'nn lwelljllo ka' nxenra'll Criston', llaya'l we'la'll ake' gon ake' da nak wen, na' gakrén ake' be'nn yallje bi da yalljre'. Le llaya'l gakllo be'nn llon da za'ke. 15Yeolol be'nne llaso'nrén nada' xchin Diosen' txhen ganni, llwap ake' rwe' lliox. Na' llnnaba' wapchgo' lliox be'nn ka' zoreno' na', be'nn ka' nllie' lli'o, dan' nakllo txhen nxenra'll-llo Criston'. Dios na' gakrenchgue' yeololre. Ka'n gakchga.

will be added

X\