Romanos 13

1Yeololtello llaya'l wzenayllo ke koxchis be'nn llnebia', le Diosen' bzoe' leake' nnebia' ake'. 2Be'nnen' bi llzenaye ke koxchis ka' ba nzoa Diosen', Dios na'kzen' ll-lliayi'lle' chet ka', le Le'en lloe' latj llia ake'. Na' be'nn ka' bi llzenay ke koxchis ka', ba llon ake' nench wsa'kzi' ake' leake'. 3Le koxchis ka' kere llia ake' nench lleb be'nn ka' llon da wen na', llia ake' nench lleb be'nn ka' llon da xhinnjen'. Cha' lli'o lle'nello sollo wen bi llebllo, llaya'l gonllo da wen, na'llen' nne ake' llonllo da wen. 4Ka nak koxchis ka', zo ake' llon ake' xchin Diosen' nench sollo wen. Zan cha' llonllo da xhinnj, llaya'l lleb aklloe', le nap ake' yel llnebia' da wsa'kzi' ake' be'nne, cha' llone' da xhinnj, le Dios na'n none' rallna'a ake' wsa'kzi' ake' be'nn llon da xhinnj. 5Ke len na' llaya'l wzenayllo ke ake', na' kere dan' gonn ake' dan' sa'kzi'llo na'zen', leska' llaya'l wzenayllo ke ake' nench na' so lo yichjra'llda'ollo wen. 6Leska' ke len na' llaya'l chixhjllo kat bi da llo'tllo, na' bi da lla'ollo, le be'nn ka' llnebia' na'n, llon ake' da llaya'l gon ake', le Dios na'n nzoe' leake' gon ake'n. 7Na' chixhjllo cha' bi da llba'yllo, cha' be'nn bi da llaya'l we'lloe', llaya'l we'lloe'n, cha' bi da llo't lla'ollo, llaya'l chixhjllo rao be'nn wachixhjen'. Be'nn llaya'l gapllo bara'nn, gaplloe' bara'nne, na' be'nn llaya'l gonllo xhen, gonlloe' xhen. 8Ni to nono ba'yllo ke'e, na' llaya'l llie' lwelljllo. Le be'nnen' nllie' lwellje'n, ba llonkze' doxhen kan' ne ley ke Diosen'. 9Ley na' nen: “Bi tarenre no'r bi nak no'r keré, na' be'nn byio bi nak be'nn keré, na' bi gakre be'nn wen xhia, bi kwanre, bi chirjla'llre xti'll be'nne, bi sera'llre bi da de ke be'nne.” Na' biteze di'll yobre dan' nllia Diosen' bia'a gonllo, llayaken toze, na' nen: “Llie'ro' be'nn lwelljo' ka'kzen' nllie' kwino'.” 10Le be'nne yo' yel nllie', bibi llone' da ll-lleyi' be'nn lwellje'n. Ke len na' llonllo doxhen kan' ne ley na', cha' nllie'llo be'nne. 11Legón yeolol ka da ki, na' leyeyakbe'e bin' ba za'a. Ke len na' bill llaya'l gatra'll-llo ka llon to be'nn lltasxen. Le be'nnen' nak wasrá kellon', ba zelle'e awchoch kerke kan' bxenra'll-lloe'n. 12Ba llonen ka bale, ba zo rez cheni', ke len na' bill gonllo da xhinnj ka'. Lewago' beni' ke Xanllo Diosen' lo yichjra'llda'ore, na' sollo xhnid ka llon to be'nn waka'a ya kat ze'e llape'. 13Llaya'l gonllo da wen, ke nak ba dallo rao beni' ke Diosen'. Bi lenllo ga lle'j llaoxen ake', bi gakllo be'nn wazó, bi tarenllo xho'r xhyio be'nne, na' bi gonllo da nak zban, na' bi tilrén lwelljllo, na' bi waxhé' lwelljllo. 14Llaya'l gon kwinllo lo na'a Xanllo Jesucriston', na' gak yichjra'llda'ollon' kan' nak ke'e na', nench na' da xhinnjen' dan' zera'll xpe'rllon', bi nnebia'n lli'o.

will be added

X\