Apocalipsis 20

1Bayoll na' bre'ra' to angl be'nn zo yebá, betje' no'xe' xhiya ke yell zitj dan' nak lo gabil, na' no'xe' to gden xhen. 2Anglen' be'xe' bel xi'on, ban' bra' kana'te. Leba' llnebia'ba' daxi'o ka', na' leba'n Satanásen'. Anglen' bchejeba' gden to mir iz. 3Bayoll bchejeba' na', le bza'lteba' lo yell zitj gabilen', na' le bsejte' lloa' yell zitjen', na' bchi'chte'n to sey nench bill siye'ba' be'nnach chak llin to mir iz. Kat te to mir izen', kana'll yeselleba' gden na' nench yellojba' ye choll. 4Na' bre'ra' gan' lljachia be'nn ka' llnebia', na' bllia ake' rawe na', be'nn ka' bro' Diosen' rao na'a ake' gon ake' yel koxchis ke be'nnach. Na' bre'ra' be'nn ka' bchoy ake' yen, ni ke dan' be'e ake' xti'll Jesúsen', na' ni ke dan' bxenra'll ake' Diosen', na' bi be'rao ake' bell xi'on, ren lwa'a keba' na', na' leska' bi be'e ake' latj so sen keba' roxhga ake' o na'a ake' na'. Na' basbán Diosen' leake' radj be'nn wat ka', na' nnebia'rén ake' Criston' to mir iz. 5Be'nn ki gok be'nn nell babán ake' radj be'nn wat ka'. Na' bi babankze be'nn ka' yela', bllinte gokll to mir iz, kana'llen' babán ake'. 6Nbaraz nni't be'nn ka' basbane' radj be'nn wat ka' da nelle, be'nn ka' ba brej Diosen' nak be'nn ke'e. Bi gak ke ake' kan' gak ke be'nn ka' yellayrao ake' ke chnare bi da xhinnj ba ben ake', da na'n nello yel got wllope. Len na' ni't ake' nxenra'll ake' Dios, na' nxenra'll ake' Cristo na', na'llen' gak ake' bxoz, na' nnebia'rén ake' Criston' to mir iz. 7Kate ba gok to mir iz na', we'e Diosen' latje yelloj xan daxi'o ka' lo yell zitj lo gabil na', gan' bseyje' na'. 8Na' yellojen na' siye'n be'nne da yobre, be'nn zjalla'a yeolol yell ka' lla'a yellrio. Siye'n be'nn ka' nzi'i Gog na' Magog, yetopen leake' tilrén ake' Criston', gak ake' be'nn zan kwis ka yoxh da lli' lloa' nisda'o, da nono llak wrabe. 9Na' bre'da'ora' be'nn zan llebraz ka', bza'a ake' doxhen rao yellrio, na' jake' gan' lli' yell dan' nllie' Diosen', gan' zjalla'a be'nn ka' ba breje' nak ake' be'nn ke'e. Na't ka byechj ake' yellen', le bente Diosen' bexj yi' le' yebán' bzeyten leake'. 10Na' ka nak xan daxi'o ka' dan' bxhiye'e be'nne lla'a yellrio, angl ke Dios na' bza'le'n lo yi' gabil gan' lla'lnninn dan' nzi'i azufre, na' yi' xhen na' naken ka to nisda'o, gan' bza'l ake' bell xi'on ren be'nnen' be'e di'll wenra'll, nench bxenra'll be'nnach bell xi'o na'. Na'll yellayrao ake' ke chnare. 11Na'll bre'ra' gan' llia Diosen' naken to da xhen da nak da llich kwis. Na' yellrion' rente yebán' baranten chras nollno bre'kze len, gallga gokse yezi'ra'llen ga yobre. 12Na' bre'ra' be'nn ba got, be'nn gore be'nn xkwi'de, na' no bda'o, zjazellá ake' rao Diosen'. Na'll bse's Diosen' yich ka' dan' nyoj yeolol da ben totoe'. Bayoll na' bse'se yich gan' nyoj ra be'nn ka' de yel nban zejlikane ke. Na'll bene' yel koxchis ke ake' kon ka ben ake', chak bzo ake' yellrio, le yeolol da ben ake' na', nyojen le' yich. 13Yeolol be'nn wasa't lo nisda'on, balloj ake' zjazellá ake' rao Diosen', na' yeolol be'nn wasa't ga yobre, leska' balloj ake' zjazellá ake' rawe'n, nench na' bene' yel koxchis ke totoe' kon ka ben ake' chak bzo ake' yellrio. 14Na'llen' yel got gan' lla'a be'nn wat ka', Diosen' bza'len lo yi' gabil dan' nak da xhen ka to nisda'o. Na' dan' got be'nn ka' blla'a lo yi' na', len na' yel got wllope ke ake'. 15Yeolol be'nn bi bzoa xti'll Diosen', yeolol be'nn bi nyoj ra ake' gan' nyoj ra be'nn, de yel nban zejlikane ke ake', bza'l Diosen' leake' lo yi' na'.

will be added

X\