Apocalipsis 4

1Bde na', bre'da'ora' nyarj le' yebán', naken ka to lloa' yo' ke be'nne. Na' benra' da yobre bnne be'nn bne da nelle zillj kwis, ka'kze bell to trompet, golle' nada': —Byep gan' zoa' ni, nench na' wroe'ra' rwe' da ka' za gak. 2Na'll le bente Spíritu ke Diosen' bre'da'ora' yebá gan' llia be'nnen' llnebie'. 3Na'll le bre'tera' be'nnen' llia llnebia'n, nake' llaktit ka'kze llaktit yej kese dan' nzi'i jaspe ren dan' nzi'i cornalina. Na' to da nak ka to bchit byechjen gan' llie' llnebie'n, na' naken llaktit ka llaktit to yej dan' nzi'i esmeralda. 4Na' kwit Diosen' gan' llie' na', zjalli' ye tapalloa (24) be'nn nak be'nn brao, be'nn llnebia'rene'. Nak ake' ra'll lliche, na' zjando's yichj ake'n twej corona de ya cha'o da nzi'i oro. 5Na' gan' llia Diosen', llep yes llak llakia na' llachj. Na' rawe gan' llie' na', zjani't galle yi' da lla'lnninne, yi' gall ka' nak aken Spíritu ke Dios. 6Na' doxhen rawe gan' llie' na', nllirj to da llaktit da nak ka yej kes, na' nla'n ka ga de nis xhen. Na' zjani't ye tap be'nn nechj ake' Le'e. Na' zjallia da zan yejrao ake' do ko'll ake' do rao ake'. 7Be'nn nellen' nake' ka to bell yi'xe, na' be'nn wllope na', nake' ka to belle, na' be'nn wyonne na', nak lloa'rawe'n ka be'nnach, na' be'nn wdape na', nake' ka to bsia ba ze rao lla. 8Na' be'nn tap ka', zjazó xir ake' xop wejen', na' zjallia zan yejrao ake' do lo xir ake' do lo ko'll xir ake'. Na' do lla do yer llasné ake': Nakla'ye', nakla'ye', nakla'ye', Xanllo Diosen' be'nnen' nap le zeraoze yel wak xhen. Ba zokze', na' zokze' kan' za xe yellriote, na' zokze' ke chnare. 9Na' yo'y ras kat be'nn tap ka' lloe' ake' di'llen' kan' nak Dios be'nnen' llia llnebia'n, be'nnen' za'k kwis, be'nnen' zo ke chnare, na' llon ake' Le'e xhen, na' lloe' ake' yel llioxken ke'e, 10na'll be'nn tapalloa ka', lla't ake' slloa're rao Diosen', llon ake' Le'e xhen gan' llie' na', na' llni't corona ke ake'n xhnie'n, llasné ake': 11Xa Dios, za'ko' wxenra'llto' rwe', soto' gapto' rwe' bara'nne na', we'to' di'll ke yel wak xhen ko'on, le rwe'n beno' yeolol bi da de, na' rwe'n byazra'llo' ka', na'llen' ni't aken, na' gok aken.

will be added

X\