Apocalipsis 18

1Bde na' bre'ra' betj ye to angl be'nn bza'a yebán' rao yellrion', na' gok rao ne'e yel llnebia' xhen na', nench gok kan' bne'e na', byeni' yellrion' kone beni' ke'en nse'e na'. 2Na' bnne'e zillje, bne'e: —Ba bllin lla kweyi' Babilonian' yell brao na'. Ba bllin lla yeyaken xhichna' daxi'o. Ba bllin lla yeyaken ga cha'a ba llia xire ba xi'o ake. 3Kweyi'n, le be'nn ka' lla'a yell Babilonia na'n, le bko'yel akre' be'nn zjalla'a yeolol yell ak, na' gok ake' ka be'nn bzollre', le benrén ake' leake' txhen rao da xhinnj ke ake'. Na' be'nn wnebia' lla'a yellrio ben ake' da llawé xpe'r ake' ren be'nn Babilonia ka', na' be'nn ka' llo't bi da llo't, gok ake' be'nn wnia', le be'nn Babilonia ka' benditje akre' da go't ke ake'. 4Na'll benra' ye to be xhnne da za'a yebá, na' bne'e: —Re' nak xhi'nna', lelloj yell Babilonian' nench bi gonrenre be'nn ka' da xhinnj, nench ke sa'kzi'rén akre'. 5Le do'l xhen de ke be'nn Babilonia ka', na' Diosen' lljadinra'lle' yeolol bi da xhinnj ba ben ake'. 6Sa'kzi' akchga no'r re'en, zeje di'll be'nn yell Babilonia, dan' ba bsa'kzi' ake' be'nne. Yellayraochgue' da xhenll ka da ba benre' be'nne. 7Lewe'chgue' yel llza'kzi' ke'e, katken' bene' kan' go't da wen da cha'o ke'e, le lo ra'llda'we' na' bne'e: “Kere da te ke yel llnebia' kia' ni, ni ke yega'nnza' ka no'r wazeb, ni ke llojze nis bell rawa'.” 8Ke len na' toze lla gak dan' llakre' bi tekze ke'e. Be'nn zan gat, na' be'nn zan kwell ake', na' bil ton ake', na' chey ake' lo yi', le Xanllo Diosen' nape' yel wak xhen, wsa'kzie' leake' ke da xhinnjen' ba ben ake'n. 9Be'nn wnebia' ka' zjalla'a yellrio, be'nn bnao be'nn Babilonia ka' ben ake' da xhinnj, na' ben ake' ka da nen ke ake', leake'n kwell ake', na' yebán akre' kat re'e akre' chas llén dan' chey yellen'. 10Na' lljasé ake' zi'tre wia ake' kan' llak ke be'nn Babilonia ka', lleb ake' kwis, na'll nne ake': —¡Nya'chraz llak ke yell brao, Babilonian', yell braoll ka yeololte yellen'! Ba bllin lla kweyi'n choll da'oze. 11Na' be'nn we't ka' zjalla'a yellrion' kwell ake', na' yebán akre' kat kweyi' yellen', le nollno llra' si'i dan' go't aken'. 12Dan' llo't ake'n naken de ya cha'o nzi'i oro, de ya cha'o dan' nzi'i plat, de yej za'ke, na' de yej cha'o dan' nzi'i perla, na' ra'll cha'o de lino, na' de sed, na' ra'll morad, na' ra'll da xhna, na' yeololte da nak de yay la' xhix, na' billre yay za'ke, na' ren da nak de llit da nak nbaraz da nzi'i marfil, na' de ya cha'o dan' nzi'i kobr, na' de ya, na' de yej cha'o dan' nzi'i mármol. 13Nollno si'i no kner ke ake'n, no ceit xhix, no yare, na' da la' xhix dan' nzi'i mirra, na' ye to da la' xhix dan' nzi'i olíbano, no xis uva, no ceit ke yel wao, no yezje, no trigo, no burr, no blli'n, no xhi're, no kabay, no karret, no be'nne ba nda'o nak be'nn wen llin ke to chi'ze. 14Na' be'nn we't ka' nne ake' ke yellen': —Ba bde ke yeolol daxhix ka', na' yeolol da ka' byazra'll be'nn Babilonia ka' si'i ake' kone yel wnia' ke ake'n, kere no si'll da ka' nna'. 15Na' be'nn we't ka', be'nn ka' be't da bxhi'i be'nn Babilonia ka', se ake' zi'tre lleb ake' kan' llallayrao be'nn ka', na' yebán akre' yesbell ake'. 16Na'll nne ake' zillje, ne ake': —¡Nya'chraz ba gokrize ke yell braon'! Be'nn blla'a yell ni, gok ake' ra'll cha'o ra'll za'ke, no ra'll morad, no ra'll xhna. Wa bzocha'o ake' nbaraz kone ya cha'o ren yej za'ke da llaktit, na' ren yej cha'o nzi'i perla. 17Na' nna' choll da'oze blleyi' yeolol da cha'o ke ake'n. Na' yeololte xan barco ka', na' yeololte be'nn lljak lo barco, ren be'nn llon ak llin lo barco, na' nollre be'nn llon ak llin lo nisda'on, yeolole' se ake' zi'tre. 18Na' re'e akre' llas llén, na' lley yellen', na'll nne ake': —Bi nna kwe' ye to yell yobre ka yell ni doxhen yellrio. 19Na'll wllia ake' yo bichte yichj ake' yel llabane, na'll kwell ake' nne ake': —¡Nya'chraz gokrize ke yell brao ni! Ren yel wnia' ken, le gok ake' be'nn wnia', yeololte no xan barco, yeololte no be'nn llon llin lo nisda'on, na' nna' choll da'oze blleyi' yellen'. 20Na' re' lla're yebán', leyewé, re' bse'l Diosen' gokre postl ke'e, na' re' bse'le' be're xti'lle'n, na' yezikre re' nak be'nn ke'e, leyewé le Dios na' ba bchoyrawe' kweyi' be'nn ka' bsa'kzi' re'. 21Na'll ye to anglen' nap yel waken' broe' ye to yej xhen da nak ka yej yich, bza'len lo nisda'on, bne'e: —Kan' gak ke yell Babilonian', yeranen kan' barán yej xhen ni, bza'la'n lo nisda'o na', kbatlle re'llon da yobre. 22Kbatlle yénello gol dan' ne arpa yellen', kbatlle wkwell wakwell ka' no bllej no trompet. Kbatlle ller be'nn nsed gone' xchinrazre da gonrene' llin, ni llakia ke be'nn llot bi da llote' lo yej yich yénello yellen'. 23Kbatlle re'llo beni' ke dan' llseni'n, na' kbatlle yénello lnni ke be'nn llon yel wachayna'a. Kweyi' be'nn ka' llo't lla'o rao yellen', be'nn ka' nak be'nn brao rao yellrion', le be'nn Babilonia ka' ba bxhiye'e ake' be'nn zjalla'a yeolol yell kone yel walla'a ke ake'n. 24Be'nn Babilonia ka', bet ake' be'nn be'e xti'll Diosen', na' nollre be'nn brej Diosen' gak ake' be'nn ke'e. Na' rao yell na' baroe'rawe bet ake' yezikre be'nne.

will be added

X\