Romanos 2

1Ke len na' bibi de wde'ro' noteze nako' rwe' be'nnach, cha' ll-lliayi'llo' be'nn yobre, le katen' ll-lliayi'llo' be'nn yobre, ll-lliayi'llkze kwino', le toz ka llonkzo', ka llon leake' na'. 2Nnézkzello Dios na', gone' da sa'kzi'llo, ni ke da xhinnjen' llonllo, ka da ka' ba bnia' na', na' zejkze lixhej kan' gone' na'. 3¿Na' llakro' cha' bibi gonn Diosen' da sa'kzi'o cha' ll-lliayi'llo' be'nne, na' naote'o llono' kan' llon ake'n na'? Bi llaya'l gakro' wara'o rao yel llza'kzi' ke Diosen', ka nak da ka' llono' na'. 4¿Bi llakbe'ro' Diosen' nake' be'nn cha'o, na' be'nn xhenra'lle la'kze napllo do'le? Diosen' llone' ka' nench gakbe'ro' da xhinnjen' llono', na' yeyatro'. 5Rwe' nako' be'nn zid kwis, bi llayatro' da xhinnj ka' llono'n, na' llonllo' bi'ch da xhinnj ko'on nench waslli'oll Diosen' da wsa'kzie' rwe' kate llin lla wchoybie' ke be'nnach. Kana' wroe'n zejkze' lixhej kan' wchoye' sa'kzi' toto be'nn ren yeolol da ben ake'. 6Kana'n gone' ke totollo kon ka ben totollo. 7We'e yel nban zejlikane ke be'nn ka' gon da wen la'kze biteze yellayrao ake', be'nn ka' llayirjla'lle akre gon ake' nench yedo'l akre' gan' llia Dios ke chnare, na' nench yeyazra'll Diosen' kan' gon ake' na', na' nench gone' leake' be'nn za'ke. 8Na' gaklle'e we'e yel llza'kzi' ke be'nn ka' llon kon da nen ke ake', na' bi llejle' ake' di'll li ke Diosen', llon ake' kan' ne da xhinnjen'. 9Yeolol be'nnach llon da xhinnj sa'kzi' ake' yellayrao ake', zga'tek be'nn Israel ka' yellayrao, na'tellre noteze be'nn bi nak be'nn Israel. 10Zan be'nn ka' llon da wen, we'e Diosen' leake' yel banez ke ake', na' yel bara'nne, na' gone' so ake' wen. Zga'tek be'nn Israel ka', na'tell yezikre nollre be'nne. 11Diosen' bi llale'e ke ke be'nne. 12Be'nn ka' bi nombia' ley dan' bzoj da Moisésen', na' llon ake' da xhinnj, Dios na' gone' da kweyi' ake' la'kze bi nombia' ake' ley na', wchoybie' ke ake' le nnez akre' llon ake' da xhinnj na'. Na' be'nn ka' nombia' akse' leyen', na' llon ake' da xhinnj, Diosen' wchoybie' ke ake' kon ka ne ley na'. 13Kere dan' yénzello ley na', gaktello be'nn wen rao Dios, llaya'l gonllo kan' nen na', na'llen' gakllo be'nn wen rawe'n. 14Be'nn bi nake be'nn Israel, bi nombia' ake' ley dan' bzoj da Moisésen'. La'kze bi nombia' ake' leyen', kon lo ra'llda'o ake' na', llwia ake', na' llon ake' da wen na', na'llen' naksen ka to ley ke ake'. 15Nnezjekze lo ra'llda'o ake'n llaya'l gon ake' ka dan' nllia leyen' bia'a gon ake' na', le llon ake' ra't wejen'. Na'llen' nneze yichjra'llda'o ake'n dan' llon ake'n, cha' naken wen o cha' naken da xhinnj. 16Kan' gak kate llin lla gon Diosen' rao na'a Jesucriston', choyrawe' ke bi da ba ben totollo la'kze da nga'che, cha' da wen o cha' da xhinnj. Kan' nia' katen' llyixjwe'ra' Di'll Wen ke Jesucriston'. 17Rwe' ne'o nako' be'nn Israel, cheke llakro' zo'o wen rao Dios, na' nxenra'llo' dan' nombia'o ley na', na' llonxhen kwino' rao Dios. 18Na' nombia'o akren' llazra'll Diosen', na' llakbe'ro' bin' nak da wen, na' bin' nak da xhinnj. 19Na' llakro' za'kro' ko' nez be'nn ka' bi nombia' xti'll Diosen', na' ko' beni' lo yichjra'llda'o be'nn bi nombia' Dios. 20Na' llakro' wak wzejnie'ro' be'nn bi llejnie', na' llakro' wak wroe' wsedro' be'nn kobe xti'll Diosen', le ne'o nombia'o di'll li ke'en, dan' nsa'a doxhen dan' llaya'l nneze be'nne. 21Rwe' llroe' llsedro' be'nn yobre, ¿bixchen bi llroe' llsedre kwino'? Rwe' ne'o bi llaya'l kwanllo, ¿bixchen llbano' rwe'? 22Rwe' ne'o nono gak tarén xho'r be'nne o xhyio be'nne, ¿bixchen llono' rwe' ka'? Rwe' llwiero' lwa'a da llonlira'll be'nne, ¿bixchen lljalano' gan' nkwa'a aken na'? 23Llonxhen kwino' kwis dan' llsedo' leyen', na' lltitjro' Diosen' le bi llono' kan' nen na'. 24Ke len na' nyoj xti'll Diosen' nen: “Ni ke re'n nnechach ake' ke Diosen', be'nn ka' bi nak be'nn Israel.” 25Cha' llonllo kan' ne ley na', za'ksen dan' ba bzollo sen dan' nzi'i circuncisión le' kwerp kellon', dan' zeje di'll, lli'o be'nn Israel nakllo yell ke Diosen'. Na' cha' bi llonllo kan' ne leyen', bibi za'ken dan' ba bzollo sen na'. 26Na' cha' be'nn la'kze bi nna soe' sen na', na' llone' kan' ne ley ke Dios na', nakse' txhen ren be'nn ka' zo sen na'. 27Na' be'nn ka' llon kan' ne ley na', la'kze bi zo ake' sen dan' nzi'i circuncisión na', leake' wroe' akre' de do'l keré, le nere nzedre leyen', na' bi llonre kan' nen na'. 28Kere nello nakllo dogarj be'nn Israel dan' naollo ka dan' nao leake' na', na' dan' zollo sen to ko'llre kwerp kellon'. 29Gakllo dogarje be'nn Israel cha' llonlira'll-llo Diosen' do yichj do ra'll-llo. Na' dan' ne ake' zo ake' sen na', lli'o ba nakllo ka to be'nn zo sen lo yichjra'llda'o. Na' ka nak da ni, kere le' yichen' llzejnie'n lli'o gonllo da ni, Spíritu na'kzen' ba yo'n lo yichjra'llda'ollo llzejnie'n lli'o. Na' be'nnen' llon ki, llayazra'll Diosen' le'e, la'kze be'nnach yobre bi llayazra'lle' kan' llone'.

will be added

X\