Apocalipsis 2

1’Ki wzojo' be'nnen' bse'la', lloe' xti'lla' ren be'nn ka' lldop ll-llay llonlira'll nada' gan' nzi'i Éfeson': “Nada' no'xa' berj gall ka' lo na'a cha'wen', na' da'a kllol kandler gall ka' dan' nak de ya cha'o dan' nzi'i oro, na' llepa' re': 2Nnezyollra' ka wen na' llonre na', zere da war llonre xchina'n. Na' nnezra' bi llrebre be'nn llon da xhinnj, le ba bre'kzere kan' llon be'nn wenra'll ka', llasné ake' nak ake' postl kia', nnézkzere kere dogarje postl aken'. 3Na' ba ballayraore, na' ba gokxhenra'llre, na' ba benre xchina' do ra'llre, ni ke dan' nllie're nada', na' bi nna gatra'llre. 4Zan nna' de to da bi llazra'lla' kan' llonren': bill nllie're nada' kan' bllie're nada' kana'. 5Ke len na' lewayón xhbab kan' ba benren', na' lewayate lewayón kan' benre kana'. Cha' bi wayátere da ka' llonren', weda' yedka'a re', bill gakre kandler kia' cha' ka'. 6Leska' de to da llayo'ra'lla' kan' llonren': llwiere da xhinnjen' ka da ka' llon be'nn ka' nzi'i nicolaítas, be'nn ka' llasné ake' wakse gontezre da xhinnj, leska' bi llazra'lla' nada' kan' llon ake'n. 7Re' zo nayre da llene, lewzenay kan' ne Spíritu ke Diosen', llen re' lldop ll-llayre llonlira'llre nada' gateze: Re' soere bi kwej yichjre xti'lla' ni, nada' gonna' da gaore da llbia rao yay ke Xanllo Diosen', dan' zo latj nbaraz dan' lloe' yel nban.” 8’Na' ki wzojo' be'nnen' bse'la', lloe' xti'lla'n ren be'nn ka' lldop ll-llay llonlira'll nada' gan' nzi'i Esmirna: “Nada' naka' be'nn lliarao, na' naktia' ka be'nn za naore, be'nn ba got, na' babane' radj be'nn wat ka', na' llepa' re: 9Nnezyollra' ka wen na' llonre na'. Nnezra' za'kzi're. Nnezra' nakre be'nn ya'che, zan re' nakre ka be'nn wnia'. Na' nnezra' katke nnechach be'nn Israel ka' keré, na' ne ake' ba brej Diosen' leake' nench gone' wen ke ake'. Rencha' bi breje' ka be'nn ka', le bi llonlira'll ake' Le'e, nak ake' be'nn nak txhen dan' nak xan daxi'o ak. 10Bi llebre da ka' za gak kerén', le dan' nak xan daxi'o ka'n, gonen nench ko' ake' balre rill ya, nench na' wroe'n cha' soen wsanra'llre xti'lla'n. Na' rao do chi lla wsa'kzi' ake' re'. Lesoteze lewzoa xti'lla'n la'kze cha' got ake' re', nada' gonna' yel nban keré ke chnare. 11Re' zo nayre da llene, lewzenay kan' ne Spíritu ke Diosen', llen re' lldop ll-llayre llonlira'llre nada' gateze: Re' soere bi kwej yichjre xti'lla' ni, bi gak keré kan' gak ke be'nn ka' sa'kzi' ke chnare, dan' ne'e yel got wllope.” 12’Na' ki wzojo' be'nnen' bse'la', lloe' xti'lla'n ren be'nn ka' lldop ll-llay llonlira'll nada' gan' nzi'i Pérgamo: “Nada' no'xa' spad dan' nla llop la' rawe, na' llepa' re': 13Nnezyollra' ka wen na' llonren'. Na' nnezra' zore gan' llnebia' daxi'on, na' zore llzoare xti'lla'n. Bi llbej yichjre xti'lla'n dan' llejle'ren', na' ni ke brej yichjzre' kan' baso'te Antipas be'nnen' be'e xti'lla'n gan' zore na', gan' lla'a be'nn zan be'nn ka' llon txhen dan' nak xan daxi'o ka'. 14Zan de to chop da llonre da bi llazra'lla'. Ni't balre llzejnie' lwelljre wakse gontezre bi da xhinnj. Kan' nakse dan' bzejnie' da Balaam ke be'nnen' nzi'i Balaken' kana', dan' bko'yelre' be'nn Israel ka' nench bdao ake' yel wao da llia rao lwa'a dios ke ake' na', nench benrén xpe'r ake' da lle'n akre' da nak zdo'. 15Leska' ni't balre naore dan' llwiera' nada', dan' llroe' llsede be'nn ka' nzi'i nicolaítas. 16Len na' lewayate ke da xhinnjen' llonren'. Cha' bi yeyáteren', ba za'a na' yedtilrén ake' kone dan' ll-lloj lo lloa' ni, naken ka to spad. 17Re' zo nayre da llene lewzenay ke dan' ne Spíritu ke Diosen', llen re' lldop ll-llayre llonlira'llre nada' gateze: Cha' nol re' soere bi kwej yichjre xti'lla' ni, na' gonna' re' to yet nga'che da za'ke da nono nna re'e yellrio ni, ka dan' ne maná, na' gonna' tweje yej llich keré, ga nyoj rare da nak to da kobe da nono nombia', toze re' gaken keré gombia'ren.” 18’Na' ki wzojo' be'nnen' bse'la', lloe' xti'lla'n ren be'nn ka' lldop ll-llay llonlira'll nada' gan' nzi'i Tiatira: “Nada' naka' dogarje Xhi'nn Dios, na' nak yejrawa'n llaktit ka ga lla'lnninne, na' nia' ka' llaken ka to ya da nak llel-llibe llaktiten, na' llepa' re': 19Nnezyollra' ka wen na' llonre na', nnezra' zore nllie're nada', nxenra'llre nada', llonre xchina'n, na' llonre banez biteze da llak keré, na' nnezra' ba llonllre wen ye ra't kerke kan' llonre batna'. 20Zan de to da llonre da bi llazra'lla': dan' lloe're latj ren no'ren' llon ka da Jezabel no'ren' bnebia' kana'. Lle'e re' nake' be'nn llroe' llsedre' xti'll Dios, rencha' da wenra'llzen' ziye'ze be'nn ka', nench na' gonrén ake' yel zdo' xpe'r ake'n, na' gao ake' yel wao da ll-llia ake' rao lwa'a ke dios ke ake' llonlira'll ake'. 21Ba breza' cha' yeyate no'ren' ka dan' llone'n, na' bi llsanra'lle'n, na' bi llbej yichje' ka zdo'n llone'n. 22Ke len na' gona' gake' to yillwe' da sa'kzi'rene' rao gan' llxhoe'n, na' leska' sa'kzi' be'nn ka' llonrén le'e yel zdo', nara'chek cha' bi wsanra'll ake' dan' llzejnie're' leake'n dan' lle'e leake' wak gon ake'. 23Na'll gona' yesa't xhi'nne' ka', nench gakbe'e yeolol kwen be'nn ka' lldop ll-llay llonlira'll nada' gateze, na' wayakbe'e akre' nada' nnéztera' bi xhbab yo' lo yichjra'llda'o ake', na' gona' so totoe' nbaraz o cha' sa'kzi' ake' kon kan' nak dan' ba ben ake' na'. 24Na' re' zore Tiatiran' bi llonre kan' llroe' llsede no'r wenra'llen', na' bi nsedre dan' ne ake' llzejnie' akre' ke daxi'on dan' nono nombia', bi nnia' billre da gonre da yobre. 25Kon sokzre gonre da wen kan' llonkzre llinte lla yeda' da yobre. 26Notezre be'nne cha' bi kwej yichje' xti'lla'n, na' cha' soere' soteze gone' kan' nllia' bia'a na', kat yeda' da yobre, gona' nnebia'rén ake' nada' yell ka' zjalli' yellrion'. 27Kan' ba benn Xa'n nada' yel llnebia' na', gona' nnebia' ake' yell ka' war kwis. Na' be'nn ka' bi llzenay, wlleyi' ake' leake' ka llxhoxhje' to ye's de yo. 28Na' wa'a latj ke ake' serén ake' be'nnen' nak ka berj rsire. 29Re' zo nayre da llene, lewzenay kan' ne Spíritu ke Diosen', llen re' lldop ll-llayre llonlira'llre nada' gateze.”

will be added

X\