Apocalipsis 21

1Bde na' bre'ra' le' yebán' ba bayaken da kobe leska' yellrion', le yebán' da gok da nelle na', na' yellrio da nell na' ba barán aken. Leska' billbi nisda'o go'te. 2Nada' Juan bre'ra' yell ke Diosen', Jerusalén kobe dan' lli' yebán' gan' zo Diosen', betjen rao yellrio. Nonen nbaraz ka ke to no're ba bayone' nbaraz wchayne'e. 3Na' do gan' llia Dios na', benra' bnne to be'nn zillje, ne'e: —Wiacheke, ba betj Diosen' zorene' be'nnach, na' sorenteze' leake', le breje' leake' nench nak ake' yell ke'e. 4Dios na' gone' bibi gak ke ake' da soya'ch ake', da kwellrén ake', nollno gat, nollno chey la, le ba bde ke yeolol da ka' go't yellrio nellen'. 5Na'll bne be'nnen' llia llnebia'n, ne'e: —Lewiá ke, nada' llakoba' yeololte bi da zjadé. Leska' bne'e: —Bzoj di'll ki ba benro' na', le naken di'll li, na' gak kan' bnia' na'. 6Bayoll na' bne'e nada': —Ba gok da llaya'l gak. Nada' naka' ka ti'ch di'll nelle, na' naktia' ka ti'ch di'll ga llayollen, ka to be'nn bxe bi da bxie', na' wasyollte'n. Be'nne bile, nada' we'e nis da ye'je' dan' nsa'a yel nban, na' bitbi sa'kren. 7Be'nne nxenra'll nada', cha' ba bzoere' bi wsanra'lle' xti'lla'n, da wen gak ke'e ka di'llen' ba be'kza' na', nada' gaka' Dios ke'e, na' le'e gake' xhi'nna'. 8Na' ka nak be'nn ka' blleb xhnneza', na' be'nn bi llonlira'll nada', na' be'nn ka' llaso'n dan' bi llazra'lla', na' be'nn wen xhia ka', na' be'nn darén ak no'r yobre o be'nn byio yobre, na' be'nn llon txhen yel walla'a, na' be'nn llonlira'll lwa'a ak, na' yeolol be'nn lloe' di'll wenra'lle; yeolol be'nn ka'n llaya'l sa'kzi' ake' ke chnare lo yi' xhen dan' nak ka to nisda'o, lo yi' gabil gan' lla'lnninn dan' nzi'i azufre. Na' dan' gak ke ake' na', len na' nello yel got wllope. 9Na'll bre'ra' to angl gall ka' be'nn ka' be'x leo ka' galle, da ka' yollte da brarj ake', nench gok yel zi' le zerawe yellrion'. Badbi'ye' gan' zia' na', na' lle'e nada': —Da ke, wroe'ra' rwe' be'nnen' nak ka to no'r za wchayna'a, na' Jesucristo be'nnen' nak ka to xhi'r da'on bet ake', na' nnello Le'en si'i no'ren'. 10Na' Spíritu ke Diosen' benen nench bache'e anglen' nada' to rao ya' xhen da nak sibe, na' broe're' nada' yell Jerusalén na', dan' nake yell ke Dios. Zon yebá na', na' lletjen rao yellrion'. 11Na' yellen' goken llaktit kone beni' dan' nsa'a Diosen'. Na' llaktit ken naken ka to yej da za'ke, ka yej dan' nzi'i jaspe dan' llre'llo ka yej kes. 12To ze'e sib xhen nechj yellen', na' zjazó chllinn (12) kwen ga nak zi cho'llo, na' toto gan' nyarj na', zjazé twej angl. Na' le' gan' cho'llo na' nyoj ra chllinn kwe' be'nn ka' bxe chllinn kwe' dialla be'nn Israel ka'. 13Na' le' ze'e dan' zo chla' yellen' gan' llra' willre zjazó chonne gan' nak zi cho'llo, na' gan' llen willre zo ye chonnen, na' yichjre zo ye chonnen, na' lle'lre zo ye chonnen. 14Na' ze'e dan' nechj yellen', yo' chllinn yej xhen rane, na' le' yej ka' nyoj ra chllinn be'nn ka' nak postl ke Jesucristo be'nnen' nake ka xhi'r da'o na'. 15Na' angl be'nnen' be'rén nada' di'll na', no'xe' to ya da nak de ya cha'o dan' nzi'i oro da gonrene' llin wllixe' yell na', ren ze'e na', na' lloa' gan' nak zi cho'llo. 16Yellen' toz ka naken de zra'ye ren de zdonre. Anglen' bllixe' yellen' kone yan' no'xe' na', na' goken chop mir chop gayoa (2,200) dan' nzi'i kilómetro chla' wejen', ka tonn nake zra'ye na', ka to sib naken. 17Na'll bllixe' ze'e dan' nechj yellen', na' goken to gayoa tapayon (144) tchit dan' nombia' be'nnache, len na' benrén anglen' llin bllixe'n. 18Ze'e dan' nechj yellen' naken de yej da za'ke da nzi'i jaspe, na' doxhen yellen' naken de ya cha'o, na' nla'n ka to yej kes da nak yalle. 19Na' yej dan' lla'a ran ze'e dan' nechj yellen' nonen len nbaraz. Da nellen' naken de yejen' nzi'i jaspe; da wllope na' naken de yejen' nzi'i zafiro; da wyonne na' naken de yejen' nzi'i ágata; da wdape na' naken de yejen' nzi'i esmeralda; 20da ga'ye na' naken de yejen' nzi'i ónice; da wxhope na' naken de yejen' nzi'i cornalina; da galle na' naken de yejen' nzi'i crisólito; da xo'ne na' naken de yejen' nzi'i berilo; da ga na' naken de yejen' nzi'i topacio; da chi na' naken de yejen' nzi'i crisopraso; da chnej na' naken de yejen' nzi'i jacinto; na' da chllinn na' naken de yejen' nzi'i amatista. 21Na' gan' nak zi cho'llo da chllinn kwen ka', nak aken chllinn yej cha'o dan' nzi'i perla, toton naken de yej cha'o nzi'i perla. Na' nez ke yellen' naken de ya cha'o dan' nzi'i oro, na' naken ka yej kes da nak yalle. 22Na' bibi yoda'o bre'ra' yellen', le be'nn ka' zjalla'a yell na', ni't ake' rao Xanllo Dios, be'nnen' nape yel wak xhen, na' rao Jesucristo be'nnen' nak ka xhi'r da'o, leake'n nxenra'll be'nn ka' lla'a yellen'. 23Be'nn ka' lla'a yellen', bibi will bibi be'o yallj akre' wseni'n yellen', le beni' dan' nechj Dios na', llseni'n ke ake' rente beni' da nsa'a be'nnen' nak ka xhi'r da'o. 24Na' beni' ke Dios na' wseni'n ke be'nn za'k yeololte yell zjalla'a yellrio, be'nne llonlira'll Dios, na' be'nn wnebia' lla'a yellrio we'xhen ake' Dios, we'e ake' Le'e bi da za'ke da cha'o da de ke ake', ren no yel bara'nn xhen ke ake'. 25Bi cheyj gan' nak zi cho'llo da ka' ni't yellen' te lla, le ganna' bill gale. 26Na' yel za'k yel nbaraz da zjadé yeolol yell, ren yel bara'nn da zjadé ke be'nn wnebia' ka', we'e ake'n Diosen'. 27Yell na' kbat gak cho' be'nn llon da zban. Bi gak cho' be'nne llon biteze da llwie Dios, na' be'nne lloe' di'll wenra'lle. Zeraoze be'nne ka' nyoj ra ake'n le' yich ke Jesucriston', be'nnen' nak ka xhi'r da'o, na' nyoj ra ake' ga't yel nban ke ake' ke chnare, leakze'n gak cho' ake'.

will be added

X\