Apocalipsis 19

1Bde na' benra' be'nn zan kwis lla'a yebán', lloe'rao ake' Dios, ne ake' zillj: ¡Gakxhenchga Diosen'! Nake' wasrá kello, na' nake' be'nn za'ke, na' nape' yel wak xhen. 2Le yel koxchis ke'en naken da li. Ba bchoybie' kweyi' yell brao na' dan' nak ka to no'r re'e na', le na'n zjalla'a be'nn ka' bko'yele be'nn lla'a doxhen yellrio, nench bi bzoa ake' xti'll Diosen'. Ba bchoybie' kweyi' be'nn Babilonia ka', llaya'l sa'kzi' ake' dan' bet ake' be'nn ka' bxenra'll Le'e. 3Na'll bne ake' da yobre: —¡Gakxhenchga Diosen'! Ke chnare chas llén gan' chey yellen'. 4Na' be'nn tapalloa ka' (24) ren be'nn ye tap ka' llia xiren', le go't akte' slloa're rao yon', lloe'rao ake' Diosen' gan' llie' na', ne ake': —¡Ka'n gakchga! ¡Gakxhenchga Diosen'! 5Na' nen bnne ye to be'nn gan' llia Diosen', ne'e: Yeolol lli'o llon xchin Diosen' llaya'l wxenra'll-lloe', lli'o lleblloe', no be'nn gore no bida'o ak. 6Na'll benra' be xhnne ke be'nn zan lloe'rao ake' Diosen', na' nen ka ga de yeo xhen ake, na' ka ga llachj yi'wzi'o, ne ake': ¡Gakxhenchga Diosen'! Le le'en nape' yel wak, na' ba bzorao llnebie'. 7Yewello sollo nbaraz kwis we'raolloe'. Le ba bllin lla gak yel wachayna'a ke be'nnen' nak ka xhi'r da'on. Ba zo no'ren' sie' xho're'. 8Ba be'e ra'll cha'o da nake', ra'll lliche xhi're. Na' ra'll cha'o da llich na', zeje di'll da wen dan' llon be'nn ka' ba brej Diosen', nak ake' ka no'ren' za wchayna'a na'. 9Na'll goll anglen' nada' da yobre: —Bzoj da ni: “Nbaraz ke be'nn ka' ba goxhe' lljak katen' gak lnni ke yel wachayna'a ke be'nnen' nak ka xhi'r da'on.” Na'll bne anglen': —Di'll nin' goll Diosen' nada' naken di'll li. 10Na'll bzoa xhiba' xhnie' anglen' nench we'rawe', na' bi benne' latje, bne'e: —Bi gono' ka'. Nada' naka' be'nn wen xchin Dios kan' nakso' rwe' ren be'nn lwelljo' ka', be'nn bi llbej yichje' xti'll Jesús na'. Benxhen Dios na'. Na' be'nn lloe' xti'll Jesúsen', zokze Spíritu ke Diosen' llzejnie'n leake' nench lloe' ake' xti'lle'n. 11Na' bre'ra' yebán' ka to da nyarje, na' bre'ra' to kabay lliche, na' llia to be'nne leba'. Be'nnen' llia leba'n na' nzie' Be'nn Llon Kon Kan' Ne'e, na' Lloe' Di'll Li. Zeje' lixheje kan' llchoybie' sa'kzi' be'nn ka' bi llon kan' ne'e na', na' dilrene' da xhinnj na'. 12Na' bre'ra' yej rawe' ka' naken llaktit ka yi' da lla'lnninne, na' zan corona zjazó yichje'n, na' nyoj ye to re'e roxhgue'en da nombia' toze Le'e. 13Na' nake' to ra'll da dop llen, na' nzie' Xti'll Dios. 14Na' be'nn nak be'nn waka'a ya ke Diosen' nao ake' Le'e, nak ake' ra'll cha'o da nak llich yalle, na' llia ake' twej kabay lliche. 15Na' lloe' na' ll-lloj to spad da nlátit rawe' da gone' we'e yell ka' bi llzoa di'll kan' ne'e na'. Na' kat nnebie' na', wsa'kzie' leake', na'll wzenay ake' ke'e. Na' wdie' leake' ka to le' yay yetj, na' sa'kzi' be'nn ka' ba ben da xhinnjen', le Dios be'nnen' nap yel wak xhen na', llaklle'e kan' ba ben ake'n. 16Na' le' xhe'e na', na' le' xhichje' na', nyoj di'll ki nen: “Naka' Rey ke yeololte rey ak, na' naka' Xan yeololte be'nn wnebia'.” 17Na'll bre'ra' to angl zelle'e lo willen', na'll besie' balwille' yeololte chod ak llasdá le' yebán', lle'eba': —Ledá, leyedope ganni gaore to xche' xhen da gonn Diosen' keré. 18Ga't xpe'r be'nn wnebia' ak, xpe'r no xan be'nn waka'a ya ak, xpe'r no be'nn war ak, xpe'r kabay ak, na' ren ke be'nn wllia leba', na' ke yeololte be'nne, no be'nn gok be'nn wen llin ke be'nne, na' rente be'nn bi ben xchin be'nne, na' no xkwi'de, na' no be'nn gore. 19Na' bre'ra' bell xi'on, ren yeolol be'nn wnebia' ka' zjalla'a yellrio ren be'nn waka'a ya ke'e ka', ba badop ake' nench tilrén ake' Jesús be'nnen' llia ko'll kabay llichen', ren be'nn waka'a ya ke'e ka'. 20Na' bellen' gokba' rallna'a Jesúsen', na' leska' gok ke be'nnen' be'e di'll wenra'llen', be'nnen' ben yel wak nench bxenra'll be'nne bell xi'on, ren lwa'a keba' na', na' bzo ake' sen keba'n. Llop akteba' gok rao na'a Jesúsen' rente be'nnen' be'e di'll wxhiye'e na', nna nbanteba' bza'l akeba' lo yi' gabil gan' lla'lnninn dan' nzi'i azufre, na' naken to yi' xhen dan' nak ka to nisda'o. 21Jesúsen' be'nnen' llia kabay llichen' bete' yezikre be'nn ka' nao bell xi'on kone spad dan' blloj lloe' na', na'll yeolol chod ka' to berj akeba' bdao akba' xpe'r ake'n.

will be added

X\