Romanos 11

1Na' llnnaba': ¿Ba bsanra'll Diosen' be'nn Israel ka', be'nn ka' nak yell ke'e? Ka'a bi naken ka'. Lekze be'nn Israel nada', gorja' rao dialla ke da Abraham, na' ke da Benjamín. 2Kere ba bsanra'll Diosen' be'nn Israel ka', le Lekze'n breje' leake' batna'te nench nak ake' yell ke'e. Lewiá kan' nyoj dan' bne da Elías, be'nnen' be'e xti'll Diosen' kana', bdawe' xhia ke Israelen', lle'e Diosen': 3“Xana', be'nn ki ba bet ake' be'nn ka' be'e ak xti'llo'n, na' ba bachinnj ake' rao bkoy gan' llaya'l we'rao ake' rwe'n. Ye toga nada' nna zoa' llzoa' xti'llo'n, na' renkze nada', lle'n akre' got ake'.” 4Na'll balli'i Diosen' xti'lle'n, lle'e le'e: “Nna zjani't ye gall mir be'nne ba breja', be'nn bi nna wzoa xhib ake' rao lwa'n, nzi'i Baal.” 5Na' ka'kze nna nakten nna' lla, ba baga'nn ye ra't be'nn ka' ba brej Diosen' dan' nllie're' leake'n. 6Diosen' kere breje' neto', ni ke da llonto' da wen na'. Le chenak breje' neto', ni ke da wen na' llonto' na', bill naken okré da llonn Diosen' neto' yel be'nn cha'o ke'e na' chenake. 7¿Akxha na' cha'? Dan' llayirj be'nn Israel ka', bi nna yedo'l akre'n; zan be'nn ka' ba breje' nench wxenra'll ake' Le'en, ba bado'l akre'n. Na' be'nn ka' yela' yezikre ben war yichjra'llda'o ake'. 8Na' llak kan' ne xti'll Diosen': “Diosen' bene' leake' nench bi chejnie' akre', na' nna' nak ake' ka to be'nn bi llre'e, na' ka to be'nn bi llene.” 9Leska' bne da Daviden' ke ake': Yeololte da llawé akre' da llak rao yellrion', wayakchgan to da wllix da wzap leake', nench lljabix ake', na' sa'kzi' ake'. 10Na' chol akchgue' nench bill re'e akre', na' ke chnare sa'kzi' akchgue' ka to be'nn noa' yoa' zi'i, to nleon ko'lle'. 11Na' llnnaba': ¿Nak be'nn Israel ka' ka be'nne byo' yej nia' nench bix ake'n? Ka'a bi naken ka'. Ni ke dan' bi bzenay ake' na'n, na'llen' go't latj ke be'nn bi nak be'nn Israel nench bará ake'. Ben Diosen' ka' nench cha' wayón be'nn Israel ka' xhbab, na' waxenra'll ake' Le'e. 12Le cha' dan' ben be'nn Israel ka' da xhinnjen', ni't be'nn ka' lla'a rao yellrion' nbaraz, na' cha' dan' bxinnj be'nn Israel ka', gok wen ke be'nn ka' bi nak be'nn Israel, leska'kze gontell Diosen' wen ke be'nn Israel ka' kate llin lla wayechj ake', na' waxenra'll ake' Le'e. 13De to da yepa' re', re' bi nakre be'nn Israel. Dios na' bse'l nada' wzejnie'ra' re' xti'lle'n, re' bi nakre be'nn Israel. Ke len na' llona' kon ga zerao sa'kra' nench wzenay be'nn ka' ke Diosen', 14le lle'nra' gon be'nn Israel ka' sera'll ake' gon Diosen' wen ke ake', kan' llone' ke re' nxenra'll Le'e, na' yedo'l akre' yel wasrá ke Diosen'. 15Le chet ka' dan' bkwas Diosen' be'nn Israel ka' ka'le, nench re' bi nakre be'nn Israel bazore wen rao Diosen', ka'kze nbaraz kwis wayak katen' waxenra'll ake' Diosen', gak ake' ka be'nn babán radj be'nn wat. 16Ka llon lli'o be'nn Israel kat llonllo yet xtir, ton lloe'llo Diosen' nench nak la'y da ka' yela'. Ka to yay, cha' roen' naken ke Diosen', leska' xho'ze ka' naken ke'e. 17Na' be'nn Israel ka' nak ake' ka xho'z yay, da ba nchoy xan yayen' to rao yay olivo wen, na' ba bni'ten chla're. Na' re' bi nak be'nn Israel nakre ka xho'z yay olivo da ze yi'xe, da ba bchoye' rawe, na' ba batile'n yay wen na', nench bayaken toze. Na' ka'n nello yay wen na'n ba no'xen re', na' ni'll ke na' nbanrenre. 18Na' bi gákere cha' nakllre be'nn wen ka be'nn Israel ka', kan' ba llak keré na'. Le kere re'n lloe're yel nban ke ro yayen', yay na'len' llonn yel nban ke re'. 19Na' nerizre: “Dios na' bene' be'nn Israel ka' ka yay dan' bchoye' xho'ze na', nench bazoe' lli'o roraz ake'.” 20Ka'kzen' gok, dan' bi benlira'll ake' Criston', ben Diosen' leake' ka xho'z yay dan' ba bchoy xane len, na' ba bazoe' re', le nxenra'llre Cristo na'. Ke len na' bi gakre be'nn ya'ra'lle, lesechich lewxenra'lle'. 21Cha' Diosen' bi bazi'xhene' ke leake'n nak akte' ka xho'z yayen' dogarje, leska' bi si'xhene' ke re' cha' bi wxenra'lltezre. 22Lewiaya'nn kan' nak Diosen'. Nake' be'nn wen, na' nakte' be'nn znia. Goke' be'nn znia ke naken bkwase' be'nn Israel ka', na' nake' be'nn wen kwis ke re', bi nakre be'nn Israel. Ke len na' llaya'l setezre wxenra'llre, nench ke leska' kwase' re' ka'le. 23Na' cha' leake' waxenra'll ake' Diosen' da yobre, yeyak ake' rao ne'e, le nape' yel wak yezoe' leake' nbaraz rawe'n, na'll yeyak ake' ka xho'z yay dan' bayone' toze kone yay xhne'e na'. 24Le cha' re' nakre ka xho'z yay olivon' dan' ze yi'xe, na' Diosen' bchoye' re', bazoe' re' rao xho'z yay wen na', la'kze bi nakre dogarje xho'ze, wawellre' yezoe' be'nn Israel ka' le' yayen' da yobre, be'nn ka' nakse ka dogarje xho'z yay na'. 25Be'nn bi'che, lle'nra' chejnie're da ni da nono nna nneze, nench bi gakre be'nn ya'ra'll, gákere za'kllre kerke be'nn Israel ka'. Diosen' be'e latj bi llzenay ake' xti'lle'n nench wayoll waxenra'llre, re' bi nakre be'nn Israel. 26Wayoll na' yeolol be'nn Israel ka' yerá ake'. Gak kan' nyoj xti'll Diosen' gan' nen: To be'nn za'a gan' nzi'i Sión, yebeje' be'nn ka' lo da xhinnjen', be'nn ka' nak dialla ke da Jacob. 27Da ni llcheba' gona' ke ake', katen' ba baka'a da xhinnj ke ake'n. 28Dan' bi llejle' be'nn Israel ka' Di'll Wen ke Diosen', na'llen' ba blli'ye' leake' chla're nench breje' re', bi nakre be'nn Israel chejle're ke'e. Zan Diosen' nllie'kzre' leake', le xozxta'o ake' ka', breje' nench bene' leake' yell ke'e. 29Le Diosen' bi yeke'e bi da gonne', ni okré dan' llone' ke be'nnach bi yeyatre'n. 30Re' batna' bi bzenayre ke Diosen', na' dan' bi gokra'll be'nn Israel ka' wzenay ake' ke'e, ba baya'chra'll Diosen' re'. 31Ke len na' bi llzenay be'nn Israel ka' ke Diosen'. Ka'n llak nench llin lla wroe' Diosen' yeya'chra'lle' leake' kan' llaya'chra'lle' re'. 32Diosen' ba bchoybie' ke yeolol be'nnach de do'l ke ake' dan' bi llzenay ake'n, nench wroe're' yeya'chra'lle' yeololte be'nne. 33Be'nn si'n kwis nak Diosen', nnezre' yeololte da llak na' da za gak. Bi gakse chejnie'llo da ka' llone'n, bi nnézello akren' llwie' gone'. 34Le ki nyoj xti'lle'n: “¿Noxha nombia' yichjra'llda'o Xanllo Diosen' bi dan' llone' xhbaben'? Na' ¿noxha bzejnie' Le'e kan' llaya'l gone'n? 35Na' ¿noxha lli'o ba be'llo Diosen' da nak kello, na' wchie'rizelloe' nench wayixhje' dan' ba be'lloe'n?” 36Le Dios na'n ba bene' yeolol da de, bene' da ka' nench sie' yel bara'nne. Ke len na' llaya'l we'raollo Diosen' ke chnare. Ka'n gakchga.

will be added

X\