1 Nada' Pablo llzoja' re'. Llona' biteze da ne Xanllo Jesucriston'. Dios na' breje' nada' naka' postl ke'e, bse'le' nada' nench na' llyixjwe'ra' Di'll Wen ke'en. 2 Dios na' ba bzenre' be'nnachen' Di'll Wen ke'en, bene' nench bni't be'nn be'e ak xti'lle'n kana', na' bzoj ake'n. 3 Di'll Wen ke Diosen' llzejnie'n lli'o ke Xhi'nne' Xanllo Jesucriston'. Le'en gorje' goke' ka be'nnach rao dialla ke da rey David. 4 Spíritu ke Diosen' broe'n nak Xanllo Jesucriston' dogarje Xhi'nn Dios, na' nape' yel wak, le babane' radj be'nn wat ka'. 5 Na' neto' dan' llonlira'llto' Xanllo Jesucriston', ben Diosen' da wen keto', le breje' neto', na' bse'le' neto' llyixjwe'to' xti'lle'n, nench na' chanll be'nn wxenra'll Le'e, na' chejle' ake' ke'e, na' wzoa ake' xti'lle'n doxhente yellrio. 6 Ka'n ba brej Diosen' re', nench nakre rallna'a Jesucriston'. 7 Llzoja' da ni ke yeololre lla're Roma na', re' ba brej Diosen' nakre rallne'e, nllie're' re'. Na'll llnnaba' rawe'n ren rao Xanllo Jesucriston' gakrén akchgue' re', na' wzoa ake' yichjra'llda'ore so kwezre nbaraz. 8 Zga'tek nnia' re', Jesucristo na'n, zoe' llakrene' nada' nench lloa'a yel llioxken ke Diosen' ke yeololre, le be'nn ka' zjalla'a doxhen yellrio na', lloe' ake' di'll kan' nxenra'llre Criston'. 9 Nnezkze Diosen' yo'y ras kat llalwille'n, llnnaba' gakrene' re'. Nake' be'nn nxenra'lla' do yichj do ra'lla', na' llona' xchine', lloa'a xti'll Xhi'nne' Jesucriston'. 10 Na' llnnaba' rao Diosen' gonne' latj yedwia' re', le ba gok scha bi nna yeda'. 11 Lle'nra' yedwia' re', nench wzejnie'llra' re' ye ra't wxenra'llya'nnre Diosen'. 12 Nada' ren re' setipllo wtipra'll lwelljllo wxenra'll-llo Jesucriston'. 13 Be'nn bi'che, lle'nra' nnézere da zan ras ba gokra'lla' yedwia' re', na' bi nna gak yeda'. Lle'nra' yeda' yedyena' xchin Diosen' gan' zore na', nench chanre chejle're ke Jesucristo kan' ba jena' yezikre yell ka' gan' ba bya'a. 14 Da llaya'l gona' we'rena' yeolol be'nne di'll ke Jesucriston' be'nn lla'a lyell, be'nn lla'a yi'xe, be'nn llejnie', na' be'nn bi llejnie'. 15 Ke len na' lle'nra' kwis we'rena' re' zjalla'a Roman' xti'll Diosen' kan' ba jea'n do ga yobre. 16 Bi lliye'ra' dan' lloa'a Di'll Wen ke Jesucriston', le len na' nsa'n yel wak ke Dios nench yerá yeolol be'nn llejle', la'kze be'nn Israel, na' be'nn bi nak be'nn Israel. 17 Na' Di'll Wen ke Jesucriston' llzejnie'n lli'o, cha' be'nn llonlira'lle Jesucriston', Dios na' gone' leake' be'nn wen, billre bi de da gonllo gakllo be'nn wen rawe'n. Kan' nyoj xti'll Diosen' nen: “Be'nnen' llonlira'll Diosen', nake' be'nn wen rawe', na' ga't yel nban ke'e.” 18 Diosen' zoe' yebán' ba broe're' be'nnachen', ke chnaren' sa'kzi' yeolol be'nne bi llonlira'll Le'e, be'nn llon da xhinnj. Na' dan' llon ake' da xhinnjen', bi lle'n akre' gombia' ake' di'll li ke Diosen'. 19 Da llaya'l nnez akre' ke Diosen', ba nnez aksre'n, le Dios na'kzen' ba broe're'n leake'. 20 La'kze bi llre'llo Diosen', llre'llo kan' zoe' llnebie', na' nnézello de yel wak ke'e kan' bene' bxie' yellrio ni, na' yeolol be'nnach llre'e akre' da ka' ba bene' na'. Len na' bibi de wde' akre', ne ake' bi nnez akre' cha' zo Dios. 21 La'kze nnez akre' zo Diosen', bi llonlira'll ake' Le'e, ni ke lloe' akze' Le'e yel llioxken. Bibi za'k xhbab ke ake'n, na' nchol yichjra'llda'o ake'. 22 Ne ake' nak ake' be'nn si'n, na' gok ake' ka be'nn bi llejnie'. 23 Ba bkwas ake' Diosen' ka'le, la'kze nake' le zerawe be'nn za'ke, na' zoe' zejlikane. Na' ba llonlira'll ake' no lwa'a ke be'nnach be'nn llde ke, be'nn llon ake' roraz Dios, na' no lwa'a lsa'ke ba zo xire, no ba zo tap nia'na'a, na' no ba nxhob le'e. 24 Ke len na' bsanra'll Diosen' leake', dan' llon ake' da xhinnjen', na' kon kan' nen lo ra'llda'o ake' na', na' bale' llon ake' da llawé xpe'r ake' ren lwellj ake' da nak zdo'. 25 Brej yichj ake' di'll li ke Diosen', na' llonlira'll ake' da wenra'llre. Llonlira'll ake' ke da ka' ben Diosen', na' bi llejle' ake' ke Dios be'nnen' llaya'l gonlira'll-llo, gonllo xhen ke chnare. Ka'n gakchga. 26 Ke len na' Diosen' brej yichje' leake' dan' llon ake' da yel zdo', kon ka nen lo yichjra'llda'o ake'. Rente bal no'r ka' llon ake' da ke llaya'l gon no're, na' llko'yele lwellj ake' nench na' llonrén ake' leake' txhen, llon ake' da bi llaya'l gon ake'. 27 Na' ni't be'nn byio be'nn bi lle'n akre' sorén ake' no're, llawé akre' lwellj be'nn byio ake, na' darén lwellj byio ake', llon ake' da nak zdo'. Na' dan' ba blleyi' kwerp ke ake' na', naken da llaya'l sa'kzi' ake' yel wen da xhinnj ke ake' na'. 28 Ba brej yichj Diosen' be'nn ka' bi lle'ne wzoa xti'lle'n, na'llen' nna ni't aklle' llon ake' da ke llaya'l gon ake', kone xhbab da nak ke nxhia ke ake' na'. 29 Llon ake' yeolol da xhinnje, be'nn byio darén ake' no'r bi nak no'r ke ake', na' no're darén ake' be'nn byio bi nak be'nn ke ake', nak ake' be'nn xhe'e, be'nn wen da xhinnj, zera'll ake' da de ke be'nne, nak ake' be'nn wen xhia, be'nn wachach llwie lwellje', dil ake', ziye'e ake', nak ake' be'nn bi llzenay. 30 Llasnné llaschach ake' ke be'nne, llkwas ake' Diosen' ka'le, bibi bara'nn llap ake' be'nne. Llayoe'rao kwin ake' ll-lan ake' da wen, llarjla'll ake' gon ake' bi da xhinnj, bi llzenay ake' ke xaxhna' ake'. 31 Bi llejnie' akre', da ba bne ake' gon ake' bi llon ake'n, nono llayombia' akre', bi llazi'xhen ake' ke be'nne, na' bi llaya'chra'll ake' be'nne. 32 Ba nnez aktere' kan' ba bne Diosen' gone' yellayrao be'nn ka'. Na' la'kze nnez akre' kan' ne'e na', nao akse' llon ake' da xhinnjen', na' llawé akre' kat ba nao be'nn yobre llon ake' kan' llon leake' na'.
