Apocalipsis 17

1Na'll bed to angl gall ka' no'x ake' leo de ya cha'o, na' lle'e nada': —Da ke, wroe'ra' rwe' kan' gon Diosen' sa'kzi' no'r bra'on lli' lo nisda'o ka', no'ren' nak no'r re'e. 2Yeolol be'nn wnebia' lla'a yellrio, ba bawé akre' bzenay ake' ke'e, na' nnello nak ake' ka xtoe', na' leska' yeolol be'nn lla'a yellrio, bawerén akre' le'e, na' gok ake' ka be'nn bzollre', le benrén ake' le'e txhen rao da xhinnj ke'en. 3Na' chak ben Spíritu ke Diosen' bre'da'ora' da ki, bche'e anglen' nada' to latj dache. Ka bllina' na', bre'ra' to no're llie' ko'll bell xhna ban' llia gall yichj na', na' llia chi lozba', na' doxhen kwerp keba'n nyojen di'll da dilrén Dios. 4No'ren' nake' to ra'll dan' nchix da morad na' da xhna, na' none' nbaraz kone ya cha'o dan' nzi'i oro, ren yej cha'o, ren yej dan' nzi'i perlas. Na' no'xe' to leo de ya cha'o dan' nzi'i oro, balla'te yollen to da zejen llawere' llone' da nen ke xpe're', na' billre da llwie Dios. 5Na' roxhgue'e na', nyojen di'll da nen akre nake', di'll da bi byejnie' be'nnach, nen: “Naka' yell Babilonia, na' naka' be'nn brao. Naka' xhna' no'r re'e ake, na' xhna' da zban da de rao yellrion'.” 6Na' bre'ra' zolle no'ren', bawe'je' xchen be'nn ka' nake be'nn ke Dios, be'nn ka' be'e di'll nxenra'll ake' Jesúsen'. Na' ka bre'ra' no'ren', na'll babanra'. 7Na'll goll anglen' nada': —¿Bixchen llabanro'? Wzejnie'kzera' rwe' bi zejen dan' bre'ro' no'ren' llia ko'll bell xi'on zo gall yichj, na' llia chi lozba'. 8Bellen' bre'ro'n bzoba' bnebia'ba' choll, zan bill nnebia'ba' nna', yellojba' lo yell zitjen' dan' nak lo gabil gan' yo'ba'n. Te na' yeyo'ba' sa'kzi'ba' ke chnare. Ka bxhe yellriote bzoj Diosen' ra be'nn ka' nap yel nban zejlikane le' yich ke'e na'. Na' be'nn ka' bi nyoj ra ake' le' yich ke'e na', yebán akre' kat re'e akre' yebán bell xi'on, ban' bzo batna', na' nna' bi zoba', na' soba' da yobre. 9Yálljello yel si'n na', nench chejnie'llo da ni. Da gall yichj bellen' naken gall ya' gan' lli' no'ren'. 10Na' leska' zejen gall be'nne wnebia'. Ga'ye' ba bzo ake' bnebia' ake', na' ba bnit yel llnebia' ke ake'n. Toe' llnebia' nna', na' be'nnen' ye to bi nna re'lloe', za yede' yednnebie', na' kat yede'n chollze yednnebie'. 11Na' bell ban' bzo kana', na' bill zoba' nna', zejen ye to be'nn wnebia', be'nn xo'ne. Nake' to be'nn ka' galle bnebia' ake', na' nnebie' da yobre, na' Diosen' gone' kweyie', na' sa'kzie' ke chnare. 12’Na' chi lozba' ka' bre'ro'n, zejen chi be'nn wnebia' ka' be'nn za za'ke nench nnebia' ake'. Na' nnebia'rén ake' bellen' txhen chollze. 13Na' yeololte be'nn chi ka', toz ka gon ake', ko' ake' rao na'a bellen' yel llnebia' ke ake'n, na' billre da llak llon ake'. 14Na' tilrén ake' be'nnen' nak ka xhi'r da'on, na' be'nnen' nak ka xhi'r da'on gone' gan rao wdilen', le Le'en nake' Xanllo, be'nn llnebia' rao yezikre be'nn wnebia', na' nake' Rey, be'nn llnebia' rao yeololte rey. Na' be'nn ka' non le'e txhen na', nak ake' be'nn ba brej Diosen', be'nn ka' nxenra'll akya'nne' Le'e biteze da gak. 15Na'll goll anglen' nada': —Nisda'o ka' bre'ro' gan' lli' no're re'e na', zejen be'nn zan kwis, be'nn yell, na' zan yell xhen ake, na' be'nn llak wde wdere di'll de yellrio. 16Na' be'nn ka' nak ka chi loz bell xi'o, wie akre' no'ren', na' wsanra'll ake' le'e yekwa'nn akte' gal yidze, te yeyoll na', gao ake' xpe're'n, na' wzeyrén akte'n lo yi'. 17Le Dios na'n we'e latj gak ake' toze, gon ake' yeolol da ka' nne bell xi'o na', na' gon ake' yel llnebia' ke ake'n rao na'a bellen', nench na' gak yeolol da ka' ba bne Diosen'. 18Na' no'ren' bre'ro'n nake' yell brao kwis da llnebia' be'nn wnebia' ka' zjalla'a doxhen yellrio.

will be added

X\