Apocalipsis 5

1Na' bre'ra' be'nnen' llia llnebia'n, kone ne'e cha'we na', no'xe' to yich da ndoblol, na' llop la'ten nyoje ke rawe ke ko'lle, na' neyjten nyi'chen ren galle sey. 2Na' bre'ra' to angl war, na' bnne'e zillje, ne'e: —¿No nake be'nn za'k wche'ze sey ki, nench llach yichen' lla'n na'? 3Na' ni to nono llra' wchache yich ka', ni yebá, ni yellrio ni, ni gan' lla'a be'nn wat ka', ni to nono bllelkze wche'ze'n, na' wia ake'n akre naken. 4Na' bllella' kwis, le nono zo be'nn za'k wchache' yich ka' wrabe'n, na' ni ke llakze wia ake'n akre naken. 5Na' to be'nn nake be'nn brao golle' nada': —Bi kwello'. Wiachek, na' zo be'nnen' gorj rao dialla ke Judá, na' gok da xozxta'we' da Daviden', na' dan' nape' yel llnebia' xhen na', nake' ka to bell yi'x. Na' Le'e za'ke' wxhoxhje' sey ka' gallen', na' wchache' yich ka'. 6Na' bre'ra' gan' lli' be'nnen' llnebia' radj be'nn tap ka' zjallia xiren', na' kllol gan' lla'a be'nn tapalloa ka' (24). Bre'ra' ka to xhi'r da'o ban' ba bet ake', ka xhi'r ba llia gall loze, na' gall yejraoba'. Na' yejraoba' gallen' zejen zokze Spíritu ke Diosen' doxhen yellrio, llonen kan' ne'e na'. 7Na' be'nnen' bre'ra' ka to xhi'r da'on, jaxie' yichen' no'x be'nnen' ne'e cha'we, be'nnen' lli' llnebia' na'. 8Na' ka jaxie' yich na'n, be'nn tap ka', na' ren be'nn tapalloa ka', le go't akte' slloa're rawe'n. Na' twej arpa zjano'x be'nn brao ka', na' twej ye's de ya cha'o dan' nzi'i oro ga llzey ake' yare, na' yar na' zeje di'llen', lloe'rén ake' Diosen' di'll kat llalwill ake' Le'e, be'nn ka' nxenra'll Le'e. 9Na'll bel be'nn ka' to da kobe dan' ne'e: Za'ko' jaxi'o yichen', na' bxhoxhjo' seyen' nyi'chen na', le bzane yel nban ko'o, bet ake' rwe'. Brarj xcheno' nench bnitrao' da xhinnj keto', nench nakto' rallna'a Dios, nakto' be'nn wde wdere yell xhen, na' wde wdere yell da'o, na' wde wdere dialla keto', na' llakto' wde wdere di'll da de rao yellrio. 10Na' brejo' neto' nench nakto' ka to be'nn wnebia', na' zoto' nxenra'llto' Diosen' ka bxoz, na' ka llin lla, nnebia'to' rao yellrio ni. 11Na'll bwia' na' benra' chi'i angl zan kwis, ni ke bzoezra' wrab ake'. Zjazellá angl ka' to kwit be'nnen' llia llnebia' na', na' ganna' zerén be'nn tap ka' zjallia xire na', ren be'nn brao tapalloa ka'. 12Na' benra' lloe' ake' di'll zillje, ne ake': Be'nnen' nak ka xhi'r da'on, bzane kwine' ni ke lli'o be'nnach, na' za'ke wxenra'll-lloe', le Le'en llnebie' doxhente, na' yo' rao ne'e yeololte da zjadé. Nake' be'nn si'n war, na' nape' yel wak xhen. Llaya'le we'lloe' yel bara'nne, na' we'llo di'll nake' be'nn za'ke. 13Na' lekze benra' yeolol be'nn zjalla'a yebán', na' yellrio ni, na' be'nn zjalla'a xhanre yellrio, na' be'nn zjalla'a lo nisda'o, lloe' ake' di'll ne ake': Lloe'raoto' Dios be'nnen' llia llnebia'n, na' be'nnen' nake ka xhi'r da'o, nape' yel bara'nn, na' nake' be'nn za'ke. Na' nape' yel wak xhen kwis nna', ren ke chnare. 14Na' be'nn tap ka' zjallia xiren', ne ake': —Ka'n gakchga. Na' be'nn tapalloa ka' le go't akte' slloa're, be'xhen ake' Dios be'nnen' zo ke chnare.

will be added

X\