Apocalipsis 9

1Na'll bkwell trompet ke angl wga'yen', le bre'tera' bra'll to berj le' yebán', jaye'tten rao yellrion'. Na'll le be'te Diosen' len xhiya, nench wsarjen yell zitj dan' nak lo yi' gabil. 2Na'll bsarjen yellen', na' bzolla'a to llén xhen ka llak lo horn kat lla'den yi'. Na' bkwe'j llén na' rao will, ren rao lla na'. 3Gan' bzolla'a llén na', bllach bichsoa zan, zjakba' rao yellrion', zjatill akba' be'nne, ka llon xhban leo, ba ll-llach rao yellrio. 4Na'll goll Diosen' leba' bibi góneba' yi'x ya' ka', ni da naz ake', ni yay lla'a rao yellrio, na' be'e latj chill akba' be'nn ka' bi nyi'ch sey ke Dios roxhga ake'. 5Na' bi be'e latje gotba' leake', kon cha'a akba' ga'y be'o, wsa'kzi' akba' be'nn ka'. Na' kat chillba' be'nn ka', la ake' ka llrallo kat yill xhban leo lli'o. 6Na' kat yeso'n akba' ka', na'll nnab be'nn lla'a yellrio gat ake', na' bi gat ake', ye'n akre' bill so ake' yellrio, na' bi gak ka dan' llnnab ake'n. 7Ka nak bichsoa ka' bre'ra'n, nak akzba' ka kabay ba lljak rao wdilre, na' yichj akba'n naksen ka ba nzoa corona de ya cha'o dan' nzi'i oro, na' lloa'rao akba'n naksen ka lloa'rao be'nnre. 8Na' llia yichj akba' ka yich yichj no'r, na' lay akba'n naksen ka lay bell yi'xre. 9Na' nak akba' to da nak de ya da llakrén kwerp ke akba'n, na' xir akba'n llonen llakia ka ga zjak kabay zan, ba nxhob karret ba zjak rao wdile. 10Na' rao xhban akba'n zjazón xhle'chba', naken ka ke xhban leo nench chillba' be'nne, na' be'e latj wsa'kzi' akba' be'nne rao ga'y be'o. 11Na' dan' llnebia' bichsoa ka', naken angl dan' ll-lleyi' da za'a lo yi' gabile, len na' nzi'n Abadón di'll Hebreo, na' leska' nzi'n Apolión di'll griego. 12Ba bde yel llza'kzi'n to kwen na', na' za za'a ye chopen dan' wlleyi'n. 13Na'll bkwell trompet ke angl wxhopen', na' benra' bnne to be'nne gan' zo bkoy de ya cha'o dan' nzi'i oro, dan' ze rao Diosen', bkoy da llia loze dap skinte. 14Na'll balwille' angl wxhopen' no'x trompeten', lle'e le'e: —Basell dap angl ka' nllej lloa' yeo dan' nzi'i Eufrates. 15Na'll baselle dapte angl ka', be'nn ka' ba bllie' bia'a, bi iz, bi be'o, na' bi lla, yeso'te be'nnach, ye ra'tze ke gak achj weje be'nn lla'a rao yellrio. 16Na' benra' lla'a ka chop gayoa millón (200,000,000) be'nn waka'a ya ke ake' zjallia ko'll kabay ake. 17Kin' gok bre'da'ora' kabay ka', na' be'nn ka' zjallia ko'll akba'n, nak ake' to de ya da nkwa'ch lcho' ake', na' ya na' nla'n ka klor ke yi', na' da sul, na' da gache. Na' yichj kabay ka', nak aken ka yichj bell yi'xe, na' lo lloa' akba'n, ll-llachen yi' ren llén, na' ren dan' nzi'i azufre da lla'lnninne. 18Ye ra'tze ke gok achje be'nn lla'a yellrion' wasa'te kone yi', na' ren llén, na' ren azufre dan' bllach lo lloa' kabay ka'. 19Na' benrén lloa' akba' na' llin, na' ren xhban akba' nench bet akba' be'nnach, xhban akba'n goken ka bel znia, zote yichj akba' nench bdi'nnen be'nne. 20Na' be'nn ka' baga'nn bi goten', ni ke bayat akzre', ni ke bsan akze' dan' lloe'rao ake' daxi'o ka', na' lwa'a ke ake' ka', da nake de ya cha'o dan' nzi'i oro, de ya cha'o dan' nzi'i plat, de yan' nzi'i bronce, de yej, na' de yay, la'kze bi llre'e lwa'a ka', na' bi nne aken, na' bi llak sa'a aken. 21Ni ka' bi bayat akzre' yel kan' llon ke ake'n, ka dan' llot ake' be'nne, na' da llonrén ake' txhen be'nn walla'a ake, na' ren da llonrén xpe'r ake' yel zdo', ni dan' llban ake' da de ke be'nne.

will be added

X\