Romanos 15

1Lli'o ba zello war rao xhnnez Diosen', llaya'l gapllo yel xhenra'll ren be'nn ka' bi nna chejnie' kwasro, na' bi gonllo kon ka da llazra'll lli'oze. 2Totollo llaya'l gonllo da wen da yeyazra'll be'nn lwelljllo, na' gonllo bi da gonllo nench gakrenen leake' chejle' ake' ke Diosen'. 3Ka'n gonllo, le ka'n gok ke Criston', bi bene' kon ke llazra'lle', gok ke'e kan' nyoj xti'll Diosen': “Di'll yel ya' ke be'nn ka' bwie rwe'n, bxhoan ko'lla'.” 4Na' doxhen xti'll Diosen' dan' bzoj be'nn ka' kana', llzejnie'n lli'o nench sello war wxenra'll-llo Diosen', na' sollo rez wllin lla gon Diosen' wen kello. 5Dios be'nnen' llonn lli'o yel llxhenra'll nench llonllo war sechochllo rao xhnneze'n, gakrenchgue' re', gakre toze kon kan' broe' Xanllo Jesucriston' lli'o, 6nench toze kan' nne yeololre kat we'raore Diosen', be'nnen' nak Xa Xanllo Jesucriston'. 7Ke len na' llaya'l wazenia'na'a lwelljre, kan' ben Criston' bazenia'ne'e lli'o nench gakxhen Diosen'. 8Na' ni nia' re', kan' ben Xanllo Jesúsen', bxhexj yichje' bene' ka to be'nn wen llin, nench na' gokrene' be'nn Israel ka', na' kone ka' broe're', di'll lin' be'e Diosen', golle' xozxta'ollo ka' gone' wen ke ake'. 9Leska' bed Criston' ke be'nn ka' bi nak be'nn Israel nench wxenra'll ake' Dios, dan' ba baya'chra'lle' leake' na', gok kan' nyoj xti'll Diosen' nen: Ke len na' wa'a yel llioxken ko'o, kon ga zjalla'a be'nn ka' bi nak be'nn Israel, na' gola' we'rawa' rwe'. 10Na' ye to kwen gan' nen: Re' bi nak be'nn Israel, leyewé ren be'nn ka' ba nxenra'll Diosen'. 11Na' ye to gan' nen: Lewe'rao Xanllo Dios, re' bi nakre be'nn Israel. Na' legonxhene', re' lla're yeololte yell. 12Na' ye to bne da Isaías be'nnen' be'e xti'll Dios kana': To be'nne yede' rao dialla ke da Isaí. Na' Le'e nnebie' be'nn ka' bi nak be'nn Israel, na' be'nn ka' bi nak be'nn Israel kwez ake' Le'e. 13Diosen' llone' nench llawello dan' nnézello yellinllo gan' llie' na'. Na' llnnaba' nench gonchgue' sore nbaraz dan' llonlira'llre', na' gonchgue' nench gakrén Spíritu ke Diosen' re', yewere kwezre yellinre gan' llie' na'. 14Be'nn bi'che, nnezra' ba nakre be'nn llon da wen, na' llejnie're, na' llak llzejnie're be'nn lwelljre. 15Na' le' yich dan' bzoja' re' ni, ba bayaxhjra' golla' re' to chop da ka' nench ke ganra'llre, le brej Diosen' nada' yel be'nn wen ke'e na'. 16Breje' nada' nench chixjwe'ra' xti'lle'n rao be'nn bi nak be'nn Israel. Llroe' akre' Di'll Wen ke Diosen' nench gak ake' ka to da wayazra'll Dios. Na' Spíritu ke'en gonen nench gak ra'llda'o ake'n yall. 17Le llawera' llona' xchin Diosen' dan' ba gokrén Xanllo Jesucriston' nada' llona'n. 18Bi llayaxhjra' wa'a di'll billre da ba ben be'nn yobre, na'llen' lloa'a di'll ke da ba ben Criston', le Le'en llakrene' nada' lloa'a xti'lle'n, na' billre da llona' nench zan be'nn ka' bi nak be'nn Israel ba llejle' ake' ke'e. 19Le Spíritu ke Dios na'kzen' gokrenen nada' bena' yel wak, na' billre da babane be'nne doxhente ga bya'a, le be'rén ake' xti'll Jesucriston', bzorawa' Jerusalén ballintia' gan' nzi'i Ilírico. 20Na' be'la'lla' bia'a Di'll Wen dan' llzejnie' ke Criston' gan' nono nna gonlira'll Le'e, le bi gokra'lla' wlana' latj ke be'nn ga ba llzejnie' akre' xti'll Diosen'. 21Na' llonen kan' ne xti'll Diosen': Be'nn ka' bi nna yene xti'lle'n, re'e akchguere', na' be'nn ka' bi nna nneze kan' llone'n, chejnie' akchguere'. 22Ke len na' bi nna yeda' yedra'nna' re', la'kze da zan ras ba gokra'lla' yeda'. 23Batna'te lle'nra' yedwia' re', na' nna'll bayoll bena' dan' bro' Diosen' rao na' gona' do ni. 24Kate cha'a gan' nzi'i España, kana' tia' wia' re'. Na' nbaraz gakra' kat yeyoll re'ra' re', na' gakrenre nada' nench na' wasyolla' cha'a gan' ba nwia' cha'a. 25Na' ka nak nna' cha'a Jerusalén na', lljasana' mell da gakrenen be'nn lwelljllo ka' zjalla'a na', be'nn ka' ba brej Diosen' llonlira'll Le'e. 26Le be'nn lwelljllo ka' lla'a yell ka' zjalli' gan' nbane Macedonian', na' Acaya, btop ake' mell da gakrén ake' be'nn ya'ch ka' ba nxenra'll Dios, be'nn ka' lla'a Jerusalén na'. 27Na' btop ake' mellen', na' bawé akre' btop ake'n, le naken to okré da llaya'l gon ake' ke be'nn Israel ka'. Le be'nn Israel ka'n be'e ake' leake' yeolol da wen da ba bzejnie' Dios leake', la'kze bi nak ake' be'nn Israel, na'llen' llaya'l gakrén ake' leake' bi da yallj akre'. 28Kat ba bayoll bena' rao na'a be'nn Jerusalén ka' mellen' bdop na', kana'telle sa'a cha'a Españan', na' tia' wia' re'. 29Nnezra' katen' yeda' gan' zore na', we'rena' re' Di'll Wen ke Criston', na' da xhen gonla'y Diosen' lli'o. 30Na' lla'tyoera' re', be'nn bi'che, ni ke Xanllo Jesucriston', na' ni ke yel nllie' ke Spíritu ke'e na', llnnaba' gakrenre nada', yelwillre Diosen' nench gakrene' nada'. 31Na' lewnnab bi gaka' rao na'a be'nn Israel ka', be'nn ka' bi nxenra'll Cristo gan' nbane Judea na', leska' lewnnab ke be'nn lwelljllo ka' lla'a Jerusalén na', nench chazra'll ake' dan' we'e ake' na'. 32Na' cha' Diosen' gonne' latj, nbaraz yeyeda' gan' zoren', na' yezi'ra'lla' yell keré na'. 33Na' Dios be'nnen' nzoa lli'o nbaraz sorenchgue' re'. Ka'n gakchga.

will be added

X\