Romanos 14

1Cha' to be'nn ba nxenra'lle' Criston', na' bi nna wxenra'lle' kwasro, lewrebe' gake' re' txhen, na' bi gakyollrenre' ka nak dan' bi nna wxenra'llya'nne' na'. 2Le zjani't be'nn nxenra'll Dios, na' llak akre' wakse gao ake' biteze yel wao, na' ni't be'nn bi nna wxenra'llya'nne kwasro, na' lleb ake' gao ake' biteze. 3Na' be'nn ka' llao biteze yel wao, bi llaya'l gon ake' kaze be'nn ka' bi llao kon ganze, na' be'nn ka' bi llao ake' biteze bi yel wao, bi llaya'l gon ake' kaze be'nn ka' llao biteze, le Dios na' bazenia'ne'e llop kwen akte'. 4¿Noxha nako' rwe' nench wlliayi'llo' akren' llon be'nnen' ba brej Diosen' nench none' le'e ka be'nn wen llin ke'e? Dios na' nake' ka xane', na' Le'en nnezre' cha' llone' da wen o cha' llone' da xhinnj, na' lekze Le'en nape' yel wak wzoe' le'e gonlle' da wen. 5Zjani't be'nn llak akre' zo to lla naklle lla xhen, za'kllen rao Dios ka lla ka' yela'. Na' ni't be'nn llak akre' toze ka nakse yeololte lla ka'. Totollo llaya'l gonllon do yichj do ra'll-llo dan' chejnie'llo llaya'l gonllo. 6Be'nn ka' llake zo lla da za'kll ka lla ka' yela' na', llbej ake' to lla nench lloe'xhen ake' Dios. Na' be'nn ka' llake toze ka nakse yeololte lla na', leska' lloe'xhen ake' Dios, kon ka xhbab ke ake' na'. Na' be'nn llao biteze yel wao, lloe'xhen ake' Dios katen' llao ake'n na', le yel llioxken ke Diosen' lloe' ake' ke dan' lle'j llao ake' na'. Na' be'nn ka' bi llao biteze, bi llao ake'n dan' llon ake' xhen Diosen', na' leska' yel llioxken ke Diosen' lloe' ake'. 7Le ni to lli'o chak nbanllo, bi yo' lo na'llo kwinllo; leska' kate gatllo, kere yo'llo lo na'a kwinllo. 8Ke len na' chak nbanllo, sollo gonllo dan' lle'ne Xanllo Jesucristo na'; na' cha' gatllo, lekze kon kan' nnekze Le'en gatllo. Kon rao na'a Xanllo naksen yo'llo cha' nbanllo o cha' gatllo. 9Le Xanllo Criston' gote', na' babane' radj be'nn wat ka' nench na' nake' Xan yeolol be'nn, ka be'nn ban ren be'nn ba got. 10Na' rwe', ¿bixchen ll-lliayi'llo' be'nn lwelljo'n? ¿Na' rwe' bixchen llonoe' kaze? Le yeololtellon' lljazello rao Criston' gan' gone' yel koxchisen'. 11Le xti'll Diosen' nyojen nen: Da li kwis naka' Dios, zoa' nbana', na' yeolol be'nne yedzoa xhib ake' rawa'n, na' yeolole' yeyombia' ake' toze nada'n za'ka' wxenra'll ake'. 12Kan' naken, na' yeololtellon' yedello di'll rao Diosen', cha' bi da benllo chak nbanllo. 13Ke len na' bi naken ke lli'o wlliayi'll-llo be'nn lwelljllo cha' bi da llone'. Da llaya'l gonllo, wiallo cha' lli'on bin' llonllo, na'llen' ll-lli'yen be'nnen' gone' da xhinnjen', na' wsanra'lle' bill wxenra'lle' Diosen'. 14Xanllo Jesucristo na' bzejnie're' nada' bnnezra' bi naken xhia cha' gaollo biteze yel wao. Zan cha' to be'nne gakre' naken xhia dan' gawe' na', naksen xhia ke'e cha' gawe'n. 15Cha' be'nn lwelljllo llakre' tore dan' llaollon', na' cha' llaotezllon, bi nllie'lloe' chet ka'. Criston' be'e kwine' gote' ni ke be'nn lwelljllon', na' lli'o bi llaya'l gaollo bi da gonen nench gak chope be'nn lwelljllon', na' kwej yichje' Criston', na' kweyie'. 16Bi we're latj nne be'nn ka' ke da wen na' llonre. 17Le ka nak yel llnebia' ke Diosen', kere naken da ye'jllon, na' da gaollon. Zan naken da zej lixheje, na' gonllo ka ni'trén be'nn lwelljllo wen, na' sollo nbaraz ba yo' Spíritun' lo ra'llda'ollo. 18Le be'nnen' llon ki, le'en lloe'rawe' Criston'. Na' llawé Diosen' kan' llone', leska' llazra'll be'nn ka' kan' llone' na'. 19Ke len na' llaya'l yeyirjla'll-llo ka sorén lwelljllo wen totollo, na' gakrenllo be'nn lwelljllo, nench na' so ake' wxenra'll ake' Criston'. 20Bi wchixra'll-llo be'nn lwelljllo cha' llaollo da llakre' bi naken wen gaollo. Wakse gaollo biteze yel wao, zan bi naken wen gaollon cha' len llchixra'llen be'nn lwelljllo. 21Naksen wen bi gaollo be're, na' bi ye'jllo xis uva da llsolle be'nne, na' billre da gonllo cha' wchixra'llen be'nne gone' da xhinnje, na' kwej yichje' bill wxenra'lle' Criston'. 22Cha' zollo wen rao Diosen' dan' llonlira'll-lloe', lli'oze ren Dios na' nnézello. Nbarazen' zollo cha' nnézello to lo ra'llda'ollon' bibi do'l kello de. 23Na' cha' bi da gaollo na' llakgánello, nakse xhia kello, le llákello bije llaya'l gaollo dan'. Le yeololte bi da llonllo, cha' llakgánello kat llonllon na', naksen xhyia kello.

will be added

X\