Romanos 16

1Llnnaba' rao re', gonre wen ke no'r zanllon' re Feben', be'nnen' ben xchin Dios ren be'nn ka' lldop ll-llay llonlira'll Criston' gan' nzi'i Cencrea. 2Lewrebe' kan' llaya'l gone lwelljllo, lli'o nakllo be'nn nxenra'll Dios. Legakrene' cha' bi da yalljre', le ka'n ba gokrene' be'nn zan, na' leska' ba gokrenkze' nada'. 3Na' lewap no'ren' nzi'i Priscilan' lliox, na' ren be'nnen' nzi'i Aquila. Leake'n ba ben ake' llin ke Xanllo Jesucriston' txhen ren neto'. 4Leake' bzane yel nban ke ake' nench basrá ake' nada' rao yel got. Na' lloa'a yel llioxken ke ake' kan' ben ake' na'. Leska' be'nn ka' bi nak be'nn Israel, be'nn bi'chllo ka' llonlira'll Jesucriston', lloe' ake' leake' yel llioxken. 5Lewap be'nn ka' lliox, be'nn ka' lldop rill Priscilan' ren Aquila, llon ake' xhen Jesucriston'. Na' lewap lliox be'nnen' nllie'ra', be'nnen' re Epeneto, le nake' be'nn nell bxenra'lle Criston' gan' nzi'i Acayan'. 6Na' lewap Marían' lliox, no'ren' ba ben xchin Dios gan' zore na'. 7Na' lewap be'nn wrall kia' ka' lliox, be'nnen' nzi'i Andrónico, na' ren be'nnen' nzi'i Junias. Le zga'tek leake'n bxenra'll ake' Criston' ka nada', na' jacho'to' rill ya txhen. Na' yezikre postl ka' lloe' ake' di'll wen ke ake'. 8Lewap lliox be'nnen' nllie'ra', be'nnen' nzi'i Amplias, le ba nxenra'lle' Xanllo Criston'. 9Lewap be'nnen' nzi'i Urbano lliox, be'nnen' llonrén lli'o xchin Criston', na' leska' be'nn nzi'i Estaquis, be'nnen' nllie'ra'. 10Lewap be'nnen' nzi'i Apeles lliox. Da xhen ba broe're' nxenra'lle' Criston' do yichj do ra'lle'. Leska' be'nn ka' zjalla'a rill be'nnen' nzi'i Aristóbulo, lewap ake' lliox. 11Na' lewap be'nn bi'ch lwellja' nzi'i Herodión na' lliox, leska' be'nn ka' zjalla'a rill be'nnen' nzi'i Narciso, be'nn ka' nxenra'll Cristo na'. 12Lewap be'nnen' nzi'i Trifenan' lliox ren be'nnen' nzi'i Trifosa, no'r ka' llon xchin Xanllo Jesucriston'. Leska' be'nn zanllo nllie'llo nzi'i Pérsidan', lewape' lliox, wa ba bene' xchin Xanllon'. 13Na' lewap be'nnen' nzi'i Rufon' lliox, nake' be'nn brao ke lli'o nxenra'll Xanllo Jesucriston'. Leska' xhne'e na', lewape' lliox, le ba none' nada' ka xhi'nne'. 14Lewap be'nnen' nzi'i Asíncriton' lliox, rente be'nnen' nzi'i Flegonte, ren be'nnen' nzi'i Hermas, ren be'nnen' nzi'i Patrobas, na' be'nnen' nzi'i Hermes, na' ren be'nn bi'chllo ka' zorén leake' na'. 15Na' lewap be'nnen' nzi'i Filólogon' lliox ren be'nnen' nzi'i Julia, na' ren be'nnen' nzi'i Nereo, na' be'nn zane', na' be'nnen' nzi'i Olimpas, na' ren yeolol be'nn bi'chllo ka' zjazorén leake'. 16Na' kate yedop yellayre, lewno'p na'a lwelljre kat wapre lliox, na' wroe'n nllie' lwelljre. Na' be'nn ka' lldop ll-llay llonlira'll ake' Criston' yeololte yell gan' ba bya'a na', llwap ake' re' lliox. 17Be'nn bi'che, llnnaba' rao re', lewiá bi wzenayre ke be'nn ka' nak be'nn watil be'nne, be'nn ka' llzoa da llonbe'y nench bi gonre dan' ba bsedre ke Diosen'. Bi gonre be'nn ka' txhen. 18Le bi llejle' ake' ke Xanllo Jesucriston', llon ake' ka nen ke ake', na' llon ake' da yo' lo yichjra'llda'o ake'. Na' lloe' ake' di'll da yewé be'nne nench llxoayay ake' leake'. 19Yeololte be'nne nnez akre' llzenayre ke Diosen', na'llen' llawera' kan' llonren'. Na' lle'nra' gakre be'nn llejnie' nench wzenayre ke da wen na', na' bi wzenayre ke da wxhiye'n. 20Na' Dios be'nnen' nzoa lli'o nbaraz, wchochj wlanchgue' daxi'on, na' bi soen nnebia'n lli'o. Na' Xanllo Jesucristo na', sechgue' gakrene' re'. 21Na' Timoteo be'nnen' llonrén nada' xchin Criston' ganni, llwape' re' lliox, na' leska' be'nn bi'ch lwellja' ka' nzi'i Lucio, na' be'nnen' nzi'i Jasón, na' rente be'nnen' nzi'i Sosípater. 22Na' nada' Tercio be'nn wazoje, leska' llwapa' re' lliox, nonllo txhen nxenra'll-llo Xanllon'. 23Leska' be'nnen' nzi'i Gayon' llwape' re' lliox. Nada' Pablo zoa' rille' ni, na' lekze rille' ni, lldope be'nn ka' nxenra'll Criston'. Leska' be'nnen' nzi'i Erasto be'nnen' nake' rao ne'e mell ke yell na', llwape' re' lliox, na' ren be'nn bi'che'n nzi'i Cuarto. 24Sochga Xanllo Jesucriston' gakrenchgue' re'. Ka'n gakchga. 25We'raollo Dios. Le'en nap yel wak gakrene' re', sore wxenra'llre kan' ne Di'll Wen dan' llyixjwe'ra'n, na' llzejnie'ra' be'nne ke Jesucriston'. Na' llzejnie'ra' xti'll Dios dan' nono nna nneze kan' za xe yellriote. 26Na' Diosen' ba bzejnie're' lli'o nna', bixha zejen da ka' bllia Diosen' bia'a ka nak da ka' bzoj be'nn ka' be'e xti'lle'n kana'. Na' Dios be'nnen' zo ke chnare lle'nre' chej di'll ke'en yeololte yell, nench chejle' yeolol be'nne ke Jesucriston', na' wzoa ake' xti'lle'. 27Toze Diosen' za'k wxenra'll-llo, toze'n nape' yel si'n. Na' bse'le' Jesucriston' gakrene' lli'o, ke len na' gonxhenlloe' ke chnare. Ka'n gakchga.

will be added

X\