Apocalipsis 3

1’Leska' ki wzojo' be'nnen' bse'la', lloe' xti'lla'n ren be'nn ka' lldop ll-llay llonlira'll nada' gan' nzi'i Sardis: “Nada' napa' Spíritu ke Dios dan' nak ka galle spíritu, na' no'xa' berj ka' galle, na' llepa' re': Nnezyollra' kan' llonre nere nbanre, zan nakre ka be'nn wat. 2Lewayón xhbab kan' llonre, na' lewxenra'll-ll nada', legón kan' nia' na', chaga bi nna llin lla kweyi're, le bi nak dan' wen dan' llonre na', na' bi yewé Diosen' ka'. 3Lesó lelljadinra'll xti'lla' dan' bzejnie' be'nn ka' re', na' dan' bénere kana'. Na' lewzenayen, nench wayátere da xhinnj kerén'. Le chet ka' bi yebanra'llre, yeda' gan' zeren' ka za'a to be'nn wan, na' ni ke nnézzere baten' yeda'. 4Zan zjarenkze balre be'nn Sardis, bi benre bzi'o ra'llen' benn Diosen' re'. Na' kat llin lla gonna' to ra'll llich gakre, tarenre nada', le ba za'kre tarenre nada' gonre nada' txhen. 5Na' cha' soere bi kwej yichjre xti'lla'n, la biteze gak keré rao yellrio ni, na' gonna' ra'll llichen' gakre, na' kbat yelana' raren' le' yich kia'n gan' nyoj ra yeolol be'nn nape yel nban zejlikane, na' we'rena' Xa'n di'll, na' ren be'nn ka' nak angl ke'e ka', nakre nada' txhen. 6Re' zo nayre da llene, lewzenay kan' ne Spíritu ke Diosen', llen re' lldop ll-llayre llonlira'llre nada' gateze.” 7’Na' ki wzojo' be'nnen' bse'la', lloe' xti'lla'n ren be'nn ka' lldop ll-llay llonlira'll nada' gan' nzi'i Filadelfia: “Naka' Be'nn La'y, na' llonteza' kan' bnia' gona'n. Na' no'xa' xhiya ke da David be'nnen' bnebia'. Kate llsarja' cho' be'nne gan' llia Diosen', ni to nono gak yeseje', na' kate llseja', bi gak cho' be'nne, na' ni to nono gak wsarje, na' llepa' re': 8Nnezyollra' ka wen na' llonre na', na'llen' ba bsarja' to ga tere ga nono gak yeseje. Na' la'kze bi nar-re, ba llzoare xti'lla', bi brej yichjren' kan' biteze baso'n akere' re'. 9Bal be'nn Israel ka' zjalla'a gan' zoren', llasné ake' ba brej Diosen' leake', na' gone' wen ke ake'. Non ka ne akze'n, bi breje' leake', le bi llonlira'll ake' Le'e. Nak ake' be'nn wxhiye'e nao ake' ke xan daxi'o ka'. Na' wllin lla kat gona' gap ake' re' bara'nne, nench gakbe'e akre' nllie'ra' re'. 10Ni ke dan' bi brej yichjre xti'lla'n, la'kze bsa'kzi' ake' re', ke len na' yellojre wen kate llin lla sa'kzi' yeolol be'nnach. Kana'n wroe'n ke toto be'nnach, cha' bxenra'll ake' nada' o cha' bi bxenra'll ake' nada'. 11Ba rez yeda' da yobre, lesotip lewxenra'll nada' nench nono yeka'a ke nak dan' ba nwia' gonna' re'. 12Cha' re' ba bzoere bi kwej yichjre xti'lla'n, wllin lla gona' re' choch, na' gona' re' ka to bdop ke yoda'o brao ke Diosen', le yellinre gan' zo Dios na'n, na' yega'nnrenre' ke chnare. Na' totore wzoja' roxhgaren' ra Dios kia', na' ra yell ke'en, Jerusalén dan' nake da kobe da yetj yebá, na' totore wzoja' roxhgaren' ra'a nada' da nak da kobe. 13Re' zo nayre da llene, lewzenay kan' ne Spíritu ke Diosen', llen re' lldop ll-llayre llonlira'llre nada' gateze.” 14’Na' ki wzojo' be'nnen' bse'la', lloe' xti'lla' ren be'nn ka' lldop ll-llay llonlira'll nada' gan' nzi'i Laodicea: “Llona' nench llak kan' zera'll Diosen', lloa'a di'll li da naken. Naka' txhen ren Diosen' kan' bxhe yellriote, na' llepa' re': 15Nnezyollra' kan' llonren', ni ke nakzre ka to da zay, ni ke nakzre ka to da la. Nia' ka' le ni ke lloe'la'llzre wxenra'llre nada', na' ni ke llatra'llzre. Wéntere chenak nakre ka to da zay o chenak nakre ka to da la. 16Na' ni ke dan' nakre ka to da ba'l, na' bi nakre ka to da zay, na' ni ke nakzre ka to da la, waxheja' re' ka'le. 17Re' nere: Be'nn wnia' nakto' na' ba nnia'to', na' bibi llyálljeto'. Na' bi llakbe're nakre be'nn zban rao Dios. Bi llakbe're nakre ka to be'nn lchole, na' ka to be'nn dá gal yid. 18Ke len na' llepa' re', llaya'l si're da gonna' re', da nak da za'klle ka ya cha'o dan' nzi'i oro dan' ba bzey ake' nench baga'nnen dogarje. Si're da gonna' re', nench da li sore nbaraz. Na' lennab yezi'xhena' keré nench gak ra'llda'oren' yalle, kan' nak xhara'n be'nn nak ra'll llich kwis. Ka'n gonre nench bill re'ra' re' ka to be'nn dá gal yid, be'nn llaya'l gake zdo' ke. Na' leyecha'a yichjra'llda'oren', na' bill gakre ka to be'nn lchole, be'nn yallj yejrawe'n rmell nench yere're. 19Kon be'nn nllie'ra' na', dile' na' llsa'kzie'. Ke len na' llaya'l kwek yichjre, na' leyeyate ke da xhinnj kerén'. 20Na' ganni nia' re', llona' ka to ke be'nn zellá lloa' yo' keré, nne'e zillje, na' cha' nol re' yénere, na' wsarjre choa', na' wzenayre kia', na'll gaorena' re' xche' txhen, na' re' gaorenre nada' txhen. 21Na' cha' soere bi kwej yichjre xti'lla' ni, wllin lla yedlle'renre nada' gan' llia' llnebia' na'. Ka'n bena' nada', bzoera' bena' gan kan' bne Xa' na', na'llen' ba llia' llnebia'rene' txhen. 22Re' zo nayre da llene, lewzenay kan' ne Spíritu ke Diosen', llen re' lldop ll-llayre llonlira'llre nada' gateze.”

will be added

X\