Romanos 9

1Nada' naka' Criston' txhen lloa'a di'll li, bi ziya'. Spíritu ke Diosen' llakrenen nada' nench nnezra' di'll lin' lloa'a. 2Llakya'chra', na' bibi wen zo lo ra'llda'wa', ni ke be'nn ka' bi llonlira'll Criston'. 3To lle'nra' gak kwas Diosen' nada' ka'le, na' wabi'ya' kwit Criston' chenak, nench gone' wen ke be'nn bi'cha' ka', be'nn ka' nak be'nn wrall kia'. 4Nak ake' be'nn Israel, na'llen' Diosen' gokre' leake' ka xhi'nne', be'e leake' yel bara'nne, na' bne'e gakrene' leake', be'e leake' ley dan' bzoj da Moisésen', na' broe're' leake' akren' gon ake' we'rao ake' Le'e, na' bchebe' gone' da wen ke ake'. 5Be'nn gor brao ka' bde kana', gok ake' xozxta'o be'nn Israel ka'. Na' rao dialla ke ake' na'n, bra' Cristo be'nnen' bse'l Diosen'. Le Lekze'n nak Dios ke yeololte da de, na' llaya'l we'raolloe' ke chnare. Ka'n gakchga. 6Bi llaya'l gonllo xhbab bi ben Diosen' kan' bchebe' gone' ren be'nn Israel ka'. Le kere yeolol be'nn ka' gorj rao dialla ke Israel na'n nak dogarj be'nn Israel. 7Leska' kere yeolol be'nn ka' gorje rao dialla ke da Abraham na'n nake dogarje xhi'nn dialla ke'e, le kin' goll Diosen' Abraham na' kana': “Xhi'nn dialla ke Isaac na', gak dialla ko'on.” 8Na' dan' bne'e ka'n zeje di'll Dios na'n llbeje' be'nn nak xhi'nne' kere dan' gorj ake' rao dialla ke be'nn Israel ka'n, kon be'nn llejle'n, gon Diosen' ke ake' kan' ne'e na', na' gak ake' dogarje xhi'nne'. 9Kin' goll Diosen' da Abraham na' gone', na' bne'e: “Katen' llin llan' ba bnia' na', na'llen' yeda', kana' ba zo to xhi'nn no'r ko'o Saran'.” 10Na' kere da na'zen', leska' be'e Diosen' di'll ke xhi'nn da Rebeca na', bi ka' gok llopte xhi'nn xozxta'ollo Isaac. 11Kan' bi nna so bi kwach ka', na' bibi nna gon akbe' no da wen o da xhinnj, Dios na' broe're' llbeje' noteze be'nne, kere dan' ben ake' ka ne ley na', zan ni ke dan' brej Diosen' leake'n. 12Le Dios na' golle' Rebecan': “Bin' garje da nell na', wxhexj yichjbe' rao bin' na'ch na'.” 13Na'telle nyoj xti'll Dios dan' ne: “Bllie'ra' Jacob na', na' bwiera' Esaún'.” 14¿Na' nnello llon Diosen' da bi zej lixheje? ¡Bi nnello ka'! 15Le golle' da Moisésen' kana': “Yeya'chra'lla' kon no lle'nra' yeya'chra'lla'. Na' llie'ra' kon no lle'nra' llie'ra'.” 16Llbej Diosen' be'nn llaya'chra'lle', kere kon kan' lle'ne be'nnen', na' kere ni ke bi da llon ake'n. Dios na'n kon no lle'nre', le'en llaya'chra'lle'. 17Na' xti'll Dios na' nyojen kan' golle' be'nn wnebia' ke Egipton', lle'e le'e: “Nada' bena' rwe' be'nn wnebia', nench na' wroe'ra' yel wak dan' llona' ren rwe'. Llona' ka' nench nneze be'nne doxhen yellrio, nada'n zoa' llnebia'.” 18Ka'n naken Dios na' llaya'chra'lle' kon no lle'nre', na' llone' war lo yichjra'llda'o kon no lle'nre', na'llen' nak ake' war bi llejle' ake'. 19Na' ye'o nada': “Cha' ka' naken, bi llaya'l wtobe Diosen' be'nnachen', le nono soe wlleyi'lle' dan' lle'nre' gonllon'.” 20Na' llepa' rwe', ¿noxha nako' na'n, llakyollreno' Diosen' bi dan' lle'nre' gone' ren rwe'? Ka to ye's de yo, kere wak yen be'nnen' ben len na': “¿Bixchen beno' nada' ki?” 21Le be'nn wen ye'sen' gone'n kon ka llazra'lle', le le'en gone'n. Na' bennj na'kzen' gone' to da nak nbaraz, na' gonte' ye to da bi nakteke nbaraz. 22Le Diosen' gokra'lle' wroe're' ka gone', we'e yel llza'kzi' ke be'nn bi llzenay ke'e, na' leska' gokra'lle' wroe're' yel wak ke'en. Na'llen' bdape' yel xhenra'lle ke be'nn ka' bi llon da lixheje, na' ba naken kweyi' ake'. 23Ka'n bene' nench gone' da wen xhen ke noteze wxenra'll Le'e, lli'o llaya'chra'lle'. Kana'te breje' lli'o gak da nbaraz kello katen' yellinllo gan' llie' na'. 24Lli'o breje', bal-llo nakllo be'nn Israel, na' bal-llo bi nakllo be'nn Israel. 25Ka'n ne le' yich dan' bzoj Oseas, be'nnen' be'e xti'll Dios kana' nen: Be'nn ka' bi nake yell kia', nada' wsi'i ake' yell kia', na' be'nn ka' bi bllie'ra' na', yep ake' nllie' akre' nna'. 26Na' yell gan' goll Diosen' be'nn ka': “Bi nakre yell kia'”, na' yezi'i ake' xhi'nn Dios be'nn nban ke chnare. 27Na' da Isaías be'nnen' be'e xti'll Diosen' kana', bne'e ki ke xozxta'o be'nn Israel ka': “La'kze be'nn Israel ka' chan aklle' ka yoxh da lli' lloa' nisda'o, txhonnj akze'n yerá. 28Le Diosen' gone' kan' ba nchoye' ke lli'o be'nnach, na' le gonte' doxhen kan' ba nwie' gone'n.” 29Gak kan' bzoj da Isaíasen' kana', nen: Chenak Xanllo Diosen' bi bakwa'nne' to chope be'nn Israel ka', ba blleyi'llo kan' gok ke be'nn Sodoma ka' ren be'nn Gomorra ka' chenake. 30¿Akxha nnello cha'? Be'nn ka' bi nake be'nn Israel, bi bayirj ake' akre gon ake' nench nne Diosen' nak ake' be'nn wen rawe' na', zan bale' llonlira'll ake' Criston', ke len na' ba nak ake' be'nn wen rao Dios. 31Zan be'nn Israel ka' bnao ake' ley dan' ne, akren' gon ake' nench gak ake' be'nn ke Dios, na' bi bxha'k akre'n. 32¿Bixchen gokze ka' ke ake'? Gok ke ake' ka', le llak akre' gon ake' da wen nench gak ake' be'nn wen rawe' na', na' bi gokbe'e akre' cha' be'nn wxenra'll Le'en gak be'nn wen. Na' gok ke ake' ka llak ke be'nn lljache'o to yej. 33Ki nyoj xti'll Diosen' ke ake': Gan' nzi'i Sión wse'la' to be'nne, na' nake' ka to yej da lljache'o be'nne, na' ka to yej xhen da lljati' be'nne, na' lljabixe'. Na' be'nn gonlira'll Le'e na', bi waye'e akre' ni ke dan' benlira'll ake' Le'e na'.

will be added

X\